Гишүүд асуулт асууж, үг хэлж дууссаны дараа Байнгын хорооны саналаар Оюутолгойн ордын ашиглалтад Монгол Улсын эрх ашгийг хамгаалах тухай УИХ-ын тогтоолын төслийг батлая гэсэн саналын томъёоллоор санал хураалт явагдаж, ээлжит чуулганд оролцсон 42 гишүүнээс 30 нь дэмжсэн гэсэн үзүүлэлт самбар дээр гарсан хэдий ч УИХ-ын дарга Г.Занданшатар “УИХ-ын гишүүн С.Бямбацогт, Х.Болорчулуун, С.Жавхлан, Ш.Раднаасэд, О.Батнасан, Л.Энхболд, Х.Баделхан нарын гишүүд дэмжсэн санал өгсөн боловч сөрөг гарлаа” гэж байна. Эдгээр гишүүдийг төлөөлж С.Бямбацогт үг хэлнэ” гэсэн юм.

УИХ-ын гишүүн С.Бямбацогт: “Оюутолгой ордын ашиглалтад Монгол Улсын эрх ашгийг хангуулах тухай тогтоолын төслийг дэмжиж байгаа. Олон жил бид Оюутолгойн гэрээг сайжруулах ёстой гэдэг талаар ярьсан. Сая олон гишүүний кноп ажиллахгүй байсан болохоор энэ санал хураалтыг хүчингүйд тооцож дахин санал хураалт явуулж өгнө үү” гэсэн горимын санал оруулж байна” гэсэн юм. С.Бямбацогт гишүүний оруулсан горимын саналыг дэмжих эсэх талаар санал хураалт явуулахад оролцсон гишүүдийн 85,1 хувийн саналаар анхны санал хураалтыг хүчингүйд тооцож, дахин санал хураалт явуулахаар болсон.

Оюутолгой ордын ашиглалтад Монгол Улсын эрх ашгийг хамгаалах тухай УИХ-ын тогтоолын төслийг батлая гэсэн эцсийн санал хураалтад 46 гишүүн саналаа өгснөөс дөрвөн гишүүн татгалзаж, 42 нь зөвшөөрч, 91,3 хувиар баталсан хэдий ч, УИХ-ын дарга Г.Занданшатар “УИХ-ын гишүүн Я.Санжмятав, Ц.Даваасүрэн, Ж.Батзандан нар дэмжсэн гэдгээ протоколд тэмдэглүүлсэн болохоор 100 хувийн саналаар тогтоолын төсөл батлагдлаа” гэж зарласан юм.