Нийслэл хотын хэмжээнд 1831 ТҮЦ байгааг тоолж тодорхой хэсэгт шаардлага хүргүүлж, зам талбайд, зорчих хэсэгт төвөг учруулсныг нүүлгэн шилжүүлж, явган хүний зам, автобусны буудлуудын талбайг чөлөөлөх аж. ТҮЦ буюу жижиглэн худалдаа нь эдийн засагт хор хөнөөлгүй, үйлдвэрлэлгүй улс орны хүмүүс амьжиргаагаа залгуулдаг хэрэгсэл юм. Өргөн хэрэглээний барааг дамлан зарахаас өөрөөр эдийн засгийн чөлөөт өрсөлдөөнд бөөнөөрөө орох шударга, эрүүл орчин бүрдэхгүй байгаа нь Монголд ТҮЦ-ний бизнес нэгэн хэвийн үргэлжилж байгаагаас харагдана.

Хүнс, бараа, үйлчилгээний чухалд байршлуудад CU, GS25 гэх мэтийн олигархи групп компаниуд гаднаас татан оруулж ирсэн үйлчилгээний цэгүүд орж ирээд бие даасан Монгол худалдаа эрхлэгчдийг цохиж байгаа нь шударга бус.

Өөрөөр хэлбэл аливаа бизнес үйлчилгээ, орчин, тохижилт, байршлаас ихээхэн хамаардаг хамгийн гол дэмжлэг бол төрийн оновчтой бодлого. Төрийн ордонд GS25 сүлжээ дэлгүүрийн салбар нээгдэхэд улсаараа шуугиад өнгөрөхөөс өөр чадамжгүй сул дорой. Өөрөөр хэлбэл төрд ч ард түмэнд ч өөрсдөө бүтээх, нэгнээ дэмжих сэтгэл зүтгэл сульджээ. Иргэдийн бор амьдралыг залгуулдаг жижиглэнгийн худалдааг шүүрдэхдээ маш түргэн шуурхай, хүчирхэг мөртлөө аварга авлигачид, улсаа тонодог луйварчдад тун ч эелдэг, аядуу зөөлөн нь эгдүүцэм хэрэг мөн.

Үнэндээ Монгол улсын нийслэлд зочилж буй гадаадынхан гудамжаар нь Монголыг илтгэх үйлчилгээний онцлогтой дэлгүүр, зочид буудал, үйлчилгээний төв байхгүйг хараад л Монголын эдийн засаг, нийгмийн байдлыг товчхон дүгнэж болохоор юм. Нийслэлийн засаг Д. Сумъяабазар 1 жилийн өмнө л жижиглэн худалдаа эрхлэгч, ТҮЦ ажиллуулдаг иргэдийг зөвшөөрөл, татвар хураамжаар дарамтлахгүй байхыг үүрэгдэж попорч байсан бол өдгөө хуугаар нь нүүлгэн шилжүүлж цэвэрлээд эхэллээ.