Орон сууц захиалсан иргэд эд хөрөнгө, эрүүл мэндээр хохирч байгаа талаар Орон сууц захиалагч иргэдийн төлөөллөөс мэдээлэл хийлээ.

Энэ үеэрээ тэд: "Иргэд баригдаж байгаа, ашиглалтанд ороогүй орон сууц захиалахдаа гэрээ хийгээд төлбөрөө төлөөд явдаг. Гэтэл нөгөө орон сууц нь хугацаандаа ашиглалтанд ордоггүй, эсвэл тухайн захиалсан орон сууцыг хоёрдогч, гуравдагч этгээдүүдэд давхар худалдан борлуулах, туслан гүйцэтгэгч компанийн ажлын хөлсөнд олгох боломж нь ямар ч хяналтгүйгээр барилгын компанид нь байдаг. Үүнээс болоод захиалагчид эд хөрөнгө, цаг хугацаа, бүх зүйлээрээ хохирдог.

Үүнийг зохицуулах хууль эрхзүйн зохицуулалт манай улсад алга. Үүнээс болоод өнөөдөр "Нисэх-Цагаан хаалга" хотхоны 500 орчим захиалагч, гэр бүлийнх нь 5000 орчим хүн эд хөрөнгө, сэтгэл санаа, эрүүл мэндээрээ хохироод 5 жил гаруй боллоо.

Төлсөн мөнгөө буцааж авч чадахгүй нөхцөлд хүрсэн учраас төрийн гурван өндөрлөгт шаардлага хүргүүлж байна. Захиалсан байрандаа орж чадахгүйгээс болоод иргэд 5-6 жил өрийн дарамтанд орлоо. Хүүхдүүд нь сургууль цэцэрлэгээс завсардсан байна. Эрүүл мэндийн шалтгаантай олон асуудлууд үүслээ. Цус харвачихсан хүн байна. Бүр алга болчихсон хүн ч байна шүү дээ.

Энэ байрнаас болоод галзуурсан хүн ч байна. Ийм байж болдог юм уу? Шударгаар хөдөлмөрлөөд олсон мөнгөө нэг луйварчинд алдчихлаа. Энэ 500 өрх буюу 5000 орчим иргэнд тулгамдаад байгаа асуудлыг төрийн хүмүүс газар дээр нь ирж ажиллаач ээ.

Аргаа бараад, туйлдаж байна. Монгол улсад эзэн байдаг бол хариуцлагатай баймаар байна. Эх орондоо ийм хэцүү, дорой амьдрана гэж бодсонгүй. Иргэдээ туйлдуулж, цөхрүүлээд гудамжинд хаях гээгүй биз дээ? Анх зөвшөөрөл өгсөн 12 субьект өнөөдөр араас нь явахгүйгээр, компани иргэний хооронд асуудал гэж хаяхгүй шүү. Одоо ажлаа хийх цаг чинь ирсэн. Нийслэлээс ажлын хэсэг байгуулсан. Үр дүн гараагүй. Хан-Уул дүүрэг дээр бас ажлын хэсэг байгуулж өгсөн. Гэвч Хан-Уул дүүрэгт байгуулсан ажлын хэсэг бидэнтэй хичнээн хамтраад ч асуудал шийдэх хэмжээнд яагаад ч хүрч чадахгүй байна. Энэ барилгыг ядаж хаалга хаах хэмжээнд болгоод өгчих. Дотор нь цементээрээ үлдэг. Тэр шал, обой гээд дотор хийх ажлыг иргэд дахиад өөрсдөөсөө мөнгө гаргаад шийдье гэж байгаа юм." гэв.