-“KFC”-ГЭЭР ҮЙЛЧЛҮҮЛДЭГ ХҮҮХДҮҮДИЙН ТОО ОГЦОМ БУУРЧЭЭ-

“KFC” эл хуль... 2013 онд тус сүлжээ ресторан нээгдэж томчууд төдийгүй залуучууд, хүүхдүүдийн үйлчлүүлэх дуртай газрын нэгж болж хөл хөдөлгөөн тасардаггүй байлаа. Хүмүүс хоолоо захиалахын тулд дор хаяж таван минут дугаарлаж зогсох нь энгийн үзэгдэл байв. Харин өнөөдөр хамгийн их үйлчлүүлэгчтэй байдаг салбарууд нь үйлчлүүлэгчгүй шахам үйл ажиллагаагаа явуулж байна. “KFC” сүлжээ рестораныг хамгийн анх нээгдэхэд уртаас урт дараалал үүсгэж хоолны амт чанар, үйлчилгээний соёлыг нь магтан шуурч байсан цаг өчигдөрхөн мэт. Харамсалтай нь цаг хугацаа өнгөрөх тусам твиттер, фэйсбүүк орчинд “KFC” рүү хаягласан гомдол үе, үе үзэгдэж, сонсогддог болсон. Гэхдээ энэ удаагийнх шиг ийм олноороо хордож эмнэлэгт ирж байсангүй.

Эргэн сануулахад: Хан-Уул дүүргийн Зайсан дахь салбараар хоёрдугаар сарын 9-12-ны өдрүүдэд үйлчлүүлсэн иргэд хоолны хордлого авч 11-ний өдрөөс эхлэн ХӨСҮТ-д хандсан байдаг. Өнгөрсөн хугацаанд хордлогын улмаас нийт 242 хүнд эмнэл зүйн шинж илэрч, 44 хүн эмнэлэгт хэвтэн эмчлүүлсэн гэх тоон мэдээллийг НМХГ-аас олон нийтэд мэдээлээд байгаа. Олныг цочирдуулсан үйл явдал болсны дараа “Таван богд фүүдс” ХХК-иас хохирогч иргэдэд нөхөн төлбөр олгоно гэдгээ мэдэгдээд байгаа юм.

Дээрх үйл явдлаас хойш “KFC” сүлжээ ресторан байнгын үйлчлүүлэгч нарынхаа итгэлийг алдсан гэдэг нь хэд хэдэн салбараар ороход мэдрэгдэж байв. Төв номын сангийн эсрэг талд байрлах “KFC”-д ажил тарах үеэр хичээлээсээ тарсан 10 жилийн хүүхдүүд, их сургуулийн оюутнууд нэг дор цугларч багагүй оочер дугаар үүсгэдэг. Өчигдөр биднийг 18:00 цагийн орчимд эл газраар ороход 4-6 ширээ үйлчлүүлэгтэй бусад ширээ хоосон байв. Биднийг ажиглалт хийгээд сууж байх үед оюутан бололтой дөрвөн залуу бидний хажуугийн ширээнд сууснаа юу захиалах эсэхээ шийдэж ядан хоорондоо “Хүмүүс шиг хордлого авчихвал яах вэ. Хүмүүс ахиад хоолны хордлогод орвол “KFC” дампуурлаа зарлах байлгүй. Зоригтой, зоригтой шууд очоод захиал” гээд чанга, чанга инээлдэн ярилцана. Төд удалгүй захиалсан хоол нь гарч хоёр нь явж авчирав. Нэг нь соруултай pepsi ундаагаа амсаж үзснээ “Чихэртэй ус юм уу, ямар ч амт алга” гэхэд хар малгайтай цамцтай махлаг залуу “Өмнө нь ямар сайхан амтыг мэдэрдэг байлаа. Энэ одоо юу вэ. Ямар ч амтгүй. Зүгээр л цайны газраас мантуун бууз, хуушуур авч идье гээд байхад” гээд нэгийгээ нэрээр нь дуудан хараалын үгсийг урсгав.

-ХООЛНЫ АМТ ЧАНАР НЬ СУЛАРСАН САНАГДДАГ-

Бид тус салбараар үйлчлүүлж буй ахимаг насны хоёр эмэгтэйгээс “Та KFC-ийн байнгын үйлчлүүлэгч үү” гэхэд “Найз хүүхэн маань өчигдөр Завхан аймгаас сургалтад хамрагдахаар ирсэн юм. Сая сургалтыг нь дуусахаар нь хамгийн ойр харагдах хоолны газар руу ороод ирлээ. Чимээ шуугиангүй сайхан л байна. Цагаан сарын дараахан баахан хүн хоолноос нь ордлого авсан л гэж дуулдсан. Бодож санах юмгүй л ороод ирлээ. Хамгийн анх монголд салбараа нээж байхад нь хүүхдүүдтэйгээ байнга үйлчлүүлдэг байлаа. Сүүлийн 2-3 жил зорьж ирэхээ байсан. Энэ миний л бодол шүү хоолны амт чанар нь суларсан санагддаг. Монголчууд бид чинь алдсан нэгнээ тохойноос нь өргөөд босгодог ард түмэн. Алдсан алдаан дээр нь дөрөөлөөд яахав. Хаа хаанаа хариуцлагатай байхад болох биз дээ” гэж бидэнтэй сэтгэгдлээ хуваалцсан юм. Биднийг хоёр цагийн хугацаанд эл салбар дээр байхад 10 жилийн сурагчид, хүүхдээ дагуулсан эцэг, эх нэг ч орж ирсэнгүй. Үйлчлүүлэгч нарын ихэнх нь оюутнууд эсвэл хосоороо яваа залуучууд байв.

Бид “Галлериа Улаанбаатар”-д үйл ажиллагаагаа явуулдаг KFC-ийн салбараар ороход ч гэсэн адилхан дүр зураг ажиглагдаж байв. Ихэнх ширээ нь хоосон, ширээнд суусан үйлчлүүлэгч нар нь юм захиалаагүй, интернэт сүлжээг нь ашиглан хичээл хийж буй оюутнууд их харагдав. Тус салбарын зохион байгуулагчаас “Олныг хамарсан хоолны хордлогын дараа танай салбарын үйлчлүүлэгч нар тоо багассан уу” гэж асуухад “Бид энэ талаар юм ярих эрх байхгүй. Та төв байгууллагаас асуусан дээр байхаа” гэж хариулав. Харин үйлчлүүлэгчид нь “Ахиж асуудал үүсгэхгүй гэдэгт итгэлтэй байгаа учраас үйлчлүүлж байна” гэв. Ер нь орсон салбар бүр л үйлчлүүлэгч багатай, ажилчид нь үг хэлэх эрхгүй гэж байв.

Гэрэл зургийг Г.БАЗАРРАГЧАА