Цахим ертөнц гэдэг хэт цахихын хооронд гэрлийн хурдаар мэдээллийг түгээдэг орчин. Амаа олигтойхон ангайгаад “Аа” хэмээн гүйцэд хашгирч амжаагүй байхад тэнгэрийн гялбаа шиг гялсхийгээд тэртээд мэдээлэл хүрч байх жишээтэй. Тиймдээ ч сайн муу мэдээ, сайхан муухай үйлдэл бүхэн сошиал ертөнцөөр тэр дороо түгэн тархаж, хүмүүс бидэн хүссэн хүсээгүй мэдээллийн хүчирхийлэл дор амьдарсаар удлаа. Яагаад ингэж хэлэх болов гэхээр ойрмогхон цахим ертөнцөөс нэгэн мэдээллийг олж уншсан юм. Нүүр номдоо нэгэн хүн “Туршилтын ард түмэн” гэсэн гарчигтай бичвэр үлдээсэн байлаа. Түүнийг нь сонирхож уншаад сэтгүүлчийн хувьд үнэн болов уу гэж эргэлзэхийн зэрэгцээ эмзэглэл төрснөө нуухгүй. Тэгээд нэг эх сурвалж юм даа гээд аваад хадгалчихсан юм. Тэнд ингэж бичсэн байсан. “Нэгэн анагаах ухааны докторын хэлсэнг оруулья. Нэр усыг нь хэлвээс ажлаасаа халагдах тул нуусан болно. Тэр эх орноо гэж сэтгэл нь бачуурч явдаг нэгэн.

Гадны эм үйлдвэрлэгч компаниуд зөвхөн манай улсад ( Өөр ямар ч улсад бус ) ядуу буурай бөгөөд хүн ам цөөнтэй, Төр нь авлигад идэгдсэн болон эм ба эрүүл мэндийн талаар ямар ч ойлголтгүйгээр нь далимдуулж шинэ бүтээсэн эмийнхээ туршилтыг явуулдаг гэнэ. Зах зээлд нийлүүлж борлуулаагүй шинэ эмийн гаж нөлөө, хоруу чанар, цээрлэлтийг тодорхой болгохын тулд биднийг нууцаар амьд туршилт болгодог юм байна.

Өмнө нь Монголд жирэмслэлтээс хамгаалах эмийг эмэгтэйчүүдэд тараан таваас дээш жил тасралтгүй хэрэглүүлсний дараа эмэгтэйчүүдийн савны хорт хавдрын тоо улсдаа дөрөвдүгээр байр, дэлхий дахинаа нийт эмэгтэйчүүдийн хорт хавдрын шалтгаантай нас баралтын хоёрдугаар байрыг эзэлж байна. Саяхан зөвхөн Дархан хотод (бусад аймгуудаар биш) умайн хүзүүний хавдрын эсрэг вакцинжуулах аян явагдсан. Тэнд хэсэгчилсэн туршилт хийгээд юу гэдэг ямар нөлөөтэй бодис тарьсан нь тодорхойгүй. Энэ бол туршилт гэдэг нь зөвхөн нэг аймаг онцлосноос нь тодорхой харагдаж байна. Хэрвээ баталгаат вакцин байсан бол улс орон даяар явуулах байсан.

Өөр нэгэн жишээ бол Монгол 10 хүн тутмын долоо нь ходоодны хеликобактертай байна. Үүнийг судлаж үзвээс Ази болон Европ дахь хүмүүсийн хелекобактериас огт өөр генийн бүтэцтэй байсан байна. Үүнийг гадны эрдэмтэд Монгол хеликобактери гээд нэрлэчихсэн байдаг ажээ. Эмчлэхийн тулд нөгөө Азид эсвэл Европд үйлдвэрлэсэн эмийг зогсоо зайгүй уусаар. Гэтэл энэ нь ямар ч үр дүнгүй бөгөөд ард иргэдийн цаг зав, эдийн засгаар тоглосоор л байна.

Монголын анагаахын салбар дэлхийн жишгээс бүтэн 50 жилээр хоцорч явна. Гадны орнуудад үүдэл эсээс тухайн өвчтөний өвчилсөн эрхтэнг лабораторийн орчинд ургуулан суулгаж байхад өнөөдөр Монгол улсад гэхэд гурван сартай жирэмсэн эх эмчийн хяналтанд орох гэж очоод эмч нарын буруу оношлосноос болж өрөөсөн бөөрөө урагтайгаа алдсан аймшигтай хэрэг гарч хэсэгхэн шуугиад л өнгөрсөн...

Үүний хариуцлагыг авилгачид хүлээдэггүй. Тэд ард иргэдийг анхаарах хүсэл ч үгүй. Хүний амь ингэтлээ үнэгүйдсэн нийгэмд амьд явах баталгаа бидэнд үнэндээ алга” гэж ярив.

Энэ яриаг чадан ядан буулгаж аваад би вээр түмэн олон минь өөрсдийнхөө амь, бусдынхаа амины төлөө энэ докторын яриаг цаашид түгээж хайртай бүхнийгээ мэдэхгүй эмийн туршилтанд орохоос сэргийлэн хамгаална уу хэмээхээс өөр хэлэх үг олдохгүй нь дээ” гэсэн байсан юм.

Энэ үнэн бол үнэхээр аймшигтай. Хэрвээ олны анхаарлыг татах гэсэн нийгмийн сүлжэээний ээлжит нэгэн сенсаац бол анхаарал татаж чадлаа л гэж дотроо бодож байв. Гэхдээ “Олны үг ортой” гэдэг дээ гэх бодол сэтгэлийн мухарт хадгалагдсаар. Мөн өнөө цагийн хэллэг болох “Наргианы наян хувь, тоглоомын тавин хувь үнэн байдаг” гэдэг үг санаанаас гарч өгдөггүй. Гэтэл яасан гээч.

УИХ-ын гишүүн Ж.Батзандан: 8000 орчим хүүхэд дээр хууль бус эмийн туршилт хийжээ

Ийм мэдэгдлийг ШИНЭН-ын дарга, УИХ-ын гишүүн Ж.Батзандан өнгөрсөн даваа гаригт хийх нь тэр. Даваа гаригт Төрийн ордноо намуудын бүлгийн хуралдаантай байдаг ч, энэ удаа МАН, АН-ын бүлэг хуралдсангүй. Харин ШИНЭН-ын зөвлөл хуралдаж, Завхан аймгийн Дөрвөлжин сумын Баян-Айрагт цианид натри алдагдсан тухай болон монгол хүүхдүүд дээр эмийн туршилт явуулсан асуудлыг хөндөн хэлэлцсэн. Энэ үеэр Ж.Батзандан “Монголын 8000 хүүхэд дээр 2016, 2017 онд хууль бус эмийн туршилт хийсэн гэсэн мэдээлэл бидэнд ирсэн. Туршилтын улмаас олон зуун хүүхдийн эрүүл мэндэд сөрөг үр дагавар гарсан гэдгийг эцэг эхчүүд мэдээлж байна. Гадаад улс орнуудад бүртгэлгүй эм, вакциныг Монголын хүүхдүүд дээр туршсан асуудалд бид онцгой анхаарал хандуулна. Энэ асуудалтай холбогдуулан ирэх оны нэгдүгээр сард багтааж, УИХ-ын төвшинд нийтийн сонсгол зохион байгуулахаар төлөвлөөд байна. Мөн Эрүүл мэндийн сайдад хандаж асуулга тавих шийдвэр гаргалаа. Эмийн туршилтад орж эрүүл мэндээрээ хохирсон хүүхдүүдийн мэдээллийг бид байнга авч байгаа. Хүний эрхийн комиссоос зөвшөөрөгдөөгүй эмийг хүн дээр туршина гэдэг бол олон улсын тавцанд эрүү шүүлттэй адилхан үзэгддэг гэсэн дүгнэлт гаргасан байдаг. Цагдаагийн байгууллагаас шалгаж байсан хэргийн материалуудтай албан ёсоор танилцах ёстой. Тухайн үед Прокурорын байгууллагаас хэргийг үндэслэлгүйгээр хаасан байна. Үүнийг бид анхаарч ажиллана. Эмийн туршилт бол хүний эрх зөрчсөн үйлдэл. Албан бус мэдээгээр 10 мянга орчим хүүхэд ч туршилтад орсон байх магадлалтай” хэмээн мэдэгдсэн.

Төрийн түшээгийн амнаас ийм үг унаж байна. Миний хувьд үүнийг албаны эх сурвалжийн нэг гэж харж байна. ШИНЭН-ын дарга албаны мэдээлэл хийсэн. Энэ асуудлаар яаралтай нийтийн сонсгол явуулна гэдгээ хэлсэн. Тэгэхээр энэ юу гэсэн үг вэ. Дээрх “Туршилтын ард түмэн” гэдэг гарчигтай бичвэр үнэн гэсэн үг, бид туршилтын ард түмэн болсон гэсэн үг. Ирээдүй болсон үр хүүхдүүд маань амь нас, эрүүл мэндээрээ дэнчин тавьж эмийн туршилтын бай болжээ. Маш аймшигтай байна.

Эцэг эхчүүд биднийг утга учиргүй улс төржиж, Сонгуулийн хуулиар амьсгалж, хэдхэн сарын дараа нэгхэн өдөр болоод өнгөрөх саналын төлөө өнөө боож үхэхдээ тулж байх хооронд үр удмын чинь талаар ийм аймшигт мэдээллийг дэлгэлээ. Үртэй болгоны амиа өгтөл тэмцэх асуудал чинь энэ байна.

Дөрвөн жилийн давтамжтай сонгуулийн цикл ярьж хийрхэж байхын оронд эмийн туршилтад орсон Монголын ирээдүй эрүүл мэндээрээ хэрхэн хохирсныг, ирээдүйд ямар уршигтай болохыг, удам угсаа маань тасрах эсэхийг хэлээд аль.