Сүүлийн өдрүүдэд үргэлжилсэн борооны улмаас Улаанбаатар хотын байршлын гол мөрний ус үерлэж далан сэтэрч олон айл өрх усанд автан хохирчээ. Нийслэлийн удирдлагуудын тайлбарласнаар энэ байгалийн давагдашгүй хүчин зүйл гэх ч үнэн хэрэгтээ хот төлөвлөлтийн алдаа завхрал, газрын наймааны хор уршиг буюу авлигалын үр дүн юм. Энэ талаар нийтлэлч А.Баатархуяг бичихдээ “Байгалийн давагдашгүй хүчин зүйл ерөөсөө биш, авлигын давагдашгүй хүчин зүйл шүү! Сэлбэ голын урсгалыг хашаад, далан барьсан нэртэй оромдоод үй олон байшин барьсны л гай! Хэрэв далан хоорондын зай хоёр дахин өргөн бол ус халихгүй, түвшин хоёр дахин нам байна... Төлөвлөлтгүй хашаа, гүүр, зам ч усны түвшин өгсөхөд нөлөөлсөн.

Ус тархах суваг шуудуу бүгд хаалттай, Дунд гол руу цутгах сувгууд нь хавчиг, өнөө алдартай авлига хороолол урсгалыг нь хааж, нарийсгасан учраас ус далан хооронд хуримтлагдаад хальсан... Түүнээс биш бороо ердийн байдлаар л зүсэрсэн. Ордог л бороо... Өчигдөр зам дээр ус тунаж байсан өглөө далангаасаа халиад ийм боллоо!

Тодорхой хэлбэл цаашид байнга ийм асуудалтай байна л гэсэн үг! Энэ борооны буруу биш хүний л буруу... Ахиад 7 хоног үргэлжилж бороо орох төлөвтэй үед даланг яаж ч өндөрлөөд нэмэргүй дээ, гол нь урсгалыг нь чөлөөлж тархаах л юм биш үү?” гэжээ. Харин энэ талаар хуульчид бичихдээ “иргэд хотын захиргаанаас хохирлоо нэхэмжлэх эрхтэй…” гэсэн бол нэгэн иргэний сэтгэгдэл ийм боломж бараг байхгүйг нотлох мэт “БЗД 8-р хороо барилгын компани далан сэтэлснээс орон сууцны орц хонгил зам талбай бороо орох бүрд усаар дүүрдэг 55-р байны подволд худалдаж авсан граждаа машинаа тавсан иргэд хохироод үлдсэн дээ.

Дүүрэг хорооны дарга нарт удаа дараа хүсэлт шаардлага тавиад огт анхаарахгүй өдий хүрч байна.Хэлдэг үг нь барилгын компанитай шүүхдэж байгаа л гэсэн.” Гэжээ. Үерийн хажуугаар үймээн тариад байгаа нэг асуудал бол Ерөнхийлөгчийн нэр хүндэд халдсан гэх үндэслэлээр 20 настай залуу, зарим сайтын эрхлэгчийг цагдаагаас шалгаж, байцааж чөлөөт контент сайтаараа цацсан сэтгүүлчийг хорих ялаар шийтгэсэн гэх мэдээ чих дэлслээ. Азийн ардчиллын баянбүрд гэгддэг Монгол улс усны болоод улс төрийн бохирдлоос хамгаалан далан хамгаалалт, дархлаа, үнэт зүйлээ хамтад нь цогцоор нь шинэчлэхгүй бол ялгадсанд хутгалдаж, ямбанд мансуурч дуусаж болохгүй юм.