Нийслэлийн Баянгол дүүргийн эрүүл мэндийн төвийг тойрсон шуугиан цахимаар нэг цацагдаж, энэ талаар дээр доргүй л шуугиж байна. Энэ дуулиан монголчууд бидний хувьд налгар зун хумигдаж, намрын ид ажил өрнөхтэй зэрэгцэж гарсан эд л дээ. Тэр үед л “Эмнэлгийн ажилтан, тангараг өргөсөн эмч нар ажил үүргээ гүйцэтгэж байгаад хэлмэгдэх ёсгүй” гэсэн утгатай мессеж Нүүрномд анх орж ирж үүнийг бичигч би бээр “Зүгээр, ажлаа хийж явсан хүнийг гэнэт халдаг яадаг дарга вэ тэр чинь. Тусламж хэрэгтэй бол хэлээрэй. Би сэтгүүлч хүн байна. Сэтгүүлчдэдээ ч дуулгая” гэж ирээд л сэтгэгдэл бичиж байсан удаатай. Гэтэл хоёр хоногийн өмнө Баянгол дүүргийн Эрүүл мэндийн төвийн захирлаар энэ оны долдугаар сарын 10-наас эхлэн томилогдсон З.Балдандугар шинэ албан тушаал дээр ирэнгүүтээ тус төвийн 14 хүнийг ажлаас халж, оронд нь өөрийн хуучин ажиллаж байсан “Ачтан” эмнэлгээс 10 хүн авчирч ажилд авсан гэх мэдээлэл хэвлэл мэдээллийн хэрэгслээр цацагдах нь тэр. Шинэ албан тушаалд ирээд гурав сар хүрэхтэй үгүйтэйн хооронд 14 хүн халчихаар ямар ч байгууллагад асуудал үүсэх нь тодорхой. Ядаж л хамт олны дунд хэзээ халагдах бол гэсэн айдас төрж таарна. Ийм бодолтойгоор БГД-ийн ЭМТ-ийг зорилоо. Бодит байдлыг сурвалжлах гэж тэр шүү дээ. Өглөөний 08.30 цагийн үед очиход эмнэлэг хэдийнэ олны хөлд дарагдсан байв. Гадуур хувцсаа В1 давхрын өлгүүрт өгөөд дээш гурван давхарт гарч юун түрүүнд тус төвийн ҮХ-ны даргатай уулзахыг чухалчлав. Нэгэнт 14 хүн халагдчихаад байхад эмч, ажилчдынхаа эрх ашгийг хамгаалах ёстой Үйлдвэрчний хорооны төлөөлөл мэдсэн л байх учиртай гэдэг үүднээс түүнийг хайлаа. Ингээд 315 тоот хаалганаас хайсан хүнээ олж, БГДЭМТ-ийн Үйлдвэрчний хорооны дарга Ч.Оюунбилэгтэй уулзсан юм.

Таван хүний асуудал 14 болтлоо өсчээ

Зорьж ирсэн учраа хэлбэл “Бие өвдөөд урагшаа эмчилгээнд явж, шинжилгээ өгч яваад саяхан ирсэн. Ажилдаа ороод хоёр хонож байна. Энэ тухай асуудлыг анх цахим сүлжээнээс мэдсэн. Тэр үед би эмнэлгээс гараад гэртээ байсан юм. Тийм мэдээлэл гарангуут шууд эмнэлэг дээрээ ирж З.Балдандугар даргатай уулзсан. “Та ийм олноор нь хүмүүсийг халсан юм уу. Яагаад Үйлдвэрчний хороонд мэдэгддэггүй юм бэ” гэж асуусан. Гэтэл “Урьд нь өөрт чинь хэлж танилцуулсан таван хүний асуудал л байгаа. Түүнээс нэмж халсан, тушаал гаргасан зүйл байхгүй” гэсэн. “Тэгвэл та энэ бүхэнд хариу тайлбар өгөөч. Ийм ташаа мэдээлэл нийтэд цацагдаад ирэхээр ажилчдын дунд айдас бухимдал үүснэ шүү дээ” гэдгийг хэлээд л гарсан. Тэгээд ажилчдынхаа хурлыг хийж, бодит байдлыг танилцуулж, мэдээлэл өгсөн байгаа” гэдэг хариулт өгөөд нэр бүхий таван хүний тушаалыг харуулсан.

Анх таван хүнийг ажлаас халах, өөрчлөх тухай тушаал гарсантай холбогдуулж, тухайн үед нь Монголын Эрүүл мэндийн ажилтны ҮЭ-ийн холбооны дарга Б.Мягмартай хамт есдүгээр сард БГДЭМТ-ийн дарга З.Балдандугар даргатайгаа уулзаж байжээ. Түүнээс хойш хүн нэмж халаагүй гэдгээ дарга нь хэлсэн байна. Ингэж халсан, ажлын байрыг нь өөрчилсөн гэх таван хүний асуудал өнөөдөр 14-т хүрч “үржчихээд” нийтэд цацагдчихжээ.

Асуудал хуулийн дагуу л шийдэгдэх байх

Дүүргийн ЭМТ-өөр явж байхдаа зарим ажилтнаас нь “Танай дээр юу болоод байгаа юм бэ. Эмнэлгийн ажилтнуудыг бөөн бөөнөөр нь халсан гэх мэдээллийг сонссон уу” гэж асуухад “Фэйсбүүк дээр тийм мэдээ гарсан гэсэн. Ганц хоёр эмч халагдсаныг мэднэ. Гэхдээ манай Үйлдвэрчний хорооноос бидэнд мэдээлэл өгсөн” гэж хариулах нэгэн байхад, нөгөө нь “Тийм олон хүн зэрэг халагдаагүй байх аа. Би л лав мэдээгүй юм байна. 14, 15-аар халаад хаячихсан бол энд сүйд болно биз дээ. Ж.Хуягбаатар эмчийг халсныг бол мэднэ” гэж хариулж байв. Гэхдээ мэс заслын тасгийн эрхлэгчийг халсныг бүгд мэдэж байлаа. Тэгээд ч уулзсан таван хүний дөрөв нь “Манай Ж.Хуягбаатар эмч маш сайн мэс засалч. Тийм эмчийгээ явуулсанд л харамсаж байна. Болдог бол буцаагаад авчих юм сан” гэж байсныг хэлмээр байна. Нэрээ хэлэхийг хүсээгүй ч, надтай ярилцсан тэдгээр хүмүүсийн магтаад байсан Ж.Хуягбаатар эмчийг “Удирдлагын зөвлөлд танилцуулалгүй харьяаллын бус хүнд яаралтай мэс заслын тусламж үйлчилгээ үзүүлсэн” гэх шалтгаанаар ажлаас нь халсан байх юм. Жижүүрээс буусан өдрөө халагдах тушаалаа хүлээж авсан гэх Ж.Хуягбаатар эмчтэй утсаар холбогдож, үнэн байдлыг тодруулах гэтэл “Би энэ тал дээр ямар нэг тайлбар хэлмээргүй байна” гэж цааргалав. Нэлээд учирласны эцэст “Би жирийн л нэг мэс засалч. Тангараг өргөсөн эмч хүний хувьд хийх ёстой ажлаа, хүлээсэн үүргийн дагуу л гүйцэтгэсэн. Миний мэргэшсэн, чадах зүйл хагалгаа. Түүнийгээ л хийсэн. Би есдүгээр сарын 12-нд ажлаас халсан тушаалыг гар дээрээ авсан. Ямар нэг хэл ам татлаагүй. Ном журмаар нь хуулийн байгууллагад хандсан болохоор асуудал хуулийн дагуу шийдэгдэх байх. Тушаалаа авснаас хойш дахиж даргатай уулзаагүй. Сар гаруй гэртээ сууж байна. Энэ хооронд сэтгүүлчид над руу хэд хэдэн удаа хандсан. Би мэдээлэл өгөхгүй л гэсэн. Зарим нь янз бүрээр л оролдож байна” гэсэн юм. Янз бүрээр оролдсон гэснээс мэргэжил нэгтнүүд маань утсаар залгаад хариулт хэлэхгүй болохоор нь ярилцсан яриагаа тэр чигээр нь тавьчихсан байна гэсэн шүү. Аливаад жаахан хүнлэг, ёс зүйтэй хандахад илүүдэхгүй биз ээ.

Нэгийнх нь ажлын байрыг өөрчилсөн тушаал байжээ

Ажлаас халагдсан гэх таван хүний нэгийнх нь ажлын байрыг өөрчилсөн тушаал байжээ. Тухайлбал, тус төвийн нийгмийн эрүүл мэндийн тусламж үйлчилгээ эрхэлсэн орлогч дарга Н.Болдбаатарыг ажлаас халаагүй бөгөөд албан тушаалыг нь бууруулж шуурхай тусламж дээр эмчээр ажиллуулах тушаал гаргасан байна. Харин Н.Болдбаатар орлогч үүнийг зөвшөөрөөгүй бололтой. Тэрбээр “З.Балдандугар долдугаар сарын 10-нд Баянгол дүүргийн Эрүүл мэндийн төвийн захирлаар томилогдсоноосоо хойш 14 хүнийг ажлаас нь халсан. Ингээд халагдсан хүний оронд бас шинээр ажлын байр бий болгож 33 хүнийг ажилд авсан байна. Үүний 10 орчим нь “Ачтан” эмнэлгээс ирсэн хүмүүс байгаа” гэж ярилцлага өгчээ.

Халагдсан нөгөө гурван хүний нэг нь ажлын байран дээр архи уусан, нөгөө нь тодорхой шалтгаангүйгээр ажилдаа ирээгүй удсан гэх шалтгааны улмаас халагдсан байна.

Д. Цэрэннадмид: Би баталж байна. Тийм асуудал байхгүй

БГДЭМТ-ийн Хүний нөөцийн албаны дарга Д.Цэрэннадмидтай уулзаж яригдаж байгаа асуудлын талаар тодруулахад “Манай Үйлдвэрчний хороон даргатай уулзаж байдалтай танилцсан байна. Бодит байдлын талаар ҮХ-ноос нийт ажилчин, албан хаагчдадаа мэдээлэ өгсөн. Энэ хүний ярьсныг би батална” гэсэн юм. “Танайх ажлаа хийж байсан 14 хүнээ халчихаад “Ачтан” эмнэлгээс 10 хүн авчирч ажилд авсан юм уу” гэхэд “Тийм олон хүн халаагүй. Нэгэнт манайд ажлын байр гарсан байхад шинээр эмч авах нь зүйн хэрэг” гэлээ. “Шинээр ажлын байр бий болгож 33 хүн ажилд авсан юм биш үү” гэхэд “Тийм асуудал байхгүй” хэмээн товч тодорхой хариулсан юм.

З.Балдандугар: Яг одоо завгүй байна

Энэ бүхний эцэст БГДЭМТ-ийн дарга З.Балдандугартай уулзах гэсэн боловч өрөөндөө байсангүй. Утсаар холбогдож мэдээллийг тодруулахыг хичээлээ. Нэлээд дуудуулсны эцэст утсаа авсан тэрбээр хаанаас холбогдож байгааг минь асуугаад “Мэдээ.мн” сайтаас ярьж байна” гэнгүүт “Уучлаарай, би яг одоо хүн үзээд завгүй байна. Дараа болъё” гэсэн хариу хэлээд харилцуураа таслав. Үнэндээ тэрбээр Дүүргийн цэрэг татлагын комисс дээр ажиллаж байгаа бөгөөд эхний өдөр маш их ачаалалтай байгаа ажээ.

Харин Монголын Эрүүл мэндийн ажилтны ҮЭ-ийн холбооны дарга Б.Мягмартай холбогдох гэсэн боловч гадаадад яваа гэх мессеж хариу өгч байв.