Ядуурал зэрлэгшил хоёр харилцан хамааралтайг Мулдашев нотолсон. Уулын зэрлэг хүмүүс ядуу учраас балмад хэрцгий үйлдэл хийдэг үү эсвэл харьцангуй иргэншсэн хот суурингийн амьдрал ч ядуурлын нөлөөгөөр хэрцгийлэлтэй нүүр тулдаг уу гэвэл яг адилхан хариу гарна. Ядуурал ухамсарт тун сөрөг нөлөөтэй төдийгүй хүний сэтгэл зүйд ухамсар, хайр энэрэл, ёс жудаг гэх ойлголт устаж эхэлдэг.

Монголын нийгэмд ядуурлаас үүдэлтэй хэрцгийлэл давхарга бүрд газар авчээ. Төрийн тонуулчид иргэдийн боломжийг дээрэмдэж амин хувиа хичээн,эх орноо ч худалдахаас буцахгүй шунал тачаалд нэрвэгдсэн хэрцгий,догшин авиртнууд, хүнлэг ёсыг уландаа гишгэсэн улаан цагаан дээрэмчид болсон.

Харин хөрөнгө мөнгөөр бядуу хэсгийнхэнд шар нар бор хоногийг өнгөрөөхөөс илүү өөр хүч чадал үлдсэнгүй. Үр хүүхдээ хүчирхийлэх, алах, хулгайлах мэтийн аймшигт үйлдлийг аль аль давхаргынхан ичиж зоволгүй үйлдэцгээн мөнгөтэй нь хууль дүрмийг мөнгөгүй нь ухамсар, ухаанаа гээжээ.

Хүний эрх өмчтэй байхаас эхэлнэ. Өмчтэй хүнд нийгмийн хөгжлийн асуудлыг ярьж болно. Ийм шат дамжлагыг дамжихгүй бусдын шахалт заавраар өдий хүртэл яваа Монголчуудын хувь заяа зөвхөн өөрсдийнх нь л гарт байгаа. Үндэсний ухамсар сэргэх нөөц бололцоо үлдсэн эсэхийг ирэх он жилүүд харуулна.

Д.Энхбат