УИХ-ыг яаралтай хуралдуулж, 2020 оны төсөвт тодотгол хийх хэрэгтэй

УИХ дахь АН-ын зөвлөлөөс үүсээд буй эдийн засгийн хүндрэлийг даван туулах арга замын талаар Засгийн газар, УИХ-д дахин санал хүргүүлж байгаа талаар мэдээллээ.

УИХ дахь АН-ын зөвлөлийн дарга Д.Эрдэнэбат “Үүсээд байгаа нөхцөл байдалтай холбоотойгоор УИХ яаралтай хуралдаж, эрсдэлийн үнэлгээ, хэрхэн давах төлөвлөгөө боловсруулах ёстой. Гэхдээ цар тахал эхэлснээс хойш гурван сарын хугацаанд эдийн засгийн хямрал бодит байдал болчихоод байхад Засгийн газар, УИХ хайхрамжгүй байна гэж үзэж байна. УИХ яаралтай хуралдаж, 2020 оны төсвийг тодотгож, хамгийн багадаа нэг их наяд төгрөгийн эрсдэлийн сан үүсгэх хэрэгтэй. АН хамтарч, улсын төсөвтөө тодотгол хийхийг санал болгож байгаа. Энэ удаагийн гурав дахь саналыг УИХ-д хүргүүлнэ. Цахимаар байх уу, танхимаар байх уу гэдгийг шийдэж, өнөө маргаашгүй энэ асуудал дээр ярилцах хэрэгтэй байна” гэлээ.

(2020.03.23)

Ардчилсан нам мөрийн хөтөлбөрөө Үндэсний аудитын газар хүргүүллээ

Ардчилсан нам /АН/ 2020 оны УИХ-ын сонгуулийн мөрийн хөтөлбөрөө Үндэсний аудитын газарт хүргүүлэв. Тус намаас “Монгол өрх-Хөгжлийн бодлого” нэртэй мөрийн хөтөлбөр боловсруулжээ. Сонгуулийн тухай хуулийн дагуу энэ сарын 25-ны дотор улс төрийн намууд мөрийн хөтөлбөрөө боловсруулж, Үндэсний аудитын газарт хүргүүлэх ёстой.

Тус мөрийн хөтөлбөрийн төслийг боловсруулахдаа, ТББ, холбоод, жижиг дунд үйлдвэрлэл эрхлэгч, эрдэмтэн, судлаач зэрэг нийт 20 гаруй мянган иргэдийн саналыг хүлээн авч, нэгтгэн боловсруулжээ. Ингээд энэ сарын 21-нд Үндэсний бодлогын хороо цахимаар хуралдаж уг төслийг баталсан байна.

(2020.03.24)

Монгол-Хятад хоёр улс эдийн засгийн харилцаагаа сэргээхэд хамтран ажиллахад бэлэн

Монгол Улсын Шадар сайд Ө.Энхтүвшин БНХАУ-аас Монгол Улсад суугаа Онц бөгөөд Бүрэн эрхт Элчин сайд ноён Цай Вэньруйг хүлээн авч уулзав. Уулзалтын үеэр ноён Элчин сайд “Коронавируст халдвар намжина. Харин эдийн засгийг эрчимжүүлэх ёстой. Тиймээс эдийн засгийн харилцаагаа сэргээхэд бидний зүгээс бэлэн байна” гэсэн юм. Мөн тэрээр дэлхийд коронавирус халдварын тархалт дотоодоос тархаагүй гарын таван хуруунд багтах цөөн улсын нэг нь Монгол Улс байгаад баяр хүргэлээ. Уулзалтаар ариутгал халдваргүйтгэл хийх хоёр пункт барин, ашиглалтад ороход бэлэн болсныг мэдээллээ. Монгол Улсын Шадар сайд Ө.Энхтүвшин коронавирусын халдвараас урьдчилан сэргийлэх ариутгал халдваргүйтгэл болон бусад бэлтгэл ажил бүрэн дууссан бол түүхий нүүрсний экспорт эхлүүлэхэд татгалзах зүйл байхгүй гэдгийг онцлон тэмдэглэв.

(2020.03.25)

Тусгаарлах хоногийг 21 болгож сунгалаа

Улсын Онцгой комисс хуралдаж, сэжигтэй иргэдийг тусгаарлах тусгаарлалтын 14 хоногийг сунгаж 21 болголоо. Нэмэлт долоо хоногийн тусгаарлалтын байр, хоолны 350-500 хүртэл сая төгрөгийн зардлыг Засгийн газрын нөөц сангаас гаргахаар тогтов.

2020 оны дөрөвдүгээр сарын 02-нд Улаанбаатар-Сөүл-Улаанбаатар, 2020 оны дөрөвдүгээр сарын 03-нд Улаанбаатар-Токио-Улаанбаатар чиглэлд тус тус захиалгат нислэг үйлдэнэ. Тус нислэгээр Монгол Улсад ирэх иргэдэд шинэ коронавирусын шинжилгээнд хамрагдсан бөгөөд халдвар аваагүй байх, тусгаарлах байрны 1,050.000 төгрөгийн төлбөрөө төлсөн, ирээд 21 хоног дэглэмийн дагуу тусгаарлалтад байх шаардлагыг тавина. Мөн нислэгийн баг бүрэлдэхүүнд мэргэжлийн эмч сувилагч нарыг илгээж зөөврийн, түргэн оношлуураар нислэгийн явцад оношилгоо хийх зэрэг арга хэмжээг авч ажиллана гэдгээ тодотгосон.

(2020.03.26)

Улсын Их Хурал хаврын чуулганаа цахимаар зохион байгуулна

Монгол Улсын Их Хурлын хаврын ээлжит чуулган хуулийн дагуу дөрөвдүгээр сарын 6-нд эхэлнэ. Коронавирусын цар тахал дэлхий дахиныг түгшээж, Монгол Улсад өндөржүүлсэн бэлэн байдал тогтоосонтой холбоотойгоор хаврын чуулганыг цахим хэлбэрээр явуулахаар УИХ-ын дарга Г.Занданшатар шийдвэр гаргаад байна. Цахимаар хуралдах бэлтгэлийг хангах ажил Улсын Их Хурлын Тамгын газарт өрнөж эхэлжээ.

Одоогоор чуулганы нээлтийг 4-5 танхимд зэрэг явуулах, Нэгдсэн хуралдаан болон Байнгын хороо, Ажлын хэсгийн хуралдааныг танхимд зохион байгуулахаас гадна гишүүдэд зайнаас оролцох боломж бүрдүүлэхээр ажиллаж байгаа аж. Танхимд хуралдсан тохиолдолд гишүүд хоорондын зайг 2-3 метрт байлгах, нэг дор 20-иос илүү гишүүн цугларуулахгүй байхаар зохион байгуулах юм байна.

(2020.03.26)

Дөрөвдүгээр сарын 1-нээс аравдугаар сарын 1 хүртэл НДШ-ийг бүрэн тэглэх шийдвэр гаргалаа

Монгол Улсын Ерөнхий сайд У.Хүрэлсүх иргэд, аж ахуйн нэгжүүдэд хандан Засгийн газрын хуралдааны шийдвэрийн талаар мэдээлэл өглөө.

Ерөнхий сайдын мэдэгдлээс:

1. Дөрөвдүгээр сарын 1-нээс аравдугаар сарын 1 хүртэл НДШ-ийг бүрэн тэглэх шийдвэр гаргалаа.

2. Дөрөвдүгээр сарын 1-нээс аравдугаар сарын 1 хүртэл иргэдийн цалин хөлснөөс орлогын албан татвар авахгүй.

3. Дөрөвдүгээр сарын 1-нээс аравдугаар сарын 1 хүртэл 1.5 тэрбум төгрөгийн орлоготой ААН-ийг орлогын албан татвараас бүрэн чөлөөлж байна.

4. Дөрөвдүгээр сарын 1-нээс аравдугаар сарын 1 хүртэл хүндэрсэн ААН-үүд ажлын байраа хадгалбал сар бүр урамшуулал олгохоор болов.

5. Дөрөвдүгээр сарын 1-нээс аравдугаар сарын 1 хүртэл малчдаас ноолуур худалдан авах зорилгоор 300 тэрбум төгрөгийн хөнгөлөлтэй зээл олгоно.

6. 18 нас хүртэлх насны бүх хүүхдэд сар бүр олгож байгаа 20 мянган төгрөг дээр нэмж 10 мянган олгохоор боллоо.

7. Дөрөвдүгээр сарын 15-наас эхлэн шатахууны үнийг литр тутамд нь 200-300 төгрөгөөр буулгахаар болсон.

(2020.03.27)