УИХ-ын гишүүн Н.Номтойбаяртай холбоотой нийгэмд ойлгомжгүй байдал үүсгэсэн хэд хэдэн асуудал байгаа билээ. Тодруулбал, Хөдөлмөр эрхлэлтийг дэмжих сангаас 3.9 тэрбум төгрөгийг УИХ-ын гишүүдэд хөнгөлөлттэй нөхцөлөөр олгосон гэх мэдээлэл болон Г.Батхүү агсантай холбоотой хэргийн талаар худал мэдүүлэг өгсөн гээд хэвлэл мэдээллийн хэрэгслээр буруутгах хандлага нэлээд гарсан. Түүнийг нийгэмд гэмтэн болгож харагдуулах зохион байгуулалттай ажил хийгдэж байгааг тэрээр удаа дараа хэвлэлээр мэдэгдэж байгаа юм.

Өнгөрсөн оны арванхоёрдугаар сарын 12-нд дээрх асуудалтай холбогдуулан Н.Номтойбаяр албан ёсны тайлбарыг хүргүүлсэн байдаг.

Эргэн сануулахад, Хөдөлмөр эрхлэлтийг дэмжих сангаас 3.9 тэрбум төгрөгийг олгосон талаарх мэдээлэлд дараах тайлбарыг хүргүүлсэн. “Төслүүдийг эргэн төлөлтгүй хэрэгжүүлэхээр улсад 3.9 тэрбум төгрөгийг хохирол учруулсан гэж дүгнэсэн. Эргэн төлөгдөх зохицуулалтыг 2017 есдүгээр сарын 16-ны Хөдөлмөр эрхлэлтийг зохицуулах үндэсний зөвлөлийн тогтооллоор баталсан. Эргэн төлөгдөх нөхцөл нь хоёр жилээр батлагдсан. Энэ тогтоолын дагуу шалгарсан төслийг хэрэгжүүлэгчидтэй гэрээ байгуулахдаа "Гэрээ байгуулснаас хойш эхний 22 сарын дотор зээлийн 50 хувийг, үлдэгдэл 50 хувийг 24 дэх сард төлнө" гэсэн заалт оруулсан. Тэгэхээр яллагдагчаар татсан хоёр дахь үндэслэл нь огт худлаа зүйл. Намайг Хөдөлмөр, халамж үйлчилгээний ерөнхий газрын дарга, дэд дарга нартай бүлэглэн албан тушаалын байдлаа урвуулан нийтдээ найман иргэн, 21 хуулийн этгээдэд давуу байдал олгосон гэж дүгнэсэн. Салбартай холбоотой хүсэлтүүд их ирдэг. Түүнийг нь хууль тогтоомжийн дагуу холбогдох байгууллагууд руу шилжүүлдэг. Нэр бүхий гишүүд гээд 10 орчим гишүүний тухай мэдээлэл хэвлэлээр гарсан. Тэр гишүүдийн зүгээс ЖДҮ шиг надад албан бичиг өгөөд шийдүүлсэн зүйл юу ч байхгүй гэдгийг хариуцлагатайгаар мэдэгдъе” гэжээ.

Харин Г.Батхүү агсантай холбоотой хэргийн талаар худал мэдүүлэг өгсөн гэдэгт дараах тайлбарыг хүргүүлж байв. Тэрбээр, “Би яллагдагчаар татагдсан зүйл огтхон ч байхгүй. Энэ хэрэгт хэн ч яллагдагчаар татагдаагүй. Энэ оны таван сараас хойш нийт 22 мэдээллийн хэрэгслээр 195 IP хаяг, давтамжтайгаар 400-500 удаа над руу дайрч, энэ хэрэгт нэр цохож холбогдуулсан. Тэр хүнийг нас барсантай холбогдуулж намайг сонин хэвлэлээр л гүтгэж доромжилж байгаа болохоос хуулийн байгууллага яллагдагчаар татаж, дуудсан зүйл байхгүй. Энэ хэргийг хянаж байгаа прокурор Мөнхгэрэлтэй албан уулзалт хийсэн. Нэг л зүйл асуусан. Энэ асуудлаар миний бие ямар нэг байдлаар шалгагдаж байгаа юу, өөр хэн нэгэн шалгагдаж байгаа юу гэж асуусан. Үүнд сэжигтэн, яллагдагчаар татагдсан хүн байхгүй байгаа. Би гурван удаа гэрчийн мэдүүлэг өгсөн. Надтай хаана таарч, манай өрөөгөөр ороод гарсан гээд би бүгдийг нь хэлсэн” хэмээн нөхцөл байдлын талаар сэтгүүлчдэд мэдээлсэн.

Арга буюу чөлөөлөгдөх хүсэлтээ өгөв үү?

Төрийн ордонд хийсэн хэвлэлийн хурлын дараагаар түүнийг нууц задруулсан гэх үндэслэлээр Улсын ерөнхий прокурор УИХ-ын гишүүний бүрэн эрхийг нь түдгэлзүүлэх хүсэлтийг Халдашгүй байдлын дэд хороонд ирүүлж, улмаар Халдашгүй байдлын дэд хороо түүний бүрэн эрхийг түдгэлзүүлэх шийдвэр гаргав. Шийдвэр гарсантай холбогдуулж Хууль зүйн байнгын хороо, Төрийн байгуулалтын байнгын хороо Н.Номтойбаяр гишүүний асуудлаар хуралдаж, түүнийг түдгэлзүүлэх шаардлагагүй гэдэг шийдвэрийг гаргаад байсан юм. Тэгвэл өчигдөр УИХ-ын чуулганы хуралдаанаар гишүүний бүрэн эрхийг түдгэлзүүлэх эсэх асуудлыг хаалттай горимоор хэлэлцсэн юм. Гишүүдийн нууц санал хураалтаар УИХ-ын 30 гишүүн түүний бүрэн эрхийг түдгэлзүүлэх санал өгсөн бол 28 гишүүн авч үлдэх санал өгчээ.Олонх нь түүнийг түдгэлзүүлэх санал өгсөн ч тогтоолын төслөө батлахдаа гишүүдийн олонх нь дэмжээгүй учраас нууц санал хураалт хүчингүй болов.

Үүний дараагаар тэрээр өөрийнх нь эсрэг зохион байгуулалттай хийгдэж байгаа үйл ажиллагааны учрыг олохыг хүсэж буйгаа дахин илэрхийлж, УИХ-ын гишүүнээс өөрийнхөө хүсэлтээр чөлөөлөгдөх хүсэлтээ гаргасан юм. Түүний тайлбарыг хүргэе.

“Намайг “харлуулж” байгаа олон зүйлсийн учрыг тайлна”

“УИХ-ын тухай хуулийн 6.6.3-ын дагуу УИХ-ын гишүүнээс өөрийнхөө хүсэлтээр чөлөөлөгдөх бичгээ УИХ-ын даргад өргөн барина. Энэ бол миний хувь улс төрчийн шийдэл. Намын хамгаалалт надад байхгүй. Ингэснээр миний эсрэг, зохион байгуулалттайгаар “харлуулж” байгаа олон зүйлсийн учрыг би тайлна. Зохион байгуулалттайгаар намайг гэмт хэрэгтэн болгох ажиллагаа явагдаж байна. Надтай холбогдолтой нийгэмд ойлгомжгүй байгаа хэд хэдэн асуудлыг мэдээлэхгүй байснаараа иймэрхүү үр дүнд хүрээд байна л даа. Гишүүнээс чөлөөлөгдөх шийдвэрийг би аль эрт гаргасан. Миний бүрэн эрхийг түдгэлзүүлэх шийдвэр 12-ны хэвлэлийн хуралтай шууд холбоотой. Намайг 2020 онд нэр дэвшүүлэхгүй нь тодорхой болсон. Ямар нэгэн шахалт байхгүй. Би тийм зүйлд өртөөд байдаг хүн биш. Нэг зүйлийг хариуцлагатайгаар хэлье. Би зорьсон зүйлээсээ ухардаг хүн биш. Би улс төрөөс гарахгүй" гэлээ. Ингэснээр түүний 2020 онд УИХ-ын сонгуульд нэр дэвших эрхийг нь хязгаарласан үйл явдал боллоо.

Н.Номтойбаярыг МАН-аас гарсанд тооцов

Түүнчлэн олон нийтийн газар удаа дараа биеэ зохисгүй авч явсан, зодоон цохионд оролцож МАН-ын нэр хүндэд муугаар нөлөөлж байгаа тул энэ асуудлыг хэлэлцэж, хариуцлага тооцох нь зүйтэй гэсэн дүгнэлтийг МАН-ын Ёс зүйн хорооноос гаргасан. Энэ дүгнэлтийг Хяналтын ерөнхий хороогоор хэлэлцэж, МАН-ын дүрмийн зургаадугаар зүйлийн дагуу нийгэмд биеэ зүй зохистой авч чадаагүй, намын нэр хүндэд сэв суулгаж байгаа асуудалд хариуцлага тооцож, МАН-аас гарсанд тооцсон шийдвэр гаргав.

Энэ талаар тэрбээр, “Намайг намаас “хөөх” шийдвэр гарч байгааг танилцуулсан. Энэ шийдвэртэй би санал нэг байна. Өөрийгөө өмөөрөх зүйл байхгүй. Намын журмын гишүүдээсээ уучлал гуйя. Энэ саналыг хүлээн зөвшөөрсөн” гэв.

Энэ бүхнээс харахад төр нүүрээ буруулж, нийгэмд түүнийг гэмтэн болгож “харлуулах” ажил үнэхээр явагдаж байна уу гэдгийг цаг хугацаа харуулах л үлдлээ.