Ардчилсан Намын Дэд дарга Г.Батхүү нь 2019 оны тавдугаар сарын 17-ны өдөр 19.00 цагийн орчим Төрийн ордонд учир битүүлгээр амь насаа алдсан цочирдом үйл явдал болоод байна. Тэрээр тухайн өдөр Төрийн ордонд болсон “Торгоны зам” олон улсын автораллиг зохион байгуулах ажлын хэсгийн хуралд 15.00-18.00 цагийн хооронд оролцсон юм.

Төрийн тусгай хамгаалалттай, онцгой объект болох Төрийн ордны баруун жигүүрт өндрөөс унасан байх магадлалтай, амь насаа алдсан нь гадны нөлөөтэй байж болзошгүй гэсэн хардлагыг төрүүлээд байгаа юм. Г.Батхүү агсныг сүүлийн 20 минутад хэнтэй уулзаж байсныг хууль хяналтын байгууллага тогтоосон. Улмаар мэдүүлэг аваад байгаа юм.

Нийгмийн сүлжээгээр С.Эрдэнэ даргатай уулзаж байсан гэж тарааж байгаа энэ бол худал. АН тэр үеэр хуралдаан хийж байсан ажээ. Тэгвэл сүүлийн 20 минутад талийгаачтай хамгийн сүүлд уулзсан хүнийг УИХ-ын гишүүн Н.Номтойбаярыг гэх мэдээлэл гараад байгаа юм.

Тус хардлагад хариулт өгч, байр сууриа илэрхийлэх зорилгоор Н.Номтойбаяр мэдээлэл хийлээ. Энэ талаар тэрээр хэлэхдээ, “Тавдугаар сарын 17-ны орой талийгаач бид хоёр хамтдаа алхаад явж байсан. Бид хоёр хоёулаа автоспорт сонирхдог. Тэгээд дүүгийн өрөө аль вэ хэмээн надаас асууж, манай өрөөгөөр орж хэдэн минут саатсан. Буцаж гараад би 19:18 цагт байхад бүлгийн хуралд оролцсон. Энэ тухайгаа цагдаагийн байгууллагад мэдүүлэг өгсөн. Өчигдөр цагдаагийн байгууллага намайг завтай байна уу хүрээд ирээч гэхээр нь очиж мэдүүлэг өгсөн. Хамгийн сүүлд уулзахад жин нэлээн хассан байсан. Бид хоёр 2016 оны сонгуулиас хойш уулзаагүй. Надтай уулзахдаа сэтгэл санаа нь тайван тогтвортой байсан ч нүүрнийх нь судас нь бага зэрэг улайлттай байсан. Ах нь эмчилгээ хийлгэж байгаа гэж хэлж байсан юм. Миний өрөөнөөс гарахдаа "Ахыг нь хүн хүлээж байна" гээд яараад гарсан” гэлээ.

Мөн тэрээр "Миний ѳрѳѳнд уулзалт болсон. Би архи согтууруулах ундаа хэрэглээгүй. Ѳдрийн хоолон дээр жаахан архи задалсан нь үнэн. Намайг У.Хүрэлсүх сайдтай тэр ѳдѳр муудалцсан гэж мэдээлж байгаа. Ер нь маргаан гарч л байдаг шүү дээ" гэсэн юм.