Шинэ Эрүүгийн хуулинд “ХӨӨН ХЭЛЭЛЦЭХ ХУГАЦАА”-тай холбоотой заалтыг өөрчилж гэмт хэрэгтнүүдэд ял завших боломжийг олгосон гэх хэрэгт унаад буй УИХ-ын гишүүн Ш.Раднаасэдэд хариуцлага тооцох ёстой юу гэдэг асуултыг УИХ-ын гишүүдээс асуулаа.

Тодруулбал, Ш.Раднаасэд нь байнгын хорооны даргын албан тушаалаа ашиглан Шинэ эрүүгийн хуулийн “ХӨӨН ХЭЛЭЛЦЭХ ХУГАЦАА”-г гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болсон өдрөөр дуусгавар болгох заалтыг оруулсан гэж буй. Жишээ хэлбэл, 2012 онд үйлдсэн гэмт хэргийг 2016 онд илрүүлээд 2018 онд шүүх хурал нь болоход хөөн хэлэлцэх 5 жилийн хугацаа өнгөрсөн байхаар өөрчилсөн гэсэн үг юм. 2017 онд Засгийн газраас өргөн барьсан шинэ Эрүүгийн хуулийн төсөлд “Хөөн хэлэлцэх хугацаа”-д ямар нэг өөрчлөлт оруулаагүй өргөн барьсан.

Гэтэл хуулийг хэлэлцэх явцад Ш.Раднаасэдийн толгойлдог УИХ-ын Хууль зүйн байнгын хорооны хурал дээр гэнэт Улсын дээд шүүхийн шүүгчээр “Хөөн хэлэлцэх хугацааг шүүхийн шийдвэр гартал болгон хойшлуулах” санал хэлүүлж, түүнийг нь гишүүдээр дэмжүүлсэн гэгдэж буй.

Ингэхдээ дэгийн хууль зөрчиж амаар санал гаргаад л баталчихсан байна. Гэтэл энэхүү заалт нь хоёр, гурван мэргэжлийн хяналтын байцаагчийг аврах арга байсан гэдэг нь саяхан ил боллоо. Албан тушаалтнуудад ял завших боломжийг олгосон ХӨӨН ХЭЛЭЛЦЭХТЭЙ холбоотой заалттай холбоотойгоор хэнээс хариуцлага нэхэх ёстой талаар УИХ-ын гишүүдийн байр суурийг сонслоо.

-УИХ-ын гишүүн, АН-ын зөвлөлийн дарга Д.Эрдэнэбат: БАЙНГЫН ХОРООН ДЭЭР ЯМАР ПРОЦЕСС БОЛСНЫГ СУДАЛЖ ҮЗЭХ ЁСТОЙ-

- Хэн нэгний захиалгаар хуулийг хийсэн бол хариуцлагын асуудал яригдана. Гэхдээ нотлогдвол шүү дээ. Хамгийн гол эх үүсвэр нь тухайн байнгын хорооноос эхлэлтэй. Тэгэхээр тэнд ямар процесс болсон бэ гэдгийг судалж үзэх ёстой. Хөөн хэлэлцэх хугацааны заалтыг шинээр оруулсан нь ял завших боломжийг бий болгосон байна гэж миний хувьд хэлж байгаа. Ялангуяа, авлига, албан тушаалын гэмт хэрэгт холбогдсон хүмүүст ял завших боломжийг олгож болохгүй Монголын төр. Ингээд байвал иргэдийн төрд итгэх итгэл үгүй болно.

-УИХ-ын гишүүн Ж.Батзандан: ХАРИУЦЛАГЫН АСУУДЛЫГ ЁС ЗҮЙН ДЭД ХОРООН ДЭЭР ХЭЛЭЛЦЭХ БОЛОМЖТОЙ-

-Ерөнхийлөгчийн зүгээс хөөн хэлэлцэхтэй холбоотой заалтыг өөрчлөх саналыг Хууль зүйн сайд руу хүргүүлсэн. Хууль зүйн сайдын зүгээс дээрх заалтыг өөрчлөх саналыг удахгүй оруулж ирэх байх гэж харж байна. Хоёр парламент дамжиж батлагдсан энэ хууль маш их алдаа завхралтай байгаа. Тиймээс засч, залруулах олон ажлыг яаралтай хийх ёстой. Хариуцлагын асуудлыг Ёс зүйн дэд хороон дээр ярих боломжтой. Эрүүгийн хариуцлагын асуудал багаа бол шүүх, цагдаа руу шилжүүлдэг.

-УИХ-ын гишүүн Ж.Эрдэнэбат: ХАМТЫН ШИЙДВЭР ДЭЭР ХЭН, НЭГЭН ХАРИУЦЛАГА ХҮЛЭЭХ ЁСГҮЙ-

-Энэ бол Хууль зүйн байнгын хорооноос гаргасан хамтын шийдвэр. Хамтын шийдвэр дээр хэн, нэгэн хүн хариуцлага хүлээх ёсгүй юм.

-УИХ-ын гишүүн Л.Болд: -ЭНЭ ХУУЛЬ ХҮЧИНГҮЙ БОЛОХ ЁСТОЙ-

- Энэ хуулийг яаралтай хүчингүй болгох ёстой. Ярьснаасаа өөр хууль баталсан. Тэгэхээр уг асуудлаар ганц Ш.Раднаасэд биш тодорхой хүмүүс хуулийн хариуцлага хүлээх ёстой. Хууль зүйн байнгын хороо, УИХ-ын чуулганаар хэлэлцсэн учраас хариуцлага яригдах ёстой. Хамгийн гол нь, цаана нь хуулийн хулгай явагдаж байна. Эрүүгийн хэрэг нээгээд энэ хуулийг шивсэн, шургуулсан зэргийг тодорхой болгох ёстой.

-УИХ-ын гишүүн О.Баасанхүү: ТУХАЙН ҮЕД НЬ БИ ЭСЭРГҮҮЦСЭН Ч ХҮЧ ХҮРЭЭГҮЙ-

- Эрүүгийн шинэ хуулиар хуулийн байгууллагаар шалгаж байгаа хугацааг нь хөөн хэлэлцэх хугацаанд оруулчихсан. Өөрөөр хэлбэл, шүүхээр шийдэгдэх хүртэл хөөн хэлэлцэх хугацааг тоолно гээд өөрчилчихсөн. Маш олон хэргийн шүүх хурал хойшлогдож буцаагддаг. Шүүх хурал нь гурван удаа, таван удаа, 10 удаа ч хүртэл буцсан тохиолдол байдаг. Ингэж шүүх хурал хойшлогдох бүртээ хөөн хэлэлцэх хугацаанд тоологдож байгаа гэсэн үг. Хоёрдугаарт, анхан шатны шүүхийн шийдвэр эцсийнх биш, давж заалдах гээд цааш үргэлжилнэ. Энэ хооронд хагас жилийн хугацаа өнгөрнө. Мөн л хөөн хэлэлцэх хугацаанд тоологдоно. Би тухайн үед эсэргүүцсэн ч бүлэггүй хүн чинь яалтай билээ. Тухайн үед энэ өөрчлөлтийг хийх үед “Хөөн хэлэлцэх хугацааг бүрмөсөн байхгүй болгох нь, би эсэргүүцээд ганцаараа хэцүү байна.