АТГ өнгөрсөн долоо хоногт 10 хэрэгт хэрэг бүртгэлтийн хэрэг нээж, таван хэргийг шүүхэд шилжүүлэх саналтайгаар прокурорт шилжүүллээ.

Үүн дотор өөрөө өөртэйгөө гэрээ байгуулан долоон сая төгрөгийн трактор авсан гэх байгууллагын дарга А, өөрийнхөө нэр дээр байдаг хоёр автомашиныг үеэл рүүгээ шилжүүлж улмаар тэндээс ТӨҮГ-таа тендергүйгээр авсан гэх гүйцэтгэх захирал С, ИТХ-ын төлөөлөгч бөгөөд төрийн байгууллагын даргаар ажилладаг нэг нөхрийн үүсгэн байгуулсан хувийн компани руу шууд худалдан авалтын гэрээ байгуулж 170 сая төгрөг шилжүүлсэн гэх орлогч дарга Г нарт холбогдох хэргүүд байгаа аж.

Түүнээс гадна дүүргийн харьяа болон харьяаллын бус насанд хүрээгүй хүүхдүүдийг цэцэрлэгтээ авахгүй гэж хясан боогдуулж эцэг, эхчүүдээс 800 мянгаас нэг сая хүртэлх төгрөгийн хахууль авсан гэх цэцэрлэгийн эрхлэгч А, төрийн өмчит компанид зарлагдсан тендерийг хууль бусаар явуулж бусдад давуу байдал олгосон гэх дэд захирал Э, байгууллагын сул орон тоон дээр төрсөн охиноо гэрээт ажилтнаар авч ажиллуулахдаа гурван жилийн турш сар бүр илүү цалин хөлс олгосон гэх нягтлан бодогч Б зэрэг албан тушаалтнуудад холбогдох хэргийг шүүхэд шилжүүлэх саналтайгаар прокурорт шилжүүллээ.