2016-2020 онд бүрэн эрх нь хэрэгжиж буй Парламент хөшгөө хааж байгаатай холбогдуулан танхимын гишүүдийнх нь нэрийг цагаан толгойн үсгээр дарааллуулан мэдээ.мн “асууж” буй.

Өнгөрөгч сонгуулийн “төр”-ийн мэдлэг “борогдуухан”, авир төрхөөр “оригдуухан” гишүүн Н.Амарзаяа. Эгэл малчнаас төрийн ордонд тухлан байгаа тэрээр УИХ-ын сонгуулийн 22 дугаар тойргоос сонгогдсон. Хожмоо сөрсөн үгтэй сонгогчидоо “загналаа, даварлаа, гуйгаагүй шүү” гэхчилэн хээв нэг загинах түүнийг Өмнөговь аймаг төр түшүүлэхээр илгээж байв.

Онцлох үйл явдлууд:

Хүлгийн жолоог нийслэл рүү

Н.Амарзаяа нь УИХ-ын 2016 оны сонгуулиар Өмнөговь аймгаас сонгогдсон. Түүний хувьд аймагтаа оршин суудаг байсан. Иймээс нийслэлд оршин суух байр орон сууцны дэмжлэгийг парламент үзүүлж УИХ-аас 50 сая төгрөг өгсөн. Харин Н.Амарзаяа гишүүн нийслэлдээ нэлээд өндөр зэрэглэлд тооцогдох "Хурд" группын "Хүннү" хороололд байр авчээ. Энэ хорооллын байр хамгийн багадаа 300 сая төгрөг. Нэг үгээр хэлбэл УИХ-аас өгсөн 50 сая төгрөг энэ байрны 30 хувьд нь ч хүрэхгүй. Гэхдээ Н.Амарзаяа гишүүн "Хүннү" хороололд байр авч чадсан нь олны ахаарлыг одоо ч татсан хэвээр байгаа.

Бүдүүлэг улс төрчдийн буухиаг Н.Амарзаяа гишүүн үргэлжлүүлэв

УИХ-ын өргөдлийн байнгын хорооны хурлаар агаарын бохирдлын талаар хэлэлцэх үеэр УИХ-ын гишүүн Н.Амарзаяа төрийн ширээний ард, албан хурал хэлэлцүүлгийн үеэр бохь зажлангаа, хээв нэг гараа зөрүүлэн сууж буй нь олны эгдүүцлийг хүргэв. Угтаа бол төрийн байтугай хувийн нэг жижиг байгууллагын хурлын ширээний ард ч бохь зажлах нь бүдүүлэг соёлгүй хэрэг. Төрийн ордонд ч бохь зажлахыг хамгаалалтын албанаас хориглодог. Гэвч Н.Амарзаяа гишүүн ийнхүү төрийн ёс журмыг хүндэтгээгүй тул олон нийтээс хатуухан шүүмжлэл хүртэж байлаа.

Амны алдаа

Тэрбээр Гурвантэс сумын Гоёот багийн өндөр настан, энэ жил 100 насыг зооглож буй Т.Осоржин гуайтай уулзжээ. Энэ тухайгаа цахим хуудаснаа бичихдээ азай бууралтай уулзаж, алтан сургаалаа хайрласан гэх утгын алдаа гаргасан нь бас л баалуулах шалтгаан болов. Энэ мэт хэнэггүй зан, бодлогогүй үйлдлээрээ болчимгүй алдаа гаргачихдаг гишүүн маань хэзээ нэг бүрэн гүйцэт “боловсрох” юм бол доо. "Буурлаас үг сонс" гэх ардын сайхан үг бий дээ. Харин эрхэм гишүүн хатагтай ч эсрэгээр азай буурлуудад алтан сургаалиа хайрлаж яваа бололтой.

ЖДҮ-чин гишүүн

ЖДҮ-чдийн түүний нэр цохиж яваа. Түүний 200 сая төгрөгийн зээл авсан “Хатан хармаг” компани нь хармаг жимсээр төрөл бүрийн цай, жимсний өтгөрүүлсэн жүүс зэрэг бүтээгдэхүүн үйлдвэрлэдэг, уг нь монголдоо говийн хармаг жимсээр бүтээгдэхүүн үйлдвэрлэж байгаа анхдагч компани гэдэг. Мөн тэрбээр “Ханын энгэр” хоршоондоо 132 сая төгрөгийн зээл авсан байдаг. Сонгогдсон иргэдийнхээ боломжийг албан тушаалаа ашиглан боомилж нийтдээ 332 сая төгрөгийн зээлийг ЖДҮХС-гаас аваад байгаа түүнтэй холбоотой олон таагүй мэдээлэл бий.

БИ НУТГААСАА УИХ-Д ДАХИН НЭР ДЭВШИНЭ

Өмнөговь аймгаас УИХ-д сонгогдон, төр түшилцэхдээ цөөнгүй удаа сонгогчдоо бухимдуулсан басхүү эгдүүцүүлсэн гишүүн Н.Амарзаяа. Чуулганы хуралдаан дээр хээвнэг бохь зажлан сууж, тойргийнхонтойгоо уулзахдаа “Ирэх бүрт өөдөөс загнаад байх юм. Баярлалаа, талархлаа гэж хэлсэн үү. Та нараар ажлаа дүгнэх болоогүй. Битгий давраад байгаарай. Би та нарыг гуйж сонгогдоогүй шүү” хэмээн бааварлаж суудаг нэгэн . Түүнийг 2020 оны УИХ-ын сонгуульд өрсөлдөхгүй, Өмнөговь аймгаас УИХ-ын гишүүн Л.Энхболд, МСНЭ-ийн ерөнхийлөгч Х.Мандахбаяр нар нэр дэвших сураг гараад буй. Энэ талаар Н.Амарзаяа гишүүнээс тодруулахад “Энэ жил УИХ-д өөрийгөө дахин сойно, Өмнөговь аймгаас дахин нэр дэвшинэ” гэв.

Бие дааж болон бусад гишүүдтэй хамтран санаачилж өргөн мэдүүлсэн хууль, УИХ-ын тогтоолын төслүүд

1. Монгол Улсын засаг захиргаа, нутаг дэвсгэрийн нэгж, түүний удирдлагын тухай

2. Нийтээр тэмдэглэх баярын болон тэмдэглэлт өдрүүдийн тухай

3. Итгэлийн зээл олгох тухай

4. Зарим иргэдийн тэтгэврийн хэмжээг нэмэгдүүлэх тухай

5. Монгол улсын үндсэн хууль

6. Монгол улсын их хурлын чуулганы хуралдааны дэгийн тухай

7. Нийгмийн даатгалын сангаас олгох тэтгэвэр, тэтгэмжийн тухай

8. Түр хороо байгуулах тухай

9. Монгол Улсын Ерөнхий сайдыг огцруулах тухай

10. Ерөнхий боловсролын сургуулийн хоол үйлдвэрлэл, үйлчилгээний тухай

11. Нийгмийн даатгалын тухай

12. Ус цаг уур, орчны хяналт шинжилгээний тухай

13. Төв банкны тухай

14. Төрийн албаны тухай

15. Статистикийн салбарыг 2017-2020 онд хөгжүүлэх үндэсний хөтөлбөр

УИХ-ын гишүүн Н.Амарзаяагийн тойрогтоо амласан мөрийн хөтөлбөр хэрэгжсэн үү?

МАН-ын ард иргэддээ амласан мөрийн хөтөлбөр

• Бид хамтдаа
• Иргэдээ ядуурлаас гаргаж
• Эдийн засгаа хямралаас гаргах
• Эх орноо өрөөс салгаж
• Төрийн дампуурлыг засч
• Тэгш журам баян хүчирхэг Монголоо цогцлоож чадна гэсэн мөрийн хөтөлбөрийг 20162020 онд хэрэгжүүлэхээр амласан. Харин энэхүү мөрийн хөтөлбөрт тусгасан зүйлүүд дөрвөн жилийн хугацаанд хэрэгжсэн үү? Тэр дундаа УИХ-ын гишүүн Н.Амарзаяагийн тойрогтоо амласан мөрийн хөтөлбөр хэрэгжив үү?

УИХ-ын гишүүн Н.Амарзаяа “мими”-г хориглуулахаар Засгийн газарт ханджээ

Өмнөговь аймгаас сонгогдсон УИХ-ын гишүүн Н.Амарзаяа “мими”-г хориглуулахаар Засгийн газарт ханджээ. “Мими” гэх хортой бодисыг нүүрс тээврийн хятад жолооч нар Өмнөговь аймагт 10-аад жилийн өмнө хилээр нууж оруулан хэрэглэдэг байсныг монгол жолооч нар хэрэглэдэг болж, өдгөө “мими”-гийн хэрэглээ аюулын харанга дэлдээд байгаа юм.

Говийн бүсгүйчүүд чууллаа

Өмнөговь аймагт "Амьдрахад таатай говь нутаг" сэдэвт эмэгтэйчүүдийн нэгдсэн чуулга уулзалт болж өнгөрлөө. Уг чуулганд тус аймгийн 15 сумаас салбар бүрийн эмэгтэйчүүдийн төлөөллийн 300 гаруй бүсгүй оролцсон юм. Чуулганаар бүсгүйчүүдэд тулгамдаж буй асуудлын талаар халуун яриа өрнүүлж, шийдвэр гаргах түвшнийхэн хэрхэн шийдвэрлэж болох талаар хамтран санал солилцлоо.

Н.Баярмаа