Иргэдийн 650 сая орчим төгрөгөөр үнэлэх олон тооны адуу хулгайлан нядалж зарсан А, С нарын 14 холбогдогчтой бүлэг этгээдийг Төв аймаг дахь цагдаагийн газраас олж тогтоон мөрдөн шалгаж байгаа тухай ЦЕГ-ын Хэвлэл, мэдээллийн төв өнөөдөр мэдээлэв. Тэдгээр этгээдүүд Төв аймгийн Алтанбулаг, Аргалант, Баянцогт, Нийслэлийн Сонгинохайрхан дүүргийн 32-р хороо “Партизан”, Хан-Уул дүүргийн “Чингисийн хүрээ”, “Жаргалантын ам” зэрэг газраас ноднин 10-12 дугаар сар хүртэл нийт 10 удаагийн үйлдлээр бусдын 112 адууг бэлчээрээс нь тууж Сонгинохайрхан дүүргийн нутагт нядалж, зарж борлуулсан байна. Дээрх гэмт хэрэгтнүүд өмнө нь малын хулгайн хэргээр ял эдэлж байсан, зохион байгуулалттай ажилладаг нь тогтоогджээ. Энэ талаар Төв аймгийн Цагдаагийн газраас дараах тайлбарыг хүргүүлэв.

“2020 он гарсаар урьд өмнө мал хулгайлах гэмт хэрэг үйлдээд ял шийтгэл авсан хүмүүс дахин энэ төрлийн гэмт хэрэг үйлдсэн байна. Архангай, Завхан, Төв аймгийн болон Улаанбаатар хотын харьяат нэр бүхий 14 этгээд өөрсдийн хамаатан садны хүрээний 4-5 хүнийг мал хулгайлах гэмт хэрэгт татан оролцуулж энэ төрлийн гэмт хэрэг үйлдсэн. Өчигдөр буюу нэгдүгээр сарын 15-ны өдөр эдгээр сэжигтэй этгээдүүдийг дайчлан баривчилсан. Шалгалтын явцад гэмт этгээдүүд 2019 оны аравдугаар сараас 2019 арванхоёрдугаар сарын 31-ны хооронд иргэдийн нийт 112 тооны адууг өөрийн эзэмшил мэт нядалж, борлуулсан байна. Гэмт этгээдүүдийг насны хувьд авч үзвэл 17-42 насны иргэд байна” гэлээ.