Коронавирусын тархалт дэлхийг нөмөрч, ЮНЕСКО-ийн гишүүн 192 орон хичээл сургалтын үйл ажиллагаагаа бүрэн зогсоосон байна. Хэсэгчлэн хаасан орнуудад 140 сая хүүхэд буюу нийт дэлхийн хэмжээнд нэг тэрбум гаруй хүүхэд хөл хорионд ороод байгаа яг энэ үед манай улсын хувийн сургуулиуд сургалтын төлбөрөө нэхэж эцэг эхчүүдийг давхар дарамтад оруулаад байгаа. Чухам энэ асуудлаар өчигдөр салбар хариуцсан сайд нь ийн мэдэгдсэн.

БСШУС-ын сайд Ё.Баатарбилэг “Улсын хэмжээнд 158 ЕБС байгаа. Хувийн төлбөртэй. Эд нарыг бид нар бүгдийг нь судалсан. Нэгдүгээрт, энэ хичээлийн жил дуустал хичээл сургалт, теле хичээлийнхээ хажуугаар хувийн төлбөртэй сургуулиуд нэмэлт хичээлүүдээ явуулж байгаа гэдгийгээ бид нарт хэлсэн. Хоёрдугаарт, эцэг эхчүүдтэй байгуулсан гэрээ байгаа. Сургууль цэцэрлэгүүд эцэг эхчүүдтэй байгуулсан гэрээнийхээ хүрээнд сургууль цэцэрлэгүүд эцэг эхчүүдтэй төлбөрийнхөө асуудлаар одоо ярилцаж, гэрээгээ дүгнэж ажиллах нь зүйтэй. Үндсэндээ бол ихэнх их дээд сургууль болон сургууль цэцэрлэгүүд төлбөрөө бүрэн авсан сургууль цэцэрлэгүүд цөөхөн байна. Хоёрдугаарт, маш өндөр төлбөртэй зарим сургуулиуд эцэг эхчүүдийнхээ дунд санал асуулгууд ид явуулж байгаа юм байна. Төлбөрийн тодорхой хэмжээний хөнгөлөлт үзүүлэх асуудлыг эцэг эхчүүдийнхээ зөвлөлтэй яриад санал асуулгууд явуулж байгаа юм байна.

Яамны барьж байгаа байр суурь бол нэгэнт одоо хичээл сургалтынхаа үйл ажиллагааг явуулж байгаа гэж үзэж байгаа бол тэр эцэг эхчүүдтэйгээ, эцэг эхийнхээ зөвлөлтэй ярьж, сургууль, эцэг эхчүүдийн хоорондын гэрээгээрээ энэ асуудлаа зохицуулаад явах нь зүйтэй гэдэг ийм байр суурьтай байгаа” гэсэн юм.

Өөрөөр хэлбэл, хувийн төлбөртэй сургуулиудын сургалтын төлбөрийн асуудлыг яам хариуцахгүй гэдгээ зарлачихсан хэрэг.

Дэлхий нийтийг айдаст автуулаад байгаа коронавирус буюу цар тахал гарсан хүнд үед хичээл ороогүй сургуулиудаа бодлогоор чиглүүлж чадаагүй байж, хувийн сургуулиудын төлбөр нэхэгдэж, эцэг эхчүүдийг давхар дарамтад оруулаад байхад ард иргэдийнхээ талд бус, төлбөр нэхэж буй хувийн сургуульд тал зассан байр суурь илэрхийлж, ёстой нөгөө “Хэн хэний чинь зөв, хэрүүлээ зодоон болго” гэдэг шиг бөөрөнхий шийдвэр гаргаж байгаа нь салбар хариуцсан сайдын хувьд тун харамсалтай.

Эцэг эхчүүд эдийн засгийн хямралд орж, орлогогүй байгаа энэ үед” Та нар өөрсдөө учраа ол” гэсэн байр суурь илэрхийлж буй төрийн сайд Ё.Баатарбилэгт Ерөнхий сайд У.Хүрэлсүхийн шийдэмгий байдал алга.

Хоёрхон улирал хичээллэсэн ЕБС-ийн хичээл оролгүйгээр ирэх есдүгээр сарын 1-тэй золгох шийдвэрийг Төр, засгаас гаргачихаад байхад хаалгаа хэдийн барьсан хувийн сургуулиуд төлбөр нэхсээр байна. Мэдээж, хувийн сургууль болохоор өндөр төлбөртэй. Тэд 4,5-10 сая төгрөгийн төлбөрийг нэхэж байгаа юм. Хичээл хэвийн явагдаж байсан бол эцэг эхчүүд төлөх ёстой гэдэг ухамсар хариуцлагаараа төлбөрийг нь төлж л таарна. Харин сургуульдаа суралгүй гэртээ карантинд байгаа тохиолдолд төлбөр төлөх ёсгүй. Аливаа үйлчилгээг аваагүй байж төлбөр хийдэггүй биз дээ. Жишээлбэл, та талх авсныхаа төлөө мөнгө төлдөг болохоос биш, талх нь ирээгүй байхад угаасаа авдаг юм чинь гэж мөнгө төлдөггүй шүү дээ. Түүн шиг нэг ч цагийн хичээл ороогүй байж, юуны төлбөр нэхээд байгаа хэрэг вэ. Үнэн хэрэгтээ энэ хичээлийн жилийн сургалтын нийт төлбөрийн 1/3-ийг өгөх хэмжээний дүр зураг л харагдаж байхад бүтэн жилийн төлбөр нэхэж байгаа нь ичгэвтэр үйлдэл. Хэдийгээр хоёр идэхгүй хоосон хонохгүй амьдралтай ч хүүхдийнхээ ирээдүйн төлөө зүтгэж, сайн боловсрол эзэмшүүлэхийн төлөө мэрийж, хоёр нарны хооронд хөдөлмөрлөж яваа эцэг эхчүүд олон бий. Тэд үлдэх үр хойчийнхоо төлөө байдгаа барьж, хувийн сургуульд төлбөр өндөртэй ч түүнтэй нь эвлэрээд явж байгаа. Тэдний ихэнх нь хувиараа хөдөлмөр эрхлэгчид. Гэтэл дэлхийг хямруулсан энэ цар тахлын үед урьдчилан сэргийлэх арга хэмжээ авч, хөл хорио тогтоосноор ихэнх нь ажил орлогогүй болоод гэртээ сууж байна. Тийм байхад хувийн сургуулиуд бүтэн төлбөр нэхэхээс ичих хэрэгтэй.

Ийм асуудлыг зохицуулах оновчтой шийдвэр гаргаж чадахгүй бөөрөнхийлж суугаа салбар хариуцсан сайд Ё.Баатарбилэг та ч бас ичих хэрэгтэй.