УИХ-ын намрын чуулган эхлээд нэг сар болж байна. Энэ парламентын намрын отгон чуулганаар нийт 62 хуулийн төсөл хэлэлцэхээр өргөн баригдсан. Дийлэнхэд нь шинэчилсэн найруулга хийх аж. Тухайлбал, автотээвэр, ашигт малтмал, байгалийн ургамал, биеийн тамир, спорт, гэр бүл, газрын тухай хуулиудыг шинэчлэх юм байна. Мөн Монгол Улсын Ерөнхийлөгчийн тухай, УИХ-ын тухай, Үндсэн хуульд нэмэлт, өөрчлөлт оруулах журмын тухай, Монгол Улсын Төрийн ордны тухай хуулиудын шинэчилсэн найруулгыг хэлэлцэнэ. Намрын чуулганд өргөн баригдсан хуулиудаас ард түмний амьдралд тустай, нийгэм эдийн засагт үр өгөөжтэй хуулиудын судлаачид хэрхэн харж байгааг тоймолъё.

Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах хуулийн төсөл

Түгжрэлийг бууруулах үндэсний хорооноос асуудалд шат дараалалтай хэд хэдэн арга хэмжээ авч ажиллахаа илэрхийлсэн байдаг

Үндэсний хороо түгжрэлийн эсрэг хууль гаргах, авто зам ашигласны төлбөр, машинтай холбоотой татвар зэрэг асуудлуудыг иж бүрнээр нь авч үзэхээр болсон. Өөрөөр хэлбэл, түгжрэлд нөлөөлж буй хүчин зүйл нь ганцхан замын хөдөлгөөн биш, төрд буй хүнд суртлын болон дүрэм, журмын, сэтгэлгээний ч гацаа байна гэж дүгнэн уг хуулийн төслийг өргөн барьсан.

Газрын тухай багц хуулийн төсөл

Барилга хот байгуулалтын яам, Хууль зүй дотоод хэргийн яам хамтран боловсруулсан уг хуулийн төслийн шинэчилсэн найруулгаар өнгөрсөн 30 гаруй жилийн хугацаанд алдагдсан газар зохион байгуулалтын төлөвлөлтийг шийдвэрлэнэ. Хуулийн төсөлд газар олголтыг цэгцтэй зохион байгуулах, замбараагүй олгогдсон газруудыг эргэн харах, цуцлах, нөхөн олговор олгох гэх мэт суурь харилцааг шингээснийг шинжээчид сайшааж байсан.

Үндэсний баялгийн сангийн тухай хуулийн төсөл

Үндсэн хуульд 2019 онд оруулсан нэмэлт, өөрчлөлтөд хууль тогтоомжийг нийцүүлэх ажлын хүрээнд Үндэсний баялгийн сангийн тухай хуулийн төслийг боловсруулж, УИХ-д өргөн мэдүүлэх үүргийг Засгийн газар хүлээсэн. Энэ хуулийг Ирээдүй өв сан, Хөгжлийн болон Хуваарилалтын сантай байхаар боловсруулжээ. Ингэхдээ Ирээдүй өв сан, Хуваарилалтын санд тухай жилийн нийт орлогоос хамгийн багадаа 10 хувийг нь төвлөрүүлэх юм байна. Уг сангийн орлогыг валют хэлбэрээр Монголбанканд хадгалах зохицуулалтыг тусгажээ. Хөгжлийн сан нь улс орны нийгэм, эдийн засгийг дэмжих томоохон төсөл хөтөлбөрүүдийг хэрэгжүүлэх санхүүжилт бий болгоно гэсэн зарчмыг тусгасан юм. Түүнчлэн Үндэсний баялгийн сангийн бодлого нь төсвийн бодлогын нэг бүрэлдэхүүн хэсэг байх аж. Хөрөнгийн удирдлагын эцсийн шийдвэрийг УИХ-аас батлан гаргахаар төсөлд оруулсан байна. Засгийн газрын тухайд жил бүрийн улсын төсвийн төсөлтэй хамт Үндэсний баялгийн сангийн төсвийн зарцуулалтыг УИХ-д өргөн мэдүүлэх ажээ.

М.МӨНХ