Бид олон бахархах зүйлтэй үндэстэн хэдий ч заримдаа гашуудмаар дорой хандлагатай. Тэр нь нэгнээ дэмждэггүй, эвлэлдэн нэгдэхдээ хойрго, эцэст нь цаг цагийн цуглуулга гэмээр эгзэгтэй үед хар амиа боддог хөгийн зан суртахуун. Үүнээс үүдэн үе хооронд үл ойлголцол үүсэж үндэстэн сэхээрч чадахгүйдээ нөхцөл бүрджээ. Халуун залуу насныхан нуруугаа автал зүтгэж харин арай түрүүчийнхэн ирээдүйнхээ боломжийг шимэгчилдэг дорой сэтгэхүйг зарим нь хэт их өвлөв үү гэлтэй.

Бусдын дарлалд байснаа санагалзаж, булааж авч бидэнд үлдээсэн үнэт зүйл эрх чөлөө тусгаар тогтнолынхоо төлөө санаа зовинох эрх баян хоосон цэцэн тэнэг ялгаагүй хэнд ч бий. Гагцхүү түүний хүсэл зориг бодит үйлдэл, үр дүн болж чадах уу гэдгийг өнөөдөр тун амархан тогтоож болдог эрин.

Цэл залуу Монгол охид хөвгүүд харамсалтайгаар хөдөлмөрлөх насан дээрээ хатуу хөтүүг амсаж бэрхшээлд сөхрөх тохиолдол тун их байна. Өр зээлийн дарамт, өнө холын төсөөлөл, сэтгэл зүйн олон бэрхшээлийг давна гэдэг амьдрал амсаж байхад хэтийдэх гэхээс хүнддэх биш.

Хөдөлмөрийн насны залуучууд цөм гадаадад цагаачлан өндөр цалинтай ажил олж хийх стресс бухимдлаас ангид байхыг илүүд үздэгийг нийгмийн судалгаанууд харуулна. Бүх он цагийнханд хүндрэл бэрхшээл тулгардаг. Гэхдээ авлигал ядуурлаас үүдэх нийгмийн сэтгэлгээний хоцрогдол, зэрлэгшил, хэрцгийлэл, айдас дарамт хэрээс хэтэрсэн үед асуудлыг даван гарах зориг тэмүүлэл зөвхөн ирээдүйн сайн сайхны төлөөх итгэл найдварт бий.Залуу үеэ бүү мохоо. Алдааг нь зөвөөр сургамжил, Үлгэрлэн дагуул.