Өчигдөр Нийслэлийн Замын хөдөлгөөн төлөвлөлт, зохицуулалт, инженерчлэлийн газраас Улаанбаатар хотын замын хөдөлгөөнийг гурван бүсчлэлд хуваах талаар мэдээлэв. Тус газрын дарга С.Энхтөрийн хэлснээр нийслэлийг А, В, С гэсэн гурван бүсэд нийслэлийг хуваана. Хотын төвийг А, B бүс гэх бөгөөд хотын төв рүү зөрчилтэй, бүрэн бус тээврийн хэрэгсэлтэй, зам тээврийн осол олон удаа үйлдсэн жолоочийг нэвтрүүлэхгүй гэж мэдэгдсэн нь олон хүний дургүйцлийг хүргэв.

Тодруулбал, Цэцэг төвийн уулзвараас Багшийн төвийн уулзвар хүртэл А бүс, Их тойруу, Баянбүрд, 100 айл, Баруун дөрвөн замаас Зүүн дөрвөн зам хүртэлх уулзварыг В бүс, түүнээс гаднахыг С бүс хэмээн тооцжээ. Хотын төв буюу А бүс рүү бүрэн бус тээврийн хэрэгсэлтэй, торгуулиа төлөөгүй, даатгалд хамрагдаагүй, татвараа төлөөгүй, хугацаандаа үзлэгт хамрагдаагүй тээврийн хэрэгсэл оруулахгүй бөгөөд мөн өдөр бүр тэгш сондгой дугаар үйлчилнэ. Хотын төвийн бүх зогсоолын төлбөрийг 8-15 мянга болгох бөгөөд ингэснээр түгжрэлийг бууруулж чадна гэж үзжээ. Өөрөөр хэлбэл энгийн борчууд хотын төв рүүгээ орж чадахгүй. Харин хурган дарга нар албаны унаатайгаа хотын төвөөр зорчих эрхтэй болж байна.

С.Энхтөр хурандаагийн хэлснээр хотын“А” бүс дэх автомашины хөдөлгөөн 50 хүртэл хувиар буурна гэж байгаа юм. Уучлаарай, хурандаа Хотын дарга асан Э.Бат-Үүл автобус, нийтийн тээврийг нэгдүгээр эгнээгээр явуулдаг болсноос хойш хотын төвийн түгжрэл буурчихсан. Гагцхүү төрийн гурван өндөрлөг, хурган дарга нар ажилдаа ирэх, гэртээ харих үеэр Багшийн дээдийн уулзвар, Төв шуудангийн уулзварыг таг зогсоож замын түгжрэлийг зохиомлоор бий болгодог. Үүнээс өөр тохиолдолд Энхтайвны өргөн чөлөөний автозамын хөдөлгөөн таг гацаж байсныг мэдэхгүй юм. Харин таны гадуурхаад буй В, С бүс буюу Баянбүрд, III, IV хороолол, Хархорин 100 айл, Дарь-Эх, Дамба, Нарантуул, зэрэг газруудаар л хамгийн их түгжрэлтэй байдаг. Энэ түгжрэлийг яаж бууруулах вэ. Ирэх сарын 15-наас хэрэгжиж эхлэх энэ шийдвэртэй чинь зэрэгцэн хичээлийн шинэ жилийн бэлтгэл ажлууд ар араасаа хөвөрнө. Улаанбаатар хотыг зорих хөдөө орон нутгийн иргэдийн тоо ч олширдог. Тэгэхээр дээрх чиглэлийн автозамын хөдөлгөөн 0 тэг зогсолт хийх нь ойлгомжтой.

Бүр цаашлаад нүүрсний өмхий хар утаанд утуулдаг өвлийн гурван сарыг яаж давах вэ гэдэг асуудал яригдана. Хөхөө өвлийн хүйтэнд цэцэрлэг, сургуулийнхаа багачуудыг албанд нь яаж хүргэж өгөх вэ. Нийтийн тээврийн унаандаа сууя гэхээр оюутнуудтайгаа чихэлдээд багтахгүй, ороод суулаа гэхэд мөсөн хонгил шиг хүйтэн. Ийм байхад Монгол Улсын ирээдүй болсон балчир үрс өвлийн туршид уушгины хатгалгаанд дарлуулж антибиотиконд бөмбөгдүүлнэ. Амьд явах баталгаа байна уу.

С.Энхтөр хурандаа, таны яриад буй түгжрэлийг бууруулах аргыг метро, нийтийн тээвэр дээд цэгтээ хүртэл хөгжсөн улс орнуудад л хэрэгжүүлдэг юм билээ. Харин манайх шиг автобусаа хүлээсэн иргэд нь буудал дээрээ хөлддөг, дугуй болон мопед унах зам талбай түй ч байхгүй улсад ажил, сургуульдаа амжиж очих гэж машин унахгүй өөр яах юм бэ. Шийдвэрээ эргэн нэг харна уу. Одоогоос хоёр жилийн өмнө нь Зүүн гар тийш эргэхийг хориглох шийдвэрийг Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч дарга асан П.Баярхүү санаачилж тун удалгүй цуцлагдсан. Богинохон настай энэ шийдвэрт 850 сая төгрөгийг салхинд хийсгэсэн байдаг. С.Энхтөр хурандаа нийслэлийг А, В, С гэсэн гурван бүсчлэлдээ хэдэн төгрөг зарцуулах нь одоогоор тодорхойгүй байна.