Ард түмэн тэвчдэг гэхдээ өөрчилж чаддаг гэдгийг Украйны Ерөнхийлөгчийн сонгууль харууллаа. Ядуурал-хоосрол-цөхрөл гуравт нэрвэгдсэн Украйны ард түмэн шинэ улс төрийг сонгосон нь тэд худал амлалтаас залхсаны илэрхийлэл байв. Украйн Европын хамгийн ядуу улс орон болсон төдийгүй авлига хээл хахууль, албан тушаалтнуудын тансаглал, улс эх орныг жолоодлогогүй болгож өнөөдрийн өлсгөлөн Украйныг бий болгожээ хэмээн барууны хэвлэлүүд онцолж байна.

Украины Сонгуулийн төв хорооноос мэдээлснээр, саналын хуудасны 65 хувийг тоолсны дараах байдлаар Владимир Зеленский сонгогчдын 73.03 хувийн саналыг авсан бол Петр Порошенкод сонгогчдын 24.64 хувь нь саналаа өгсөн байна. Ялалт байгуулсан Зеленский ба шинэ улс төр, шинэ эхлэл Украйнчуудыг хүлээж байна. Зеленский ялалт байгуулсныхаа дараа хэлсэн үгэндээ, Ард түмэн сольж чаддаг, ард түмэнд бүх хүч байдгыг харлаа. Петр Порошенко чиний худал амлалт, хийсэн үйлдлийн чинь үр дүн нь би байна хэмээн онцолжээ.

Тус улсын одоогийн Ерөнхийлөгч Петр Порошенко ялагдлаа хүлээн зөвшөөрсөн боловч улс төрөөс явахгүй гэдгээ мэдэгдсэн юм. “Ирэх сард би төрийн тэргүүний албан тушаалаас бууна. Украины ард түмэн ингэж шийдлээ. Би энэ шийдвэрийг хүлээн зөвшөөрч байна. Гэхдээ би улс төрөөс явахгүй гэдгээ онцлон тэмдэглэе” гэжээ. Порошенко болон түүний багийнхан Украин улсыг Европын Холбоо болон НАТО-д элсүүлэх, Зэвсэгт хүчин болон украин хэлний байр суурийг бэхжүүлэхэд чиглэсэн шинэчлэлийг хамгаалсаар байх болно гээд тангараг өргөхөөс нь өмнө төрийн үйл хэргийн талаар мэдэхэд нь Владимир Зеленскийд туслах хүсэлтэй байгаагаа илэрхийлсэн байна.

Ерөнхийлөгчийн хоёр дахь шатны сонгуулийн албан ёсны дүнг энэ сарын 30-нд танилцуулахаа Украины Сонгуулийн төв комиссын дарга Сонгуулийн төв комиссын орлогч дарга Евгений Радченко мэдэгдлээ.

Украины Сонгуулийн төв комиссоос албан ёсоор мэдээлснээр, цахим протоколуудын 20.81 хувийг боловсруулсны дараах байдлаар Владимир Зеленский сонгогчдын 73.35 хувийн саналыг авсан бол түүний өрсөлдөгч П.Порошенкод сонгогчдын 24.30 хувь нь саналаа өгчээ. Ерөнхийлөгчийн хоёр дахь шатны сонгуулийн ирц 62.07 хувьтай байна. Сонгуулийн урьдчилсан дүн 2-3 хоногийн дотор тодорхой болно хэмээн тэрбээр мөн мэдэгджээ. Хуульд заасны дагуу Сонгуулийн төв комисс сонгуулийн дүнг 5 дугаар сарын 1-нээс өмнө зарлах ёстой аж.

АНУ-ын Ерөнхийлөгч Дональд Трамп Владимир Зеленскийтэй утсаар ярьж, Украины ерөнхийлөгчийн сонгуульд ялсанд нь баяр хүргэжээ.

О.ЛХАГВАЖАРГАЛ