Өнгөрсөн даваа гаригт АТГ-аас авлигад авсан мөнгөө өрөөндөө, оймсондоо нуусан дарга нарын бичлэг буюу нотлох баримтыг прокурорын байгууллагын зөвшөөрөлтэйгээр олон нийтэд цацаж шуугиан тариад буй. Эл бичлэгт бидний итгэж найдаж, төрийн албаа даатгаж яваа АТҮТ,МХЕГ-ын хэлстийн дарга нарын өрөөнөөс АТГ-ынхан авлигад авсан мөнгийг нь хураан авч буй нь бичигдсэн байв.

Тодруулбал АТҮГ-ийн Тээвэр зохицуулалтын хэлтсийн дарга Д.Батбаярын өрөөнөөс 25 сая төгрөг хураан авсан бөгөөд тэрбээр “Эрдэнэс тээвэр” ХХК-иас нийт 57,5 сая төгрөг хахуульд авсан нь нотлогдож шүүхээс нийтийн албанд томилох эрхийг гурван жилийн хугацаагаар хасч, 6500 нэгжтэй тэнцэх хэмжээний буюу 6,5 сая төгрөгийн торгох ялаар шийтгэж, хууль бус орлого болох 62,5 сая төгрөгийг улсын орлого болгох шийдвэр гаргасан юм.

Мөн Мэргэжлийн хяналтын ерөнхий газрын Экспорт, Импорт, Хилийн хорио цээрийн хяналтын газрын хэлтсийн дарга Н.Баярсайханы оймсноос 10000 доллар, сейф дүүрэн мөнгө, бие болоод гэрээс нь 230.800.000 төгрөг, 152.177 ам.доллар, 70.000 юань бэлнээр олдсоныг эд мөрийн баримтаар хураасан байдаг. Улмаар түүнийг нийтийн албанд томилогдох эрхийг таван жилийн хугацаагаар хасч, 40 мянган нэгжтэй тэнцэх хэмжээний буюу 40-хөн сая төгрөгөөр торгох ялаар шийтгэсэн шүүхийн шийдвэр гарсан.

Эл шударга бус байдал, шүүхийн шийдвэрийн талаар иргэд ийн байр сууриа илэрхийлж байна.