-Оюутолгойн гэрээний төслүүд арван жил нууц байлаа гэсэн хуурамч ном зохиол олон бичигдлээ гэв-

УИХ-ын гишүүн асан С.Баярцогт Оюутолгойн гэрээтэй холбоотой асуудлаар хэвлэлийн хурал хийлээ. Тэрээр “Оюутолгойн гэрээний төслүүд арван жил нууц байна гэсэн хуурамч ном зохиол их бичигдэх боллоо. Шийдвэр гаргагчдыг үнэн бодитой мэдээллээр хангах ёстой юм байна. Тиймээс УИХ дээр гэхэд Аюурсайхан гишүүн танилцуулсан Татварын таван байцаагчийн гаргаж 41 асуудал гэхэд хуулийн үг, үсгийг өөрчилсөн, англи орчуулга нь буруу байгаа гээд ярих зүйл их байна. Тиймээс би соён гэгээрүүлэх ажлын хүрээнд “Оюутолгой төслийн 2009 оны гэрээ” хэмээх энэ томоохон товхимлыг гаргалаа. Хоёрдахийг нь ч хэвлүүлнэ. Энд Оюутолгойн үндсэн дөрвөн гэрээ, англи орчуулгатайгаа, нийт найман гэрээ орсон. Мөн энэ гэрээтэй холбоотой 2000 оноос буюу Н.Энхбаярын Засгийн газраас У.Хүрэлсүхийн Засгийн газар хүртэлх холбогдох бүх баримт бичгийг хавсаргасан. Таван шинжээчийн 41 асуудлыг тайлбарласан дүгнэлтийг ч оруулсан. Хуулинд холбогдож буй асуудлуудаа шар өнгөөр тодруулсан байгаа. Энэ номыг Үндэсний номын сан, томоохон их дээд сургуулиудын номын сан, хэвлэл мэдээллийн байгууллагуудын редакцид нэг нэгийг өгнө.

Оюутолгойтой холбоотой олон нийтэд ил байж болох бүхий л юмыг бичсэн. Номондоо харин Оюутолгойтой холбоотой хэргийн тухай бичээгүй. Юу гэж бичих юм бэ. Монгол Улсад 434 тэрбум төгрөг оруулж ирэх гэрээг хийснийхээ төлөө би их юм сонсож байна. Надтай холбоотойгоор Монгол Улс, Швейцари хоёр улсад хавтаст хэрэг нээгээд шалгаад явж байгаа. Цаг хугацааны эрхээр удахгүй ил болно. Ер нь би ойрын үед тэр талаар нээлттэй ярина. Яг өнөөдөр би Оюутолгойн талаар өөртэйгөө холбоотой мөрдөн байцаалтын тухай ярихгүй ээ. Би 2017 онд АТГ-т контейнер бичиг баримт танилцуулсан. Би хөгжмийн зохиолч Н.Жанцанноров гуайн хөдөлмөрийн баатрын хүндэтгэлийн ёслолд очиход олон хүн надад “Хүү минь чи дуугүй байгаад байж болохгүй” гэж захьсан юм. Тиймээс би цаашид дуугарч байх болно” гэх мэтээр ярьсан.

Тэрээр сэтгүүлчдийн “Оюутолгойн хөрөнгө оруулалтын гэрээ сайжрах уу. Монгол Улс хэзээнээс ашгаа хүртэж эхлэх вэ” гэсэн асуултад “Энэ товхимолд би гарцыг нь тодорхой бичээд арын хавтасны дотор талд хэдэн оноос хэдэн төгрөгийн ашиг олохыг графикаар үзүүлсэн. Би Оюутолгойн гэрээний төлөө авилга, хээл хахууль аваагүй” гэсэн юм.