44 их наяд төгрөгийн нүүрсний хулгайн асуудлыг баримтаар шинжлэн судлах нийтийн сонсгол үргэлжилсээр. Эрх баригч намын шинэхэн хууль зүйн сайдын улс төржилт ч мартагдсангүй. Ардчилсан намынхныг нүүрсний мафийн гол толгойлогчид мэтээр нийгэмд ойлгуулахаар чармайх нь харганы унгас түүж ноос савахын үлгэр болж байх шиг. Зарим нэг явцуу бүлэглэлийн хууль бус явдлыг ил болгох нь зөв. Монгол Улсын төсөв, аюулгүй байдлыг хохироосон эл хурцадмал асуудлыг зөвхөн баримтын мөрөөр хэлэлцэхгүйгээр сонгуулийн өмнөх суртал ухуулгын хэрэгсэл төдий болгож орхих нь нуухыг авах гээд нүдээ сохолсонтой агаар нэг.

“Ерөнхийлөгч асан Ц.Элбэгдорж Эрдэнэставантолгойд эзэн суухаар санаархаж эсэргүүцсэн гүйцэтгэх захирал асан Я.Батсуурь дарамтлан шоронд хорьсон” гэх асуудлыг нарийвчлан шалгаж тогтоон буруутай этгээдүүдэд зохих хариуцлагыг хүлээлгэх нь ч зүй. Гэхдээ нийгмийн сүлжээн дэх зориудын зохион байгуулалттай ухуулгын шинжтэй явуулгуудыг ажиглаваас хулгай, худал болгоныг Ардчилсан нам руу бухаад өөрсдөө хар утаан дотроос өндөг шиг цагаан өөгүй цэвэрхэн болж харагдах гэсэн дэндүү хошин хэрэг болох юм.

Далимаар нь хувийн жижиг хонзонгоо үл далдлах этгээдүүд үнэн худлаа нь мэдэгдэхгүйгээр УИХ-ын гишүүний нэр төрөө ч умартан бусдыг баримтгүй гүтгэх оролдлого ч харагдаж байна.

ЭТТ-н захирал асан Ганхуягийг хордуулсан ба уг сонсголд оруулахгүй байгаа гэх мэдээлэл нь цаагуураа хардлага төрүүлэхээс өөр аргагүй юм. Түрүүлж дугарсан хөхөөний ам хөлдөнө хэмээн нэр бүхий түшээд сануулам өнцөг байр сууриуд харагдана.

Д.ЭНХБАТ