Өчигдөр Тавантолгой-Гашуунсухайт чиглэлийн 233.6 км 1-р зэрэглэлийн хүнд даацын төмөр замыг ашиглалтад хүлээн авах ёслол боллоо.Монгол хүн, монголын төмөр замчид төмөр замын бүтээн байгуулалт хийж чаддаг гэдгээ батлан харуулсан энэ төмөр зам ашиглалтад орсноор: Жилд 30-аас 50 сая тн ачаа тээвэрлэнэ. Мөн нүүрсний экспорт 2 дахин нэмэгдэнэ. Экспортын нүүрс тээврийн өртөг 3-аас 4 дахин буурна. Шууд болон шууд бус 2000 ажлын байр бий болно.Байгаль орчин, экологид үзүүлж буй сөрөг нөлөөлөл 74 хувь буурах эдийн засгийн асар их ач холбогдолтой хөгжлийн зам юм. Монгол улсын бүх цаг үеийн түүхэн дэх хамгийн том бүтээн байгуулалтыг Монголчууд өөрсдөө босгосон нь бахархалтай хэрэг болохыг юун түрүүнд онцлох нь зүйтэй.

Дэлхий нийтийн аж үйлдвэржилт, хүн амын өсөлт, шинэ техник технологийн дэвшил , даяарчлал, улс гүрнүүдийн бие биенээсээ хамаарах хамаарал, материаллаг хэрэгцээ нь хөгжингүй улс орнуудын нөөц шавхагдаж байгаа явдал хөгжиж буй улс орны баялагийг хамтран ашиглах хүсэл сонирхлын үндэс болж байна. Монгол Улс далайд гарцгүй, дэлхийн хүчирхэг хоёр гүрний дунд оршдогоороо онцлог ба эдийн засгийн бие даасан байдлыг олон улсын төвшинд дэмжиж байгаа мэт харагддаг ч өнгөрсөн түүхийн бодит байдал нь ямагт өөрийн хараа байлгахын хүсэгчдийн сонирхол давамгайлах болжээ.

Иймд Монголд уул уурхайн салбар эрчимтэй хөгжсөн хэдий ч улсын эдийн засагт бололцоотой дэмжлэг үзүүлсэнгүй. Уул уурхайгаас гадаадад экспортолж байгаа баялаг үнэгүйдэх шалтгаан нь тээвэрлэлтийн асуудал юм. Монгол Улсын Их Хурлын 32-р тогтоолоор “ Төрөөс төмөр замын тээврийн талаар баримтлах бодлого”-ыг баталсан. Засгийн газрын 2019 оны “ Таван толгой- Зүүнбаян чиглэлийн төмөр замын төслийг эхлүүлэх тухай” тогтоолын дагуу 2012 онд Гашуунсухайтын төмөр замын бүтээн байгуулалтын ажлыг эхлүүлсэн ч улс төрийн шалтгаанаар зогсонги байдалд ороод байсныг 2018 оноос үргэлжлүүлсэн.

Өмнөговь аймгийн Цогтцэций сумын Тавантолгой нүүрсний ордоос Дорноговь аймгийн Зүүнбаян чиглэлд, төмөр замын нийт урт 414,6 км, трассын дагууд 1 өртөө, 6 өрлөгтэй, төмөр замын голын даац нь 25 тонноор, царигийн хэмжээ 1520 мм- ээр барилга угсралтын ажил явагдсан. Таван толгой-Зүүнбаян чиглэлийн төмөр замын трассын дагуух 30 км- ийн бүсэд Ашиглалтын тусгай зөвшөөрөл бүхий ашигт малтмалын 30 гаран орд газар бий. Энэхүү төмөр замаар жилдээ 15.0 сая тонн ачаа тээвэр зөөвөрлөх ба хамгийн багадаа 50 жил ачаа тээвэр зөөвөрлөн ОХУ, БНХАУ- ын төмөр замын сүлжээнд холбогдох, далайн боомтуудад хүрэх, дэлхийн зах зээлд нийлүүлэх боломжтой.

Цаг агаарын давагдашгүй хүчин зүйл, говийн хөрсний онцлог, усны асуудал, дэлхийн болон улс орны томоохон үйл явдлууд бүтээн байгуулалтын ажлыг хугацаанд нь дуусгахад тодорхой нөлөөлсөн ч амжилттай бүтээн байгуулж чадлаа.Зэвсэгт хүчний бүтээн байгуулалтын хувьд, Төмөр замын барилгын ажил 2019 оны 5 сарын 24- ний өдөр эхэлсэн. Доод бүтцийн ерөнхий гүйцэтгэгчээр ЗХЖШ, дээд бүтцийн ерөнхий гүйцэтгэгчээр “ Улаанбаатар төмөр зам” ХНН ажиллаж байгаа бөгөөд тус төмөр зам нь Тавантолгой нүүрсний уурхайн коксжих нүүрсийг ОХУ, БНХАУ руу экспортлох шинэ гарц нээх, трассын дагуу Цагаансуварга, Хармагтай, Манлай зэрэг нүүрс, төмөр, зэс, цайрын томоохон орд газрууд байрлаж байгаа нь Монголын уул уурхайн экспортод голлох нөлөөг үзүүлэх болно.

Зэвсэгт хүчний бие бүрэлдэхүүн анх удаа улс орны стратегийн томоохон төслийн Ерөнхий гүйцэтгэгчээр ажиллаж, бүтээн байгуулалтыг чанартай, технологийн дагуу хийж гүйцэтгэсэн. Мөн Зэвсэгт хүчний бүтээн байгуулалтын үйл ажиллагааны хууль эрх зүйн орчин сайжирч, үүрэг чадавхи дээшилсэн. Цэргийн гэрээт, хугацаат цэргийн алба хаагчдад мэргэжил олгох сургалт зохион байгуулж, иргэн цэргийн харилцааг бэхжүүлэх, Зэвсэгт хүчний бие бүрэлдэхүүн, техник хэрэгслээр Улсын бүтээн байгуулалтын ажил гүйцэтгэх аргачлал, төлөвлөлтийг боловсруулж, удирдамжаар ханган, барилга инженерийн ангиудын чадавхыг нэмэгдүүлсэн. Энэ их бүтээн байгуулалт, улс орны хөгжлийн цусны эргэлт болсон их үйлс нь

Монгол Улсын тав дахь Ерөнхийлөгч Халтмаагийн Баттулга ба түүний нөхөд, монгол инженерүүд, монгол ажилчид, Монголын зэвсэгт хүчинд хаяглагдан түүхэнд үлдэнэ ээ. Түүхийн шар хуудас цаг хугацаа өнгөрөх тусам үнэнийг өгүүлж, бурууг ялгадаг жамтай.