ШИНЭ ДЕЛИ. /RIA Novosti/. Баталгаагүй мэдээллээр “Талибан”-ы дайчид Панжшер мужийн нийслэл рүү орж, мужийн захирагчийн байрыг эзлэн авчээ гэж “Times of India” сонин мэдээлсэн байна.

Харин “Талибан” хөдөлгөөнийг эсэргүүцэгч хүчнүүдийг нэгтгэж буй Афганистаны Үндэсний эсэргүүцлийн фронтын албан ёсны төлөөлөгч Фахим Дашти твиттер хуудсандаа мэдэгдэхдээ, талибууд Панжшертай залгаа хил дээр оршдог Дарбанд өндөрлөгт хүрсэн боловч давшилтыг зогсоосон гэжээ.

Эсэргүүцлийн хүчнүүд нэг өдрийн дотор 600 орчим талибаныг устгаж, мянга гаруй хүнийг олзолсон гэж тэрбээр мэдэгдсэн байна.

Наймдугаар сарын эхээр Афганистанаас АНУ-ын цэргүүд гарахтай зэрэгцэн талибууд томоохон хотууд руу дайрч эхэлсэн юм. Наймдугаар сарын 15-нд тэд Кабулыг бүрэн хяналтдаа авч, эрх мэдлийг булаан авсан бол тус улсын Ерөнхийлөгч асан Ашраф Гани эх орноосоо зугтан гарсан билээ.

“Талибан”-ы хяналтад ороогүй цорын ганц муж бол Кабулаас зүүн хойд зүгт орших Панжшер муж юм.

Талибуудын төлөөлөгч Билал Карими өмнө нь тус бүс нутаг "Талибан"-ы хяналтад орсон гэж мэдэгдсэн. Түүнчлэн өөрийгөө Афганистаны түр Ерөнхийлөгчөөр зарласан дэд ерөнхийлөгч Амрулла Салех, эсэргүүцэх хүчний удирдагч Ахмад Масуд нар зугтсан гэж Кабулын цагдаагийн газар дах эх сурвалж мэдээлжээ.

Гэсэн ч Салех дээрх мэдээллийг няцааж, эсэргүүцэл үргэлжилсээр байгаа бөгөөд тэрбээр улс орноо орхиогүй, Панжшерт байсаар байгаагаа мэдэгдсэн байна.

www.montsame.mn