ЕБС, хүүхдийн цэцэрлэгийн хувьсах зардлыг хуулинд заасан байдаг. Энэ мөнгө олон эрх мэдэлтэн, зальхай этгээдийн сонирхлыг татдаг. Бүр бизнес болох хандлага бий. Жилээс жилд л үй олноороо нэмэгдэх хувийн сургууль, цэцэрлэгүүд энэ эрх ашгийн сонирхолд шууд татагдана.

Ойлгомжгүй өндөр сургалтын төлбөр тогтоосны дээр татвар төлөгчдийн мөнгө болох хувьсах зардал хаачдаг эсэх ард иргэд болон эцэг эхэд тодорхойгүй. Хүүхдийн боловсрол, сайн сайхны төлөө нэрэн дор энэ мэт шударга бус систем үе шаттайгаар явсаар байх нь хор уршиг ихтэй. Хүүхдүүд өөрт шаардлагатай улсаас тусгагдсан ерөнхий боловсрол эзэмшихэд хэрэгтэй мөнгийг бүтэн ашиглаж чадахгүй байгаа бол энэ шууд утгаараа луйвар гэсэн үг.

Үнэхээр нийт сурагчдынхаа мэдлэг боловсролд анхаардаг бол өгсөн мөнгөндөө, түүний ач холбогдолд хяналт тавьж ажиллах нь зүйн хэрэг. Төлбөр ихтэй хувийн сургууль, цэцэрлэгүүдэд хувьсах зардал хэрэгтэй эсэхийг дахин эргэж харах шаардлагатай. Учир нь тэнд төрийн мөнгө дэмий үрэгдэж байж болох.

Нэгэнт л боловсролын тогтолцоо нь гажуудсан өнөө нийгэмд ашиггүй зардал мундаагүй. Иймд бодлогоо дахин эргэж харж, шинэчлэл хийн салхи оруулах хэрэгтэй. Боловсролын цар хүрээгээ өргөжүүлж, чанарыг нь сайжруулснаар ирээдүйн боловсон хүчний маань суурь зөв тавигдаж улс орны хэтэд чухал юм.

Улс төрийн зүтгэлтнүүд олноор нь хувийн цэцэрлэг, сургууль байгуулж ашиглалтанд оруулах цаад сонирхол чухам юу байдаг вэ? Олны хүндэтгэл хүлээж нэр төртэй байхаас гадна хүүхдийн хувьсах зардлын мөнгө энэнд ямар нэг байдлаар хамаатай байж болох юм гэсэн хардлага ард түмэнд бий. Тавигдах хяналт, шалгалт багатай учир энэ магадгүй ажиллахад хамгийн ээлтэй мөн тохиромжтой бизнес байж болох л юм.