Өмнөговь аймгийн нийт нутгаар өчигдрөөс цас орсон бөгөөд зарим газраар цасан шуургатай, цасны зузаан 1-8 см байна гэж тус аймгийн УЦУОШГ-аас мэдээллээ. Мөн энэ сарын 17, 18-нд аймгийн зарим газраар цас орно, 16-наас хүйтний эрч суларч шөнөдөө 21-26 градус, өдөртөө 5-10 градус хүйтэн байх цаг агаарын урьдчилсан мэдээ гарчээ.

Энэ жил ихэнх нутгаар цас ороогүйн улмаас мал усгүйдэж, малчид малаа 3-5 км газар тууж худгаас усалж байна. Тиймээс орон нутгийн удирдлагууд, малчид, иргэдээс худаг, уст цэгийн хангамжийг нэмэгдүүлэх шаардлагатай байна гэсэн саналыг ХХААХҮЯ-нд ирүүлж байгаа. Харин баруун бүсийн зарим аймагт цас ихтэй байгаагаас мал өвөлжилт, хаваржилт хүндэрч болзошгүй байгаа аж.