Өчигдөр буюу энэ сарын 20-ны өдөр шадар сайд асан Ц.Оюунбаатар болон түүний хүү О.Тэмүүжин, Биеийн тамир спортын хорооны дарга Д.Жаргалсайхан нарт холбогдох авлигал хээл хахуулийн хэргийн шүүх хурал эхэлсэн. Улмаар өчигдөр оройн 21 цагт завсарлаж, өнөөдөр өглөө 11:00 цагт Сүхбаатар дүүргийн Эрүүгийн хэргийн анхан шатны шүүхэд үргэлжлэн хуралдсан билээ. Тэгвэл хурал дөнгөж сая дуусч, тус хэргийг мөрдөн байцаалтын шатанд буцаах шийдвэрийг шүүх бүрэлдэхүүн гаргажээ.

Хэргийг эргэн сануулбал, Монгол Улсын шадар сайдаар ажиллаж байсан Ц.Оюунбаатар нь албан тушаалын байдлаа урвуулан ашиглаж “Тэмээн поло тэмцээн”-ийг дэмжихэд 150 сая төгрөгийн эрх шилжүүлэх тушаалыг хэрэгжүүлэхийг тухайн үед Биеийн тамир спортын хөгжлийн төвийн захирлаар ажиллаж байсан Д.Жаргалсайханд даалгаж, улмаар А/325 дугаартай тушаал гаргуулан өөрийн төрсөн хүүхдийн “Монголын тэмээн поло спорт уралдаан аялалын холбоо” гэх төрийн бус байгууллагын дансаар 150,000,000 төгрөгийг авч Эрүүл мэндийн яаманд их хэмжээний хохирол учруулсан гэх хэрэгт Ц.Оюунбаатар, Д.Жаргалсайхан, хүү О.Тэмүүжин нарт хуулийн дагуу яллах дүгнэлт үйлдэн, хэргийн гэм буруугийн асуудлаар шүүж байгаа юм.