Ц.Элбэгдорж БНСУ-ын иргэнээс гурван сая ам.доллар залилжээ. Энэ талаар өмгөөлөгч К.Манлай ”Миний энд ирсэн гол шалтгаан нь БНСУ-ын Ү Ти Куан гэдэг хүний өмгөөлөгчөөр ажиллаж байгаа. Энэ хүн маань хүндэтгэн үзэх шалтгааны улмаас хуралд оролцож чадсангүй. Энэ хүнд юу тохиолдсон бэ гэвэл Ү Ти Куан нь 2019 оны есдүгээр сарын 11-ний өдөр Монгол Улсын Ерөнхийлөгч Х.Баттулга, Монгол Улсын Ерөнхий сайд У.Хүрэлсүх, Засгийн газрын хэрэг эрхлэх газрын дарга Л.Оюун-Эрдэнэ, Хууль зүйн сайд Ц.Нямдорж, Улсын ерөнхий прокурор Б.Жаргалсайхан нарт өргөдөл гаргасан.

Энэ өргөдлийн гол утга нь Монгол Улсын ерөнхийлөгч асан Ц.Элбэгдорж, Ерөнхийлөгчийн тамгын газрын дарга асан П.Цагаан, зөвлөх Л.Пүрэвсүрэн, Монгол Улсаас БНСУ-д суух үүрэг гүйцэтгэгч Ж.Сүхээ зэрэг төрийн өндөр албан тушаалтнуудад гурван сая ам.долларыг залилуулж алдсан. Өнгөрсөн 2013 оны сонгуульд зарцуулах мөнгө гэж 700 мянган ам.долларыг надаас авсан эдгээр хэргийг шийдэж өгнө үү гэсэн байгаа. Яагаад ийм оройтож өгч байгаа вэ гэхээр Монгол Улсад төр цаг эргэлээ миний хэрэг нааштайгаар шийдэгдэх боломжтой болсон. Өмнө нь өгсөн өргөдөл гомдол огт шийдэгдээгүй ямар нэг байдлаар дарагдаж өнгөрсөн асуудал байсаар ирсэн гэдэг тайлбарыг өмгөөлөгч надад тайлбарласан. Хуульч, өмгөөлөгч хүний зүгээс “Та яагаад хэргийн хөөн хэлэлцэх хугацаа дуусчихсан үед өргөдөл гаргаж байгаа юм бэ” гэдэг тайлбарыг авсан. Энэ хэргийн утга нь хохирогч нь 2011 онд өөрийн санаачилгаар нэг сая ам.доллараар хандивын үйл ажиллагаа хийж Монгол Улсын гэр хороололд суудаг хашаа байшинтай иргэдэд шалны халаалтыг өөрийн нэг сая ам.долларын хөрөнгөөр үнэгүй суулгаж өгсөн. Тэр үед Солонгос улсдаа “Ү-Жү-Мү” гэдэг шалны халаалтын үйлдвэртэй Солонгос иргэн нь БНСУ-д суух үүрэг гүйцэтгэгч ажилтай байсан Ж.Сүхээ гэдэг хүнтэй холбоотой танил. Таныг энэ хүнтэй танилцуулаад өгье, тантай уулзах хүсэл сонирхолтой байна гэсний дагуу тэр үед Ж.Сүхээ, Ерөнхийлөгчийн тамгын газрын дарга асан П.Цагаан, Л.Пүрэвсүрэн нартай танилцуулж уулзуулсан байдаг.

Эдгээр хүмүүс нь манай үйлчлүүлэгчид “Та Монгол Улсад их үйлсийн аян хийлээ. Энэ ажлын тань хариуд бид танд 10 сая ам.долларын үнэ ханштай алтны үндсэн ордыг таван сая ам.доллараар өгье. Та энийг худалдаж аваач” гэсэн саналыг бизнесийн хувьд ашигтай гэж үзээд гэрээ байгуулаад гурван сая ам.долларыг шилжүүлсэн. Лицензээ худалдаж аваад 400 гаруй мянган ам.доллараар хайгуул хийхэд нөөц нь худлаа батлагдсан юм байна, ямар ч алтны нөөц байхгүй юм байна гэдгийг тогтоосон. 2011 оны арваннэгдүгээр сард ТЕГ, ЦЕГ-т гомдол гаргасан. Үүнээс гадна 2013 оны Ерөнхийлөгчийн сонгуульд ашиглах нэг сая ам.доллар нэхсэний хариуд надад нэг сая ам.доллар өгөх боломж алга гээд 700 мянган ам.доллар өгсөн байна. Өмгөөлөгч миний ярьж байгаа эдгээр фактууд бүгд бичгийн болон видео, аудио бичлэгтэй. Улсын мөрдөн байцаах газар, Нийслэлийн прокурорын газраас энэ хэргүүдийг удаа дараа хууль бусаар хэрэгсэхгүй болгож хохироож байсан. Арваннэгдүгээр сард дахин гомдол гаргасны дараа улсын мөрдөн байцаах газрын чиглэлийн ахлах мөрдөн байцаагч Даваадаш 2002 оны Эрүүгийн хуулийн 148 дугаар зүйлийн 148.4 зүйлд зааснаар залилах гэмт хэргээр эрүү үүсгэн шалгасан боловч Нийслэлийн прокурорын газраас үл мэдэгдэх шалтгаанаар төрийн нууцад авсан гэсэн. Хохирогчийг нэг ч удаа байцаагаагүй, хохирогчоос нэг ч удаа асуугаагүй. Хохирогчоос мэдүүлэг авахгүйгээр хэргийг хаасан.

Хэргийг хааж хэрэгсэхгүй болгосон прокурорууд нь Ж.Ганцэцэг, Эрхэмбаяр нар гэдгийг миний үйлчлүүлэгч надад хэлсэн. Төрийн өндөр албан тушаалтнуудад 2019 оны есдүгээр сарын 11-ний өдөр гаргасан өргөдлийн дагуу энэ хэргийг дахин хэлэлцэж, анхаарч өгнө үү хэмээн ажлын хэсгээс хүсч байна” гэжээ.

Г.Баясгалан