Бидний хүслээс үл хамааран коронавирусын тархалт өөрөө түгшүүрийг төрүүлж байгаа юм. Унтаад л босоход таксины тоолуур гүйх шиг хурднаар тархаж байгаа энэ өвчин бүгдийг айлгаж байна. Эмчлэх арга, эдгэрэх зам нь хараахан тодорхой болоогүй байгаа титэмт вирус дэлхий дахиныг түргэн авхуулаад зогсохгүй, хүн чанарын шалгуур болж байх шиг. Шинэ коронавирус гэгчтэй ил далд тэмцсээр бид шинэ сартай золголоо.

Амны хаалтаа алгасалгүй зүүчих

Сар шинийн барилдаан, шинэ гарсан жилийн өнгө гээд огт өөр сэдэв хүн бүрийн амнаас гарч байдаг ид үед бид хүссэн ч, хүсээгүй ч аюул дагуулсан титэмт вирусын талаар ярьж, сануулдаг боллоо. Эхэндээ нэг их тоохгүй байсан бол одоо эвлэлдэн нэгдэж, энэ аюулт өвчнийг эх орондоо нэвтрүүлэхгүйн төлөө тэмцэж эхэллээ. Энэ тун сайн хэрэг. Бидний төлөө нойр хоолоо умартан ажиллаж байгаа эрүүл мэндийн салбарынхан, Онцгой байдлынхан, цагдаагийнхан, мэргэжлийн хяналтынхан, хилийнхэн гээд нийт 6000 гаруй ажилтан албан хаагчдадаа юуны өмнө талархлаа илэрхийлье. Ар гэртээ ч харих завгүй 24 цагаар ажиллаж байхад тэдэнд ажлынх нь байранд халуун аарц буцалгаад аваачиж өгдөггүй юм аа гэхэд тавьсан шаардлагыг нь биелүүлж, амны хаалтаа алгасалгүй зүүчих. Энэ чинь нэг талаараа таны соёл, өөрийгөө хайрлах ухаан юм. Амны хаалт зүүснээр төрийн бодлогоо дэмжиж буй сүрхий үйлдэл биш ч гэлээ төрөл төрөгсдөө, төрсөн биеэ хамгаалж байгаа хэрэг. Та эрүүл бол гэр бүл чинь бас эрүүл байна гэсэн үг.

Сэтгэлийн өглөг багаддаггүй

Коронавирусын халдварыг улс даяараа хамтын хүчээр давах аянд хувь хүн, албан байгууллагууд нэгдсээр байгаа нь сайшаалтай. “Хар сарнай” хамтлагийн ахлагч С.Амармандах "Дэлхий дахинд тархсан аймшигт коронавирусын халдварт өвчин эх гараг дэлхийг минь айлгаж байна. Өдөр шөнөгүй, нойр хоолгүй ажиллаж байгаа манай эрүүл мэндийн ажилтнууд, ОБЕГ, Цагдаагийн байгууллага болон МХЕГ-ын нийт хамт олонд баярлалаа. Энэ муухай өвчнийг эх орондоо оруулж ирэхгүйн төлөө өдөр шөнөгүй ажиллаж байгаа та бүхэнд талархаж байна. Би Монгол Улсын иргэний хувьд ирээдүй хойч үеийнхээ төлөө, эрүүл мэндийн төлөө сэтгэл зүрхнээсээ хандив өгөхөөр хүрэлцэн ирлээ” хэмээгээд 30 сая төгрөг болон 1500 маскийг ЭМЯ-нд гардуулж өгсөн нь цахим ертөнцөд шуугиан тарьсан гэрэл гэгээтэй мэдээлэл байлаа. Түүнчлэн “ХАРУ” групп харилцагчдынхаа зээлийн эргэн төлөлтийг нэг сараар хойшлуулсан бол, “Дүнжингарав” худалдааны төв гурав, дөрөвдүгээр сарын түрээсээ 60 хүртэлх хувиар хөнгөлжээ. Мөн Шөнийн зах түрээсийн төлбөрөө хоёр сарын хугацаатай 30 хувь хөнгөлсөн байна.

Түүнчлэн “Aimar sanaa” контентийн хамт олноос коронавирусын эсрэг тэмцэхэд зориулж, ЭМЯ-нд 10 сая төгрөгийн хандив өргөжээ. Тэд “Коронавирусын эсрэг бүх төрлийн контентийг бэлтгэж, ЭМЯ болон бусад холбогдох байгууллагуудын мэдээ мэдэээллийг өөрийн олон нийтийн цахим сувгуудаар түгээж өгөх болно гэдгээ мэдэгдээд “Энэ нь бидний нийгмийн хариуцлагын хүрээнд хийж буй сайн дурын ажил бөгөөд коронавирусын халдвараар нэг ч Монгол хүн өвдөж шаналах ёсгүй тул “АЙМАР ЗӨВ” аяныг эхлүүлж байна” гэжээ.

Ер нь коронавирусын эсрэг монголчууд эрвийх дэрвийхээрээ тэмцэж байна. Зарим нэр хүндтэй зоогийн газар титэмт вирусын эсрэг тэмцэж байгаа мэргэжлийн хяналт болон цагдаагийн ажилтнуудад үнэгүй хоолоор үйлчлэх тухайгаа цахим орчноор зарласан бол, Баянзүрх дүүргийн Улаанхуаранд байрлах нэгэн дугуй завсарын эзэн, эгэл жирийн иргэн цагдаа, эмнэлэг, онцгойгийн машины дугуйг үнэгүй засах зар тавьж, үйлчилж байна.

УЛС ОРНУУДЫН ЯЛГАА: КОРОНА

Хятадад: Гэртээ тусгаарлагдаж буй иргэдийн гэрийн хаалга, орцыг битүүлж гагнав.

Украйнд: Вуханаас ирсэн зорчигчдын автобусыг жагсагчид зогсоож, дайрч чулуу, мод шидлэн “зайл” гэж ад үзэв, хамгаалалтад гарсан найман цагдаа зодуулав.

Орост: Вуханаас ирсэн оюутнуудыг өөрсдийнх нь зардлыг төлүүлж ачааны онгоцоор чихэж ирэв. Хувинд ээлжлэн бие засаж зутрав.

Хойд солонгост: Сэжигтэй нэг тохиолдлыг устгав.

Иранд: Коронавирусын өвчтэй хүмүүсийг эмчилж буй эмнэлгийг гаднаас нь шатаав.

Монголд: Ажиглалтад тусгаарлагдсан иргэд зочид буудлын өрөө шаардаж, эмч нарт эсэргүүцэл үзүүлэн халуунаа хэмжүүлэхгүй гэлээ.

Титэмт вирусын түгшүүртэй зэрэгцээд энэ амралтын өдрүүдэд сошл орчинд түгж маш олон лайк даруулж, шейр хийлгээд байгаа мэдээлэл энэ байна. Монголчууд хошигнох чадвар маш өндөртэй ард түмэн. Тэр хэрээрээ ч ухаарал авах чадамжтай байх хэрэгтэй.

Хөдөлгөөний хязгаарлалтыг хоёр цагийн өмнө нээхээр болов

Эцэст нь Улсын онцгой комисс ням гаригт найм дахь удаагаа хуралдаж, Улаанбаатар руу орох, гарах хөдөлгөөний хязгаарлалтыг гуравдугаар сарын 3-ны мягмар гаригийн 06.00 цагт нээхээр боллоо. УОК-ын зарим гишүүн хөдөлгөөний хоригийг ням гаригт цуцалж өгөх хүсэлт гаргасан ч бүтсэнгүй. Харин өглөөний 08.00 цагт нээхээр урьд нь товлосон цагаасаа хоёр цагаар наашлуулж, 06.00 цагт нээхээр болсон юм. Хот хоорондын замыг нээснээр Улаанбаатар хот руу 40 гаруй мянган иргэн, 14 мянга орчим тээврийн хэрэгсэл орж ирнэ гэж цагдаагийн байгууллага тооцоолсон байна. Бөөгнөрөл, түгжрэл үүсгэхгүйн тулд Улаанбаатар хот руу нэвтэрдэг долоон үндсэн хяналтын цэгт нэмэгдлээр найман урсгал нээж, нэг урсгалт хөдөлгөөнийг таван бүсэд хуваахаар болжээ. Шалган нэвтрүүлэх долоон цэгт ХӨСҮТ-ийн баг 24 цагаар хоёр хоног ажиллахаар болсон байна. Мөн Улаанбаатар хот руу чиглэсэн улсын чанартай замуудад орон нутгийн эмнэлгийн тусламжийн бүлгийг 50 км тутамд томилж, болзошгүй осол, зөрчлөөс сэргийлэхээр төлөвлөжээ. Аймгуудын Онцгой байдал, Эрүүл мэндийн байгууллагаас бүрдсэн 105-ын бүлэг ч хоёр хоногийн хугацаатай ажиллах юм.