Улсын онцгой комисс хаалттай хуралдаж дууслаа. Хуралдааны дараа ОБЕГ-ын дарга Т.Бадрал сэтгүүлчдэд мэдээлэл өглөө.

Тэрээр, “Улсын онцгой комиссын ээлжит бус хуралдаан дууслаа. Нөхцөл байдал нэлээд ярвигтай болж байна. Шинэ коронавирусын тархалт хоногоор өсөж байна. Халдвар авсан хүний тоо мянга, мянгаар өсөж байна. Хоногт 60 гаруй хүн нас барж байна. Олон улсад уг өвчний дэгдэлт оргил үе рүүгээ дөхөж байна гэсэн хандлага байх шиг байна. Үүнтэй уялдуулан өнөөдрийн хуралдааныг зохион байгууллаа. Дээрээс нь БНХАУ-ын бас нэгэн мужид H5N1 шувууны томуугын өвчин гарсан байгаа. Энэ хоёр асуудлыг давхар шийдэхээс өөр аргагүй болж байна. Хятад улсын халдварын голомт болсон бүс нутагтай хиллэж байгаа улсуудад өвчний шинж тэмдэг илэрсэн тохиолдол нэмэгдэж байна. Яах аргагүй хил залгаа гэдэг утгаараа Монгол Улс тодорхой арга хэмжээ авч, шинэ төлөвлөгөө гаргах шаардлагатай болж байна. Хэд хэдэн шийдвэр гарсан. Үүнд:

1. Шувуу, томууны ханиадтай холбогдуулан тахианы мах болон энэ төрлийн бүтээгдэхүүнийг хэрэглэхийг хориглох.
2. Хилийн ихэнх боомтууд хаагдсан. Замын-Үүд, Шивээ-Хүрэн, Гашуун сухайт, Буянт-Ухаа гэсэн дөрвөн боомт маш хүндрэлтэй байгаа. Гадаадад байгаа монголчуудын эх орондоо ирэх хүсэлт нэмэгдэж байна. Хилийн боомтуудын халдвар, хамгааллын асуудал ярвигтай болж эхэлж байна. Эдгээр боомтууд дээр Онцгой комиссын ажлын хэсэг ажиллуулна. Хилийн боомтууд дээр халдвар хамгаалал ямар байгааг шалгаж, газар дээр нь заавар зөвөлгөө өгөх ажлын хэсэг маргааш нисдэг тэргээр салбар, салбарын төлөөллүүдтэй хамт явах гэж байна.
3. Шинэ төрлийн коронавирустэй холбогдуулж салбар дундын шинэ төлөвлөгөөг батлахаар хэлэлцлээ. Маргааш өглөө гэхэд Улсын онцгой комисс дахин хуралдаж, Засгийн газарт танилцуулна.
4. Дэлхий нийтийн жишигт тусгаарласан нэг эмнэлгийг гаргах нь зүйтэй гэж үзэж байгаа. ЭМЯ ямар эмнэлгийг тусгаарлаж, зөвхөн шинэ вирустэй холбоотой эмчилгээг хийх вэ гэдэг талаар судлана. Үүний дараа шийдвэр гарна. Шийдвэр гарсны дараа нэг эмнэлгийг тусгаарлаж, өвчилсөн болон сэжигтэй тохиолдлыг хүлээж авна.
5. Хил дээр ирж байгаа иргэдийг тэнд нь тусгаарлах асуудал яригдана. Одоогоор шинжилгээ үзэлгээг нь хийгээд оруулж байгаа. Цаашид энэ асуудлыг хил дээр хязгаарлах нарийвчилсан асуудал яригдаж эхлээд байна” гэв