2016-2020 оны Улсын Их Хурал завсарлаж байгаатай холбогдуулан Ардчилсан намын бүлгийн зүгээс УИХ болон Засгийн газрын үйл ажиллагаанд дүгнэлт өглөө.

УИХ дахь Ардчилсан намын бүлгийн дарга Д.Эрдэнэбат: "АН-ын бүлгээс УИХ, Ерөнхий сайд болон Засгийн газрын гишүүдэд цаг үеийн асуудлаар нийт 32 удаа асуулга тавьж, бүлгийн гишүүд дангаараа 58 хуулийг санаачилсан.

Үүнээс онцлох нь: Улс төрийн хилс хэрэгт хэлмэгдэгчдийг цагаатгах, нөхөн олговор олгох тухай, Жолоочийн даатгалын зээлийн хүүгийн дээд хязгаарыг тогтоох тухай хуулиуд УИХ-ын босгыг давж, зарим хуулиуд нь батлагдан зарим нь хэлэлцүүлгийн шатанд явж байна. Үлдсэн бүх хуулиудыг эрх баригчид УИХ-аар хэлэлцүүлээгүй. Мөн хугацаанд

АН-ын бүлгээс УИХ-ын даргад есөн удаагийн шаардлага, Монгол Улсын Ерөнхий сайдад 22 удаагийн шаардлага хүргүүлсэн.

УИХ-ын чуулганд хууль батлах, хууль тогтоомжийн төсөл 26 удаагийн санал дүгнэлтийг бичгээр өгч, чуулганы хуралдаанд танилцуулсан байна. Өнгөрсөн дөрвөн жилийн үйл явцыг та бүхэн маш сайн мэдэж байгаа.

УИХ-аар шийдэгдсэн хамгийн гол зүйл бол Үндсэн Хуулийн нэмэлт өөрчлөлт. Үндсэн Хуулийн нэмэлт өөрчлөлт оруулахад АН-ын бүлэг ардчиллын баталгаа, ардчилсан парламентыг үгүй болгох үйл явц бий болох вий гэдэг болгоомжлолын үүднээс нэлээд хатуу байр суурьтай ажиллалаа.

Эдийн засаг, төсөв, орон нутгийн бие даасан байдал, эдийн засгийн төвлөрлийг бууруулах тухай асуудал бидний санасан хэмжээнд Үндсэн Хуулийн нэмэлт өөрчлөлтөд сууж чадаагүй. Харин бидний гаргасан зарим нэг гол саналууд дэмжигдсэн.

УИХ-ын гишүүний ёс зүй, хариуцлагын тухай асуудал Үндсэн Хуульд бодитоор тусгагдсан. Ерөнхий сайдын бүрэн эрхийг нэмэгдүүлэх, УИХ-ын гишүүн давхар дээлтэй байхыг бууруулах болон орон нутгийн бие даасан байдлыг нээх, шүүхийн шударга тогтолцоог бий болгох зэрэг тодорхой саналууд дэмжигдсэн.

Бүхэлд нь дүгнээд үзэхэд, АН-ын бүлгийн гишүүд хэдийгээр цөөн байсан ч ардчилсан Монгол Улсаа хамгаалах үйлсэд өөрсдийн хувь нэмрийг бодитой оруулсан. Үнэмлэхүй олонхийг бүрдүүлсэн МАН 65 суудал авсны дараа хэд хэдэн үйл явц тодорхой боллоо.

• Бодитой бүтээн байгуулалт хийж чадаагүй, бодлогогүй ажилласан дөрвөн жил байлаа.
• УИХ-ын гишүүд болон төрийн бүх шатны албан хаагчдын ёс зүй алдагдсан дөрвөн жил байлаа.
• Эдийн засгийн өсөлт ард иргэддээ хүрч чадаагүй, үнэмлэхүй олонхиороо хуулийг өөрсдийнхөө эрх ашигт нийцүүлсэн, ард олонд ашиггүй хуулиудыг санаачилсан, төсвийн алдагдал хэмжээнээсээ хэтэрсэн, хөрөнгө оруулалтын үр дүн огт байгаагүй дөрвөн жил байлаа" гэв.