"CU"-ийн нэгэн салбар дэлгүүрт нэгэн этгээд нэвтрэн орж, худалдагчийг айлгаж, дээрэмдэж буй бичлэг олон нийтийн цахим сүлжээнд цацагдсан.

Энэ хэрэгтэй холбогдуулан Цагдаагийн ерөнхий газрын хэвлэл мэдээллийн төвөөс мэдэгдэл гаргав. Түүнд "Энэ оны арванхоёрдугаар сарын 21-ний өдөр цагдаагийн байгууллагад "Баянгол дүүргийн нутаг дэвсгэрт байрлах CU-д цагаан курткатай, 18 орчим насны хүн дэлгүүрээс юм авах гэж байгаа юм шиг тойрч явж байснаа цаасны хутга тулгаж, айлган сүрдүүлж, гар утас, бэлэн мөнгө зэргийг дээрэмдчихлээ" гэх дуудлага, мэдээлэл ирсэн.

Дуудлага, мэдээллийн дагуу шалгалтын ажиллагаа явуулж, тус гэмт хэргийг үйлдсэн “М”-ыг Баянзүрх дүүргийн нутаг дэвсгэрээс олж тогтоон шалгалтын ажиллагаа явуулж байна. Сэжигтэй этгээд “М” нь өмнө энэ төрлийн гэмт хэрэгт холбогдон шалгагдаж байсан байна" гэжээ.

Б.ЖАРГАЛ