-ОХИДЫГ БАГА НАСНААС НЬ ЭХЛЭН ХҮЧЭЭР БИЕИЙГ НЬ ҮНЭЛҮҮЛДЭГ БАЙСАН-

Гэр бүлийн дөрвөн гишүүн хүн худалдаалах гэмт хэрэг үйлддэг байсныг Цагдаагийн ерөнхий газрын Эрүүгийн цагдаагийн албанаас илрүүлэн өнгөрсөн онд дайчлан баривчилсан байдаг.

Улмаар тэднийг охидыг насанд хүрээгүй байхаас нь эхлэн хүчирхийлэлд байлгаж олон жилийн турш бэлгийн мөлжлөгт байлгаж биеийг нь үнэлүүлдэг байсан мөрдөн шалгалтаар нотлогдсон. Ийнхүү 2019 оны нэгдүгээр сарын 2-ны өдөр Сонгинохайрхан дүүргийн эрүүгийн хэргийн анхан шатны шүүхээс П.Загдсүрэнд 10 жилийн хорих ял, О.Дарханбаярт найман жилийн хорих ял, охин Ө.Дөлгөөнтуул, хүү Ө.Гарьдмагнай нарт таван жилийн хорих ял тус тус оногдуулсан юм.

Гэр бүлийн дөрвөн этгээдийг Монгол Улсын Эрүүгийн хуулийн 13.1 дүгээр зүйлийн хоёр дэх хэсэгт заасан “Олон хүнийг худалдаалсан” үндэслэлээр шүүхэд шилжүүлж, хэргийг шийдвэрлэсэн байдаг. Харин гэмт этгээдүүд хэргээ хүлээн зөвшөөрсөн ч, ялын жилийг бууруулах хүсэлтэйгээр давж заалдах шатны шүүхт хандсан аж. Тэгвэл нийслэлийн давж заалдах шатны шүүх хэргийг хянаж үзээд, анхан шатны шүүхийн шийдвэрийг хэвээр үлдээсэн байна.

Хэргийг эргэн сануулахад, гэр бүлийн дөрвөн этгээдүүд бүлэглэн охид, эмэгтэйчүүдийг худалдан борлуулахад техник хэрэгслээр хангаж, зуучлан, зохион байгуулалттайгаар хууль бусаар бусдын биеийн үнэлүүлэх гэмт хэрэг үйлддэг байсан. Мөн тэд охидын биеийг нь үнэлүүлж олсон мөнгөө өөрсдөө авдаг байсан талаар хохирогчид мэдүүлсэн байдаг.

Тэд 13-аас 38 насны эмэгтэйчүүдийг мөнгө олох хэрэгсэл болгон ашиглаж байсан бөгөөд хохирогч эмэгтэйчүүд биеэ үнэлж байх хугацаандаа жирэмсэлж, төрөн төртлөө худалдагдаж, төрснийхөө найм хоногийн дараа ч зарагдсаар байсан нь шүүхээр тогтоогдсон билээ.