Казак түмний үндэсний баяр болох Наурызын баяр гуравдугаар сарын 22-ны өдөр тохиодог. Тус баярыг угтан Улаанбаатар дахь Баян-Өлгий аймгийн Залуучуудын холбоо Монголын залуучуудын холбоотой хамтран өнөөдөр /2019.03.20/ “Казах ёс заншлыг сурталчлах өдөрлөг”-ийг зохион байгууллаа. Тус өдөрлөгт зориулж Казах үндэсний гэрийг тусгайлан барьснаас гадна хүрэлцэн ирсэн зочид төлөөлөгчдийг Наурыз көже, идээ будаагаар дайлж, Казах ардын дуу, доомборын аялгууг сонирхуулжээ.

Казах түмэн жил болгоны гуравдугаар сарын 22-нд уг баярыг тэмдэглэн өнгөрүүлдэг. Наурызын баярыг нарны баяр, хаврын баяр гэж бэлгэшээдэг юм. Тиймээс хаврын эхний өдөр, шинийн нэгэн гэж тэмдэглэж ирсэн түүхэн уламжлалтай аж. Хавар болж, өдөр уртассанаар мал төллөж, цагаан идээ элбэг дэлбэг болж, шинэ ногоо цухуйж, амьтад ичээнээс гарч өдөр уртассанаар дэлхий дээрх амьд амьтан болгон эрч хүч авдаг гэж үздэг юм байна.

Дэлхий дахинд Ойрхи Дорнод, Балканы хойг, Төв Ази, Кавказ зэрэг газар нутгийн 300 сая гаруй хүн Наурыз баярыг өргөн тэмдэглэн өнгөрүүлдэг байна. 2010 оноос эхлэн Таджикистан, Азербайжан, Афганистан, Казахстан, Кыргызстан, Иран, Туркменистан, Турк зэрэг орны төлөөлөгчдийн өргөн барьсан хүсэлтийн дагуу НҮБ-ын Ерөнхий Ассамблейн 64 дэх хуралдааны үеэр Наурызыг Олон улсын баяр болгон баталжээ. Юнеско 2012 оны есдүгээр сарын 30-нд Наурыз баярыг Дэлхийн халдашгүй соёлын өвд бүртгэсэн байна.