• Хүний эрүүл мэндэд хөнгөн хүндэвтэр хохирол учруулах гэмт хэрэг хамгийн их буюу 190 хэрэг буюу 64.1 хувь, 234 хүн буюу 63.9 хувь
• Хулгайлах таван хэргийн таван хүн
• Хахууль авах хоёр хэргийн гурван хүн
• Үндэслэлгүйгээр хөрөнгөжих хоёр хэргийн хоёр хүн
• Эрх мэдэл, албан тушаалын байдлаа урвуулан ашиглах хоёр хэргийн хоёр хүн тус тус хөөн хэлэлцэх хугацаа өнгөрсөн үндэслэлээр эрүүгийн хариуцлагаас чөлөөлөгджээ.

Ч.Батцэрэн “Шүүхээс гэмт хэргийн хөөн хэлэлцэх хугацаа өнгөрсөн үндэслэлээр хэрэгсэхгүй болгож шийдвэрлэсэн хэргүүдийг судалж үзэхэд нэг талаас гэмт хэргийн хугацаа дуусах дөхсөн үед зарим тохиолдолд хөөн хэлэлцэх хугацаа дууссаны дараа хэргийг шүүхэд шилжүүлэх тохиолдлууд гарсан. Мөн хэргийн оролцогчид шүүх хуралдааныг удаа дараа хойшлуулдаг, үндэслэлтэй, үндэслэлгүйгээр завж заалдах гомдол гаргадаг ийм байдлаар хугацаа хожих явдал түгээмэл байна. Тухайлбал, нэг жил хорих ял оногдуулахаар заасан гэмт хэрэгт хөөн хэлэлцэх хугацааг нэг жилээр тогтоосон. Найман жил хүртэлх хорих ял оногдуулахаар заасан гэмт хэрэгт хөөн хэлэлцэх хугацааг таван жилээр тогтоосон.

Иймд гэмт хэргийн хөөн хэлэлцэх хугацааг гэмт хэрэг үйлдсэн өдрөөс хойш эхлэн эрүүгийн хууль үүсгэж яллагдагчаар татах хүртэл тоолох журмыг сэргээн хуульчлахыг зарчмын хувьд дэмжиж байна. Үүнээс гадна Эрүүгийн тухай хуульд заасан гэмт хэргийн төрөлд тухайн гэмт хэрэгт оногдуулах ялын хэмжээг харгалзан энгийн болон хүндрүүлэх бүрэлдэхүүнтэй гэмт хэргүүдэд хөөн хэлэлцэх хугацааг ялгамжтай тогтоох, зарим төрлийн гэмт хэргүүдэд хөөн хэлэлцэх хугацааг нэмэгдүүлэх, энэ талаар бусад улсын Эрүүгийн тухай хуульд заасан зохицуулалтуудыг харьцуулан судлах Монгол Улсын өнөөгийн нөхцөлд тохирсон хөөн хэлэлцэх хугацааг тоолох журмыг цаг алдахгүй шинэчлэн тогтоох шаардлагатай” гэж байсан.

Ерөнхий сайд асан Н.Алтанхуягийн хүргэн, ЗГХЭГ-ын дэд дарга асан Г.Дэнзэн, ЭТТ ХК-ийн захирал асан Я.Батсуурь нарын таван хүнд холбогдох хэрэг дээрх байдлаар хуулийн хариуцлагаас мултарч үлдэж байв. Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхээс Г.Дэнзэнг таван жил нэг сарын хугацаагаар хорих ялаар, Я.Батсуурьт таван жил нэг сарын хугацаагаар хорих ялыг тус тус олгосон. Гэвч эдгээр нэмэгдэл болон үндсэн ялыг өршөөл үзүүлэх тухай хуулийн 4 дүгээр зүйлийн 4.1-д зааснаар өршөөн хэлтрүүлж байсан.

Хууль завших явдал одоо бүүр цагаандаа гарч эх орноосоо дүрвэн цагаачлах, оргон зайлах үзэгдэл ч газар авч байна. Үүний зөвхөн нэг жишээ бол Ерөнхий сайд асан Ч.Сайханбилэг АНУ-д очоод бүгсэн явдал. Тэрээр одоо хилийн чинадаас Монгол Улстай шүүхдэлцэнэ гээд гадаадын өндөр өртөг бүхий хуулийн фирм хөлсөлчихөөд сууж байна. Монгол Улсын иргэн ямар нэгэн гэмт үйлдэл үйлдсэн л бол хуулийн дагуу хариуцлага тооцохгүй бол манай улс саарал жагсаалтаас гарна гэдэг үнэхээр бүтэхгүй зүйл болно. Олон улсын экспертүүд Монголын хууль шүүхийнхний авилгач, арчаагүй байдлыг анзаарч л суугаа нь гарцаагүй юм. Тиймээс хуулиа л чандлан мөрдөхөөс аргагүй байдал амьдралын эрхээр үүсэн гарч ирж байна даа.