Кени улсын Найроби хотод энэ сарын 11-14 ний хооронд зохион байгуулагдсан НҮБ-ын Хүн амын сангийн олон улсын уулзалтад манай улсын 20 төлөөлөгч оролцсон. Үүнээс нэг төлөөлөгч нь бөөлжих, суулгах шинж тэмдэг илрэн холер өвчин болох нь лабораторийн шинжилгээгээр батлагдаж, тус улсын эмнэлэгт хэвтэн эмчлүүлж байна. Энэ талаар ЭМЯ-ны төрийн нарийн бичгийн дарга Я.Амаржаргалаас тодрууллаа.

-НҮБ-ын хүн амын сангийн олон улсын хуралд оролцсон хүмүүсээс нэг нь холер өвчнөөр өвчилж, тухай газартаа үлдсэн гэсэн. Энэ талаар мэдээлэл өгөхгүй юу?

-НҮБ-ийн олон улсын хурал Кени улсын Найроби хотод болсон. Энэхүү хуралд манай улсаас төрийн болон төрийн бус байгууллага, аж ахуй нэгж байгууллагын 20 төлөөлөгч оролцсон. Хуралд оролцсон хүмүүсээс нэг хүн холер өвчний халдвар авч, тухайн улсын эмнэлэгт хэвтээд үлдсэн. Харин 19 хүн эх орондоо ирсэн байгаа. Найроби улс холер өвчний голомттой. Энэ өвчин ус, хүнс, ахуйн замаар дамждаг.

-Эх орондоо ирсэн 19 хүн шинжилгээнд хамрагдсан уу?

-Хуралд оролцоод ирсэн 19 хүнээс шинжилгээ авсан байгаа. Энэ шинжилгээгээр холер өвчний халдваргүй гэж гарсан.

-Холер өвчнөөр өвчилсөн хүний биеийн байдал ямар байгаа бол. Хэзээ эх орондоо ирэх вэ?

-Энэ өвчин эмчлэгддэг. Өвчилсөн хүний биеийн байдал хэвийн байгаа гэсэн. Эмчилгээгээ хийлгээд халдваргүй болсны дараа эх орондоо ирнэ гэсэн мэдээлэлтэй байна.

-Голомттой газарт албан хаагчдаа сургалтад явуулахдаа урьдчилан сэргийлэх арга хэмжээ авдаг уу?

-Ер нь Дэлхийн эрүүл мэндийн байгууллагын зөвлөмж болгосноор халдварт өвчний голомттой орнууд руу явахдаа тодорхой хэмжээний дүрэм байдаг. Дүрмийн дагуу дархлаажуулалт болон вакцин хийлгээд явдаг. Холер өвчинд вакцин байдаггүй. Явсан хүмүүст урьдчилан сэргийлэх чиглэлээр мэдээлэл өгч баталгаа авч явуулдаг байгаа.