Хүүхдийг хүмүүжүүлэх гэж бие бялдарт нь аливаа төрлийн хүчирхийлэл үзүүлэхийг хориглосон хуулийн төслийг Японы засгийн газар дэмжлээ. Улмаар энэ хуулийн төслийг парламентаар хэлэлцэн батлавал улс даяар дагаж мөрдөх юм.

Хуулинд нэмэлт өөрчлөлт оруулснаар эцэг эхчүүд төдийгүй нийгмийн ажилтнууд, сурган хүмүүжүүлэгчид хүүхдийг хүмүүжүүлэх зорилгоор “гар хүрэх”-ийг бүрэн хориглох юм байна.

Энд дуулгахад, хүүхдүүдтэй зэрлэгээр харилцсан бүхий л тохиолдлуудыг судлан, арга хэмжээ авах үүргийг Японы Ерөнхий сайд өнгөрсөн хоёрдугаар сард өгсөн. Учир нь тус улсын 10 настай охиныг эцэг эх нь байнга зодож, хоол өгөлгүй өлсгөж, хүйтэнд байлгасны улмаас амиа алдсан харамсалт явдал олны анхаарлын төвд орсон юм.

Түүнчлэн хоёр жилийн өмнө Японы аврагчид ойд долоо хоносон 7 настай хүүг аварсан хэрэг гарсан байдаг. Хэргийг тодруулахад, эцэг эх нь хүүхдээ зохисгүй авирласных нь төлөө шийтгэх гэж машинаасаа буулгажээ. Тэдний явж байсан зам зэрлэг амьтадтай ойгоор дайрч өнгөрдөг байна. Эцэг эх нь хүүхдээс хагас километр зайд холдон яваад эргэн ирсэн ч хүүхдээ олоогүй гэж цагдаагийнханд мэдээлжээ. Эрлийн ажиллагааны үр дүнг Япон даяар чих тавин хүлээж байсан бөгөөд 7 хоногийн дараа хүүг батлан хамгаалахын хээрийн полигоны байшингаас олсон байна. Энэ нь хүүг буулгасан газраас таван километр зайтай газар гэнэ.