НИТХ-ын ээлжит XXII хурал өнөөдөр 09:00 цагт товлогдож НИТХ-ын даргыг чөлөөлж, томилох асуудлыг хэлэлцэх байсан ч МАН-ын бүлэг 15.00 цаг хүртэл завсарлага авлаа. НИТХ-ын даргад МАН-ын Удирдах зөвлөлөөс НИТХ-ын МАН-ын бүлгийн дарга Р.Дагвыг дэмжсэн. Тиймээс түүнийг томилох асуудлыг өнөөдрийн хуралдаанаар хэлэлцэж шийдвэрлэх юм. Хуралдааны өмнө МАН-ын бүлэг хуралдсан ч уг асуудлаар байр, сууриа нэгтгэж чадаагүй бололтой. Эх сурвалжийн мэдээлж буйгаар МАН-ын бүлэг Р.Дагвыг дэмжих дээр санал хоёр хуваагдсан учраас хуралдаж чадахгүй байгаа аж. НИТХ дэх олонхийн бүлэг асуудлаа шийдэж хуралдаж чадахгүй байгааг АН-ын бүлгийн төлөөлөгч нар нь шүүмжилж байлаа.

Төлөөлөгч Д.Баттулга

“Эхлээгүй хурлаас завсарлага авч хууль зөрчиж байна. НИТХ хуралдаж чадахаа больсон байна” гэх шүүмжлэлийг хэлсэн юм.

Р.Дагватай хамт заалнаас хоёр төлөөлөгч НИТХ-ын даргад нэрээ дэвшүүлэхээр яригдаж байгаа бөгөөд нэр дэвших хоёр төлөөлөгчийн нэг нь Ц.Сандаг-Очир аж.

Мөн С.Амарсайхан Хотын даргаар томилогдсон учир түүнийг НИТХ-ын даргаас албан ёсоор чөлөөлөх асуудлыг хэлэлцэх ёстой.