Хөгжлийн банкны захирлаар ажилласан зургаан сар гаруйн хугацаандаа одоогийн УИХ-ын гишүүн Г.Амартүвшин 327 тэрбум төгрөгийн зээлийг олгосон байдаг.

Хөгжлийн банк улс орны томоохон бүтээн байгуулалтыг санхүүжүүлэх дүрэм, журамтай ч хамгийн хачирхалтай нь Г.Амартүвшин захирлын үед олгосон зээлүүдийн олонхи нь МАН-ын гишүүдийн компаниудад очсон байдаг юм.

Түүний үед зээл авсан томоохон зээлдэгчийн нэг нь “Эм эм и кью” ХХК. Уул уурхай, гадаад худалдаа, машин механизмын тоног төхөөрөмжийн худалдаа, барьцаалан зээлдүүлэх салбарт үйл ажиллагаа явуулдаг хэмээн бүртгэгдсэн энэ компани Г.Амартүвшин гишүүнийг захирлаар ажилласан хэдхэн сарын хугацаанд 67.7 тэрбум төгрөгийн зээлийг Хөгжлийн банкаас авч чаджээ.

Зээлдэгч:

- “Эм эм и кью” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 67.779.051.083.00

Үйл ажиллагаа: - Уул уурхай, олборлолт

Гол хувьцаа эзэмшигч: - “Моннис интернэйшнл” ХХК

Ийм их хэмжээний зээлийг авсан энэ компанийн гол хувьцаа эзэмшигч нь нэгэн цагт МАН-ын том санхүүжүүлэгч байсан “Моннис интернэшнл” ХХК.

Байсхийгээд л элдэв дуулианд нэр нь холбогдож байдаг “Моннис интернэшнл” бол саяхан сургуулийн автобусыг зах зээлийн үнээс нь хэд дахин нугалж нийслэлд нийлүүлсэн байж магадгүй дуулианд нэр холбогдсон “Моннис моторс”-ын хувьцаа эзэмшигч.

Нэг үгээр хэлбэл МАН-ын гишүүн, Сүхбаатар аймагт тус намаас УИХ-ын сонгуульд нэр дэвших магадлалтай хүнээр нэрлэгддэг Базын Чулуунбаатарын компаниуд гэсэн үг. Тэгвэл Хөгжлийн банкаас “Моннис интернэшнл” ХХК зээл авч байх үетэй давхцан тус компанийн охин компани болох “Моннис моторс” маш том нэгэн гэрээг өөрийн талд зуруулж байжээ.

Энэ нь “Сургуулийн автобус” төсөл бөгөөд “Моннис моторс” энэ төслийн автобусыг нийлүүлэхээр шалгарч байхад нийслэлийн Засаг даргаар өдгөөийн УИХ-ын гишүүн С.Амарсайхан ажиллаж байлаа.

Энэхүү төслийн хүрээнд 2020 онд 75 автобусыг 23 тэрбум төгрөгөөр, 2021 онд мөн 75 ширхэгийг 23.3 төгрөгөөр, 2022 онд 50 ширхэг автобусыг авахаар “Моннис моторс”-той гэрээ байгуулан ажиллаж байжээ.

Үүний эхний санхүүжилт болох 23 тэрбум төгрөгийг 2020 оны нийслэлийн төсөвт тусган “Моннис моторс”-т өгсөн байдаг юм. “Моннис моторс”-ынхон ч эхний ээлжийн автобусуудаа оруулж ирэн, үйлчилгээнд явуулж эхлэсэн. Гэтэл үүнтэй зэрэгцээд “Сурагчдын автобус” төсөл нь улстөрчид хийгээд бизнесийнхний асар том шахаа байсан байж болох талаар баримтууд гарч ирсэн.

Нэгхэн жишээ дурдахад манайд 130 мянган доллараар оруулж ирж байгаа хүүхдийн автобусын зах зээлийн үнэ нь 44 мянган доллар байдаг талаар мэдээллүүдийг өнгөрсөн оны сүүлээр хэвлэлүүд гаргаж ирсэн.

Ердөө хэдхэн хоногийн өмнө asu.mn сайт энэ хэрэгтэй холбогдуулан УИХ-ын гишүүн С.Амарсайхан болон “Моннис моторс”-ын захирал Б.Чулуунбаатар нарыг АТГ-аас шалгаж эхлэсэн талаар мэдээлсэн байсан. (Энэ талаархи мэдээллийг http://asu.mn/content/5757 холбоосоор уншина уу)

Ингэж МАН-ын гишүүн “Моннис”-ын Б.Чулуунбаатар УИХ-ын сонгуулийн өмнөхөн нэг талаас Г.Амартүвшингээс Хөгжлийн банкны зээл, нөгөө талаас С.Амарсайханаас “Сургуулийн автобус” төслийн асар олон тэрбум төгрөгийг авч байжээ. Эдгээр мөнгө нь эргээд сонгуулийн сурталчилгаанд зарцуулагдаагүй гэж найдъя.