УИХ-ын гишүүн, “Болор цом” эзэн яруу найрагч Гомпилдоогийн Мөнхцэцэг өнөөдөр “Эх соёл-Их үндэс” хөтөлбөрийн хүрээнд зохион байгуулагдсан “Миний эх орон” эссэ бичлэгийн уралдаанд оролцогчдыг Төрийн ордонд хүлээн авч уулзсан юм. Уламжлалт өв соёлоо хамгаалах, хойч үедээ өвлүүлэх, ардын авьяастнуудыг тодруулах, тэднийг дэмжих зорилготой уг хөтөлбөрийг эрхэм гишүүн Г.Мөнхцэцэг санаачлан, 2017 оноос хэрэгжүүлж байгаа юм. Говь-сүмбэр, Дорноговь аймгийн ерөнхий боловсролын сургуулийн сурагчдад эх хэлний боловсролын ач холбогдлыг таниулахаар “Миний эх орон” эсээ бичлэгийн уралдааныг энэ оны арав, арваннэгдүгээр сард зохион байгуулжээ.

Уралдаанд нийт 130 сурагч оролцсон бөгөөд яруу найрагчид, багш нарын бүрэлдэхүүнтэй шүүгчид дөчин бүтээлийг шалгаруулсан байна. Сурагчдын эдгээр бүтээлийг эмхэтгэн “Миний эх орон” ном болгон хэвлүүлснээ өнөө танилцуулав. Г.Мөнхцэцэг “Та бүгдийн сурагч насны гэгээн дурсамж, санаж сэдэх, сурах нэгэн учиг, аав ээж, багш нартаа төдийгүй эх орондоо барих нэгэн нандин бэлэг байгаасай хэмээн хүсч шилдэг эсээнүүдийг эмхэтгэлээ” хэмээсэн.

Монгол Улсын соёлын гавьяат зүтгэлтэн, дууны шүлгийн нэрт яруу найрагч Шагдарсүрэнгийн Гүрбазартай сурагчдыг уулзуулах арга хэмжээг Төрийн ордны номын санд зохион байгуулав. Уулзалтын төгсгөлд “Эх соёл-Их үндэс” хөтөлбөрийн хүрээнд зохион байгуулагдсан “Миний эх орон” эсээ бичлэгийн уралдааны шилдэг бүтээлүүдийг танилцуулж, УИХ-ын гишүүн Г.Мөнхцэцэг шагналуудыг гардууллаа.