Манай улс амьжиргааны түвшин доогуур иргэддээ хүнсний талон олгодог болоод багагүй хугацаа өнгөрчээ. Уг хөтөлбөрт одоогийн байдлаар 44 мянган өрх хамрагддаг аж. Өөрөөр хэлбэл, нийслэл болон орон нутгийн 44 мянган 25 өрхийн 244 мянган иргэн хүнс, тэжээлийн эрхийн бичгээр амь зууж байгаа гэнэ. Иргэд талоноороо мах, сүү, гурил, өндөг, хүнсний ногоо, хүүхдийн будаа, жимс жимсгэнэ зэрэг арван нэр төрлийн бараа худалдаж авах эрхтэй.

Ингэхдээ хүнсний талоныг хүүхдэд 8000, том хүнд 16000 төгрөгөөр тооцож, өргөн хэрэглээний бараа бүтээгдэхүүн авдаг байна. Нэн ядуу, эмзэг бүлгийн гэх тодотголтой өрхийн амьжиргааны түвшин тогтоох судалгаагаар нийслэлд амьдарч байгаа өрх 310, орон нутгийн иргэн 291.5-аас доош үнэлгээтэй гарсан тохиолдолд хүнсний талон авдаг юм байна.

Зорилтот бүлгийн иргэдийн хүнс тэжээлийн баталгааг хангахын тулд 2009 оноос эхлэн хүнсний талоныг олгож эхэлсэн байдаг. 2009 онд анх 5 мянган төгрөгийн үнэ бүхий хүнсний дэмжлэгийг олгож эхэлсэн бол жил бүр нэмэгдсээр энэ онд цар тахлын улмаас том хүний 16 мянга байсныг 32 мянган төгрөг, хүүхдийн 8 мянган төгрөг байсныг 16 мянга болгожээ.

Монгол Улсын нийт иргэдийн 7,6 хувь хүнс тэжээлийн дэмжлэгт хамрагдаж байна. Үүнийг тодорхойлохдоо өрхийн мэдээллийн нэгдсэн сангийн оноогоор дүгнэдэг аж.

2016 онд 24 мянган өрх хүнсний дэмжлэгт хамрагдсан байсан бол 2017 оноос эхлэн энэ тоог хоёр дахин нэмж, одоогийн байдлаар 44 мянган өрхийн 244 мянган иргэн хүнсний дэмжлэгт хамрагдаж байгаа юм. Засгийн газраас өнөөдрийн байдлаар хүнс тэжээлийн дэмжлэг үзүүлэх үйлчилгээнд 42,2 тэрбум төгрөгийг төсөвлөжээ.