Найман сар ид дундаа хөдөө хотгүй намар өвлийн бэлтгэл базаан хичээлийн шинэ жилийн хонхны дуу юу юугүй жингэнэлээ. Оюутан сурагчдын их нүүдэл нийслэл рүү хөвөрдөж ид түгжрэлийн идэвхтэй сарууд хаяанд тулжээ. Үерийн аюулын чимээ намжиж амжаагүй атал хот хариуцсан сайд,дарга нар түгжрэлийн талаар бүлх залгисан мэт аниргүй. Жил бүр дугаарын хязгаарлалт нэртэй бүдүүлэг аргыг хэдий болтол турших билээ.

Дугаарын тэгш сондгойгоор замын хөдөлгөөнд оролцуулж механик аргаар хүчээр хөдөлгөөн сааруулах гэж оролддог байдал энэ жил харамсалтай нь дахин давтагдах уу. Утааны асуудлыг урд хөршөөс нүүрс худалдаж аваад л шийдэхээр хялбарчлах хөөрхийс түгжрэлийг хаанаас юу авч ирж сааруулна гэж зүрх амаар гаргах бол гэхээс байж сууж ядмаар.

Энэ зун нийслэлийн хэмжээнд түгжрэлийг бууруулахад чухам ямар арга хэмжээ авч ажилсан билээ. Одоо ч зарим зам уулзвар үерийн үр дагавар арилаагүй онхол донхол ихтэй хэвээр. Зарим газар гүүрэн байгуулам ж тэр чигээрээ нурж дарагдсан байдалтай. 339.7 тэрбум төгрөг зөвхөн автобус худалдан авахад зарцуулагдахаар хуульчлагдаж түгжрэлийг бууруулах бусад ажилд маш бага төсөв хуваарилалдан зарцуулагдах нь хуульд нийцээгүйг 2023 оны төсөв хэлэлцэх үеэр хэвлэлүүд анхааруулсан.