Дараалсан үерийг урьдчилж бус дараа нь зохицуулах гэж оролддог хотын удирдлагууд, зохих албаныханд “өнгөрсөн борооны хойноос цув нөмрөв” гэдэг үгийг сануулмаар. Уржигдрын усан бороо аюул ослоороо өмнөх тохиолдлуудыг давжээ. Эрдэнэт хүний амь насыг хэд хэдээр нь авч одсон эл үзэгдлийн цаана байгалийн давагдашгүй хүчин зүйлээс гадна төлөвлөж, сэргийлж, замбараатай болгож байх ёстой хотын удирдлагуудын алгуу залхаг байдал нөлөөллөө гэхэд хилсдэхгүй.

Энэ зун хур их бууж хот тойрсон голууд түвшнээсээ хальж хорооллууд усанд автаж иргэд эд хөрөнгөөрөө хохирсон байдал хоёр ч удаа тохиолдоод байхад дараагийн аюултай нөхцөл, байршил аль вэ гэдэгт анхаарал хандуулалгүй наадам хэсээд найгаж явсан хүмүүст хариуцлага тооцох л зөв. Газрын наймааг эхлүүлж, цэцэглүүлж, үржүүлсэн цөөхөн албан тушаалтнуудыг хуулийн байгууллагууд шалгаж тэднээс төдий хугацаанд хохирон иргэдийн бүх хохирлыг нөхөн төлүүлэх арга хэмжээ авч хариуцлага үүрүүлэх шаардлагатай.

Д.Сумъяабазар дарга “...өмнөх удирдлагууд замбараагүй газар олголт бий болгосноос болж ийм байдал үүслээ…” гэдэг тайлбар удаа дараа хэлж байгаа. Иймд хотыг үер усанд автах үндсэн шалтгааныг тарьсан өмнөх этгээдүүдийг өнөөгийн удирдлагууд зохих газраар нь шалгуулах тал дээр анхаарч ажиллаж болох юм.

Энэ удаагийн үерт хамгийн харамсалтай гашуун нь 10 сартай нялх хүүхдээс эхлүүлээд хэд хэдэн хүн амь насаа алдсан нь хэчнээн элэг эмтрэм… Зарим эх сурвалжууд үер усны байдалд иргэдийн өөрийнх буруу бас бий гэлцэх.

Гэвч хотын төвд шахуу бизнесийн үйл ажиллагаа явуулахаар зэхэж байсан өчнөөн ААН усанд хамаг эд хөрөнгөө алдаад тэдний хэлсэн үг бол бид байршлаа мэдэж барилгаа авсан байтал хотын удирдлагуудын бүрэн буруугаас болж хотын төвд байрлаж байсан хамаг юм хэмхэрч хэрэггүй боллоо гэсэн. Эдгээрээр дүгнэхэд тодорхой албан тушаалтан хариуцлага хүлээж огцрох цаашлаад урьдчилж тооцоолоогүй, ухаарч бий болгоогүй бүхнийхээ төлөө хотын үе үеийн бүх удирдлагуудаас хариуцлага нэхэх ёстой.