Япон улсын ерөнхий сайд Фүмио Кишида энэ долоо хоногийн Баасан гарагаас наймдугаар сарын 12-ны өдрийг хүртэл Казахстан, Узбекистан, Монгол улсуудад айлчлахаар төлөвлөж буйг Токиогийн албаны эх сурвалж өчигдөр мэдээлжээ.

Айлчлалын зорилго нь Монгол болон Зөвлөлтийн бүрэлдэхүүнд багтаж байсан Төв Азийн улсуудын хөрш Орос, Хятадаас хамаарах хамаарлыг сулруулж, уур амьсгалын өөрчлөлттэй тэмцэхэд нь өндөр технологийн тусламж дэмжлэг үзүүлэх гэнэ.

Тухайлбал цахилгаан станцуудыг нь шинэчлэх, бордоо болон түлш шатахуун үйлдвэрлэх арга технологийг нэвтрүүлэх боломжийн талаар ярилцах ажээ.

Хүний хөгжлийн тал дээр ажиллах хүчний хомсдолд орсон Япон улс Азийн эдгээр орнуудаас мэргэжлийн ажилчин авах боломжийг ярилцах юм байна.

Бас JICA байгууллагаар дамжуулан Япон хэлний боловсролын дэмжлэг үзүүлэх асуудлыг хөндөх ажээ.

Япон улсын засгийн газар энэ сарын сүүлээр Казахстанд анх удаагаа Төв Азийн таван улсын (Казахстан, Киргизстан, Тажикистан, Узбекистан, Туркменистан) төрийн тэргүүнүүдтэй дээд хэмжээний уулзалт зохион байгуулахаар төлөвлөсөн юм байна.

Эх сурвалж: Kyodo News

IKON.MN