ОХУ-ын Ерөнхийлөгчийн хэвлэлийн төлөөлөгч Дмитрий Песков “Герман улсын канцлер Фридрих Мерцийн алсын тусгалтай пуужингийн талаар хийсэн мэдэгдэл нь дайныг улам өдөөн турхирч байгаа үйлдэл бөгөөд украинчуудыг дайныг үргэлжлүүлэхийг шахаж буй оролдлого” гэж мэдэгджээ.

Песков сэтгүүлчдэд “Энэ бол зөвхөн дайныг улам өдөөж буй явдал, өөр юу ч биш. Энэ бол зөвхөн украинчуудыг үргэлжлүүлэн дайт хэмээн шахаж буй оролдлого, өөр юу ч биш” гэж хэлсэн байна.

Өнгөрсөн даваа гарагт Германы канцлер Фридрих Мерц WDR телевизэд ярилцлага өгөхдөө “Их Британи, Франц, АНУ болон Герман улс Украинд зэвсэг нийлүүлэх хязгаарлалтыг цуцалсанаар Киев Оросын нутаг дэвсгэрт алсын тусгалтай пуужингаар цохилт өгөх боломжтой болсон" гэж мэдэгджээ.

Мягмар гарагт Мерц мөн Киевт нийлүүлэх зэвсгийн хязгаарлалтыг цуцлах шийдвэрийг хэдэн сарын өмнө хэдийнэ гаргасан байснаа онцолсон аж.

ОХУ-ын Гадаад хэргийн яамны албан ёсны төлөөлөгч Мария Захарова өмнө нь мэдэгдэхдээ, Герман улсын Taurus пуужингаар Оросын объектууд руу цохилт өгвөл Москва "Берлин Киевийн талд байлдааны ажиллагаанд оролцож байна" гэж үзнэ хэмээн онцолжээ.

ОХУ "Украинд зэвсэг нийлүүлэх нь зөрчлийг энхийн замаар шийдвэрлэх үйл явцад саад учруулж, НАТО-гийн орнуудыг шууд оролцуулж байна" гэж үздэг.

ОХУ-ын Гадаад хэргийн сайд Сергей Лавров хэлэхдээ Украинд зэвсэг агуулсан аливаа ачааг ОХУ хууль ёсны бай гэж үзнэ хэмээн мэдэгджээ.

Кремль өмнө нь Барууны орнууд Украинд зэвсэг нийлүүлж, түүнийг “зэвсгээр шахаж буй” нь хэлэлцээ хийх үйл явцад дэм болохгүй, харин сөрөг үр дагаварт хүргэнэ" гэж мэдэгдсэн байна.

Эх сурвалж: RIA NOVOSTI
Б.ЖАРГАЛ