- ЭНЭ НЬ ХӨЛ ХОРИОТОЙ ХОЛБООТОЙ ГЭЖ БАГШ НАР ҮЗЭЖ БАЙНА -

Элсэлтийн ерөнхий шалгалтын бүртгэлд 30882 шалгуулагч хамрагдсанаас 2019-2020 оны хичээлийн жилд Ерөнхий боловсролын сургууль төгсөх 28001 шалгуулагч, өмнөх оны төгсөгч 2881 шалгуулагч шалгалт өгөхөөр бүртгүүлж, бүртгэлээ баталгаажуулсан байна.Элсэлтийн ерөнхий шалгалтыг 2020 оны долдугаар сарын 02-05-ны хооронд зохион байгуулна. Коронавируст халдвар (COVID-19)-ын тархалтаас урьдчилан сэргийлэх зорилгоор УОК, ЭМЯ, Мэргэжлийн хяналтын байгууллагуудаас гаргасан заавар, зөвлөмж, өгч буй чиглэл, шаардлагын дагуу халдвар хамгааллын дэглэмийг сахиж, нэг анги танхимд 1.5-2.0 метрийн хоорондын зайтай байрлуулсан ширээ сандалд сууж шалгалтаа өгөх бөгөөд 12-оос илүүгүй шалгуулагч хамрагдахаар зохион байгуулж нийт 85 шалгалтын байрыг бэлдэж байна.

“Ковид-19” цар тахал гарч, хөл хорио тогтоосноос болж сурагчдын хичээлийг теле байдлаар зааж, улмаар зохих ёстой мэдлэгээ сурагчид бүрэн гүйцэт судалж чадаагүй. Улсын хэмжээнд 30 гаруй мянган хүүхэд энэ жил ЭЕШ өгнө. Ерөнхий боловсролын сургуулийн танхимын сургалт энэ сарын 11-нд дууссан бөгөөд сурагчид төлбөртэй сургалтын төвүүдэд явж, ЭЕШ-даа бэлдэж байна. Сургалтын төвүүдийн багш нарын ярьж байгаагаар цар тахалтай холбогдуулан сурагчдын мэдлэгийн түвшин өмнөх жилүүдээс доогуур байгааг онцолж байлаа.

О.Энхчимэг: ХҮҮХДҮҮД ГАНЦААРЧИЛСАН СУРГАЛТАД ЯВАХ НЬ ЭЛБЭГ БАЙНА

Бид Монголын цогц сургалт хөгжлийн академи руу очлоо. Нэг ангид 10-15 хүүхэд давтлага хичээлд хамрагдаж, суудал хоорондын зайг 1.5 метрээр стандартын дагуу байршуулсан харагдана. Сурагчид зөвхөн хуваарьт суудалдаа сууж, ангийн байршлаас хамааран оноогдсон орох, гарах урсгалын дагуу зорчих гэх мэтээр мэргэжлийн байгууллагаас өгсөн зөвлөгөө, зааврыг баримтлан зохион байгуулж байгаа нь харахад илт. Тус академийн ахлах менежер О.Энхчимэгээс зарим зүйлийг тодрууллаа. Тэрээр “Манай академи богино хугацаанд хичээллэхэд оноо амладаггүй. Урт хугацаанд бэлдсэн бол оноо амладгаараа бусад сургалтын төвүүдээс онцлогтой. Элсэлтийн ерөнхий шалгалт долдугаар сарын хоёрноос эхэлж байгаатай холбоотойгоор сүүлийн нэг сарын хугацаанд манай академи ачаалал ихтэй байна. Анги танхимын сургалт түвшин нь хичээллээд талдаа явж байгаа болохоор зарим хүүхдүүд нь ганцаарчилсан сургалтанд явах нь элбэг байна. Энэ жил хичээл тасалдсантай холбоотойгоор хүүхдүүдийн түвшин ч муу байгаа нь ажиглагдлаа. Тухайн ангид орох ёстой боловч түвшин нь таарахгүй доогуур байгаа болохоор ганцаарчилсан сургалтад ихэнх нь хамрагдаж байна. Сургалтад түлхүү математик, англи хэл, нийгэм, физик гэсэн хичээлүүд явагдаж байгаа. Харин ЕБС-иудын танхимын сургалтад хүүхдүүд хамрагдсан тухайгаа ярьж л байна. Гэхдээ богино хугацаанд хичээллэсэн учраас төдийлөн хангалттай бэлдэж чадаагүй болов уу. Одоо хугацаа богинохон байгаа учраас түвшин тогтоох шалгалт авч байгаад ямар түвшинд байна тэр түвшнээс нь үргэлжлүүлэн сургадаг л даа. Үнэхээр ангийн сургалтаа ойлгохгүй зарим хичээл дээрээ хоцрогдоод байгаа тохиолдолд давтлага өгдөг” гэсэн юм.

СУРАГЧИД УНШИЖ СУДЛААГҮЙ ДААЛГАВРУУД ЭЕШ-Т ОРЖ ИРЭХ ВИЙ ГЭДГЭЭС САНАА ЗОВЖ БАЙНА

ЭЕШ-даа бэлдэж буй төгсөх ангийн сурагчдаас тодруулга авлаа. Сурагчид ЭЕШ-даа бэлдэхэд хүндрэлтэй зүйлс олон байна гэдгийг онцолж байлаа.

Шавь цогцолбор сургуулийн 12 дугаар ангийн сурагч Г.Цэрэнханд

“Би аялал жуулчлал зочид буудлын чиглэлээр мэргэжлээ сонгоод ЭЕШ-аа хоёр гурван сарын өмнөөс бэлдсэн. Нэг сарын хугацаанд танхимын сургалт хичээллэж байгаад зургадугаар сарын 11-нд хаасан. Хүндрэлтэй зүйлүүд их байлаа. Тухайлбал, сонгосон хичээлээрээ давтлага авахаар долоо хоногт нэг удаа хичээллэдэг. Энэ хугацаанд багш нар элсэлтийн ерөнхий шалгалтын материал жишиг даалгавар өмнөх оны материалуудаас ажлуулсан. Нэг хичээлийг долоо хоногт ганцхан удаа хоёр цаг орж байгаа болохоор сайн ойлгож чадаагүй. Математик, англи хэл, нийгэм, физик гэсэн хичээлүүдээр шалгалт өгөх болохоор яг биеэ даагаад бэлдэх үнэхээр хэцүү байна. Хичээл сургуульдаа санаа зовж байгаа хүүхдүүд давтлага сургалтанд явж байна. Зарим нь ч санаа зовж байгаа зүйлгүй ажил хийгээд явж байна. Энэ хэцүү цагт өөрөө л хичээхгүй бол ирээдүйд ямар хүн болж төлөвших эсэх нь мэдэгдэхгүй л байна. Багш нараасаа танхимын давтлага дуусахаар үргэлжлүүлээд давтлага авч болохгүй юу гэхээр хууль санаачлаад гаргачихсан болохоор болохгүй өөрсдөө биеэ даагаад бэлд гэх юм.

Шавь цогцолбор сургуулийн 12 дугаар ангийн сурагч Б.Хулан: -Цар тахлаас болоод сайн бэлдэж чадаагүй. Хоёр, гурван сарын өмнөөс л бэлдэж эхэлж байна. Танхимын сургалт богинохон хугацаанд байсан ч гэсэн мэдэхгүй зүйлээ мэдэж авсан гэрээр бэлдэхээс илүүтэйгээр танхимын сургалт их зүйл заасан хими, биологи, англи хэл гэсэн хичээлүүдээр ЭЕШ өгөх гээд бэлдэж байгаа. Одоогоор химийн сургалтанд л сууж байгаа. Үзээгүй, хичээллээгүй зүйлүүд ороод ирэх болов уу л гэж айж байна гэв.

М.Болдсайхан: ХАГАС ЖИЛИЙН ТУРШ ХИЧЭЭЛ ЗАВСАРДСАН УЧРААС СУРАГЧДЫН СУДЛААГҮЙ АГУУЛГЫГ ХАМРУУЛАХГҮЙГЭЭР ЗОХИЦУУЛСАН

Боловсролын үнэлгээний төвийн ахлах мэргэжилтан М.Болдсайханаас энэ талаар тодруулга авахад “Зөвхөн шалгалт зохион байгуулалтаас гадна шалгалтын сэдэв, даалгаварт коронавирус нөлөөлж өөрчлөлт гарсан. Учир нь хичээл, сургалтын үйл ажиллагаа үндсэндээ хоёрдугаар сарын 20-ноос хойш хагас жилийн турш завсардсан. Тиймээс энэ жилийн шалгалтын сэдэв, даалгавар дээр бид сурагчдын 10, 11 дүгээр ангийн агуулгыг бүтнээр нь хамруулах, 12 дугаар ангийнх нь судлаагүй агуулгыг хамруулахгүйгээр зохицуулсан. Мөн энэ жилийн англи, орос, монгол хэлний хичээлүүдийн сонсоод ойлгох даалгаврууд хасагдана. Мөн монгол хэл, бичгийн шалгалтыг хассан. Монгол хэл, бичгийн шалгалт нь задгай даалгавартай учир машинаар засах боломжгүй, заавал багш нар гараар засдаг тул цаг их орох байсан. Гэтэл ЭЕШ долдугаар сарын 5-нд дуусаад их, дээд сургуулиуд 8-9-ний өдрүүдэд элсэлтээ зохион байгуулах урьдчилсан товтой байсан тул цуцлах нь гарцаагүй байсан. Бидний хувьд долоо хоног бүрийн лхагва гаригт бүртгэлд хамрагдсан хүүхэд болгоныхоо и-мэйл хаяг руу нь захидал бичиж байгаа. Энэ нь ЭЕШ-д хэрхэн бэлдэх зөвлөмжүүд, видео хичээлүүд, онлайн давтлагууд, сүүлийн 2017, 2018, 2019 оны сэдэв даалгавруудыг зөв хариу, бодолтынх нь хамт явуулж байгаа юм. Долоо хоногийн гурав дахь өдөр болгон хүүхдүүдэд зөвлөмж, туслах арга хэмжээнүүд байнга явагдаж байна. Түүнээс гадна help.eec.mn шинэ цахим хаягийг нээж ЭЕШ-тай холбоотой бүх мэдээ мэдээллийг нэг дороос авах боломжийг бүрдүүлсэн байгаа. Мөн тухайн сайт руу хүүхдүүд дата ашиглалгүй орох боломжтой” гэлээ.

2020-2021 оны хичээлийн жилд бакалаврын зэргийн хөтөлбөрт их, дээд сургууль, коллежид оюутан элсүүлэх ерөнхий шалгалтын Үндэсний хэмжээний босго оноог төрийн өмчийн их, дээд сургуульд 480, төрийн бус өмчийн их, дээд сургууль, коллежид 410, орон нутгийн их, дээд сургууль, коллежид 400 оноо байхаар тус тус тогтоосон. Элсэлтийн шалгалтын босго оноог Үндэсний хэмжээнд тогтоосон босго онооноос доошгүй байхаар тогтоож Удирдах зөвлөлөөр батлуулан, оюутан суралцагчдын хяналтын тоондоо багтаан нээлттэй ил тод, цахим хэлбэрээр элсэлтийг зохион байгуулахыг их, дээд сургууль, коллежийн захирал нарт үүрэг болгожээ.

С.Лхамсүрэн, О.Цэгмид, ӨДРИЙН СОНИН