Маргааш буюу 2020 оны нэгдүгээр сарын 1-нээс эхлэн ААНОАТ (Аж ахуйн нэгжийн орлогын албан татвар)-ын шинэ хуулийг мөрдөж эхэлнэ. Энэ хууль мөрдөгдөж эхлэхтэй холбоотойгоор доорх шаардлагыг бүх компани хэрэгжүүлнэ.

2020 оноос татвараас хасагдах зардлыг дахин давтагдашгүй дугаар бүхий төлбөрийн баримт буюу НӨАТ-ын баримтаар хасахаар ААНОАТ-ын хуулийн 13.1.4-д заасан. Өөрөөр хэлбэл, Компанийн бүртгэлд тусгаж буй бүх зардал НӨАТ-ын баримтаар баталгаажна гэсэн үг. НӨАТ төлөгч биш байгууллагууд ч ийм баримт хэвлэж өгөх үүрэг хүлээж байна. Компаниуд баримтаа байгууллагын Регистрийн дугаараар гаргуулан авах ёстой.

Ингэснээр ибаримт олгодоггүй, 100 айлын барилгын материалын дэлгүүрүүд, захуудаас ААН-үүд худалдан авалт хийх нь багасна, тэр хэрээр далд эдийн засаг хумигдана гэж хууль санаачлагчид үзжээ.

ААНОАТ-ын 13 дугаар зүйл. Албан татвар ногдох орлогоос хасагдах зардалд тавигдах шаардлага

13.1.Дараах нөхцөлийг нэгэн зэрэг хангасан зардлыг албан татвар ногдох орлогоос хасаж тооцно:
13.1.1.тухайн татварын тайлант хугацаанд хамаарсан байх;
13.1.2.албан татвар төлөгчийн албан татвар ногдох орлого олох үйл ажиллагаатай шууд холбогдон гарсан байх;
13.1.3.зардал бодитой гарсан бөгөөд Нягтлан бодох бүртгэлийн тухай хуулийн 13 дугаар зүйлд заасан баримт болон холбогдох бүртгэлээр баталгаажсан байх;
13.1.4.бараа, ажил, үйлчилгээний зардал Татварын ерөнхий хуулийн 28.5-д заасан дахин давтагдашгүй дугаар бүхий төлбөрийн баримт, импортын бараанд татвар ногдуулж, гаалийн байгууллагад төлсөн тухай баримтаар баталгаажсан байх:
13.1.5.зардлыг тухайн үйл ажиллагаа эрхэлж байгаа албан татвар төлөгч төлсөн, эсхүл төлөхөөр тайлагнасан байх.