2024 оны нэгдүгээр сарын 5-9-ний хооронд буюу сүүлийн 5 хоногийн хугацаанд ГССҮТ болон Салбар эмнэлгийн Яаралтай тусламжийн тасагт нийт 2012 хүн тусламж үйлчилгээ авчээ. Осол, гэмтлийн дийлэнх шалтгааныг уналтын шалтгаант бэртэл гэмтэл эзэлж байгаа бөгөөд сүүлийн өдрүүдэд халтиргаа гулгаа болон цана чаргатай холбоотой тохиолдол эрс нэмэгджээ.

Эдгээр өдрүүдэд халтиргаа гулгаанаас үүдэлтэй бэртэл гэмтэл авсан 478, цана чарганаас унаж гэмтсэн 75 хүн яаралтай тусламж үйлчилгээ авсан аж. Зөвхөн нэг өдрийн байдлаар буюу 2024 оны нэгдүгээр сарын 9-ний өдөр халтирч унасан 103, цана чарганаас үүдэлтэй бэртэж гэмтсэн 6 хүн тусламж үйлчилгээ авчээ. Халтиргаа гулгаанаас үүдэлтэй 2022 оны 11 дүгээр сараас 2023 оны нэгдүгээр сар хүртэл 3749, 2023 оны 11 дүгээр сараас 2024 оны нэгдүгээр сар хүртэл 5156 хүн яаралтай тусламж үйлчилгээ авсан байна.

Халтирч унах бэртэл гэмтлийн дийлэнх хувь нь гавал тархи, гар сарвуу, тохой, шуу, хөлийн шилбэ, өвдөг, хүзүү нуруу, аарцаг ясны гэмтэл авч буй юм.

Гэмтлийн хувьд зөөлөн эдийн бэртэл, доргилт, хөхрөлт, няцралтаас илүү мөчдийн хугарал зонхилон тохиолдож буй юм. Хүнд хэлбэрийн гэмтэлд гавал ясны хугарал, тархины эдийн гэмтэл, аарцаг нуруу, хөлийн шилбэ болон дунд чөмгийн хугарал багтаж байна.

Иргэд:

-Чанарын шаардлага хангасан цана чарга сонгох

-Дов жалганы ойролцоо болон өндөрлөг газраас гулгахгүй байх

-Автомашины араас чаргаа чирүүлэхгүй байх

-Хэт олон чаргаар залгаж гулгахгүй байх

-Хашаа, шон, автомашин болон бусад зүйлийг мөргөхөөс сэргийлэх

-Цана, чаргаар гулгаж байгаа хүмүүсийн өөдөөс сөрж алхахаас зайлсхийх

-Бага насны хүүхэддээ тавих анхаарал халамжаа сайжруулж, болзошгүй эрсдэлээс урьдчилан сэргийлэх шаардлагатайг эмч мэргэжилтнүүд зөвлөлөө.