Өнгөрсөн Пүрэв гаригийн өглөө криптовалютын дэлхийн зах зээлийн үнэлгээ 3,2 их наяд ам.доллар буюу түүхэн дээд үзүүлэлтэд хүрсэн тухай "CoinGecko" цахим хуудаст мэдээлжээ.

Хамгийн сүүлд буюу 2021 онд криптовалютын зах зээлийн үнэлгээ 2,9 их наяд ам.долларт хүрч байв. Маш олон төрлийн криптовалют дотроос биткоины ханш хамгийн ихээр өсөж, 93480 ам.долларт хүрсэн байна.

"Astronaut Capital" компанийн захирал, криптовалютын арилжаа эрхэлдэг Мэтью Дибба “Эхлээд биткоины ханш өссөний дараа бусад криптовалютын ханш дагаад өсдөг зүй тогтол бий” гэж ярьжээ.

Шинжээчдийн дүгнэснээр, Д.Трамп сонгуульд ялсан, мөн криптовалютыг дэмждэг Конгресс дахь зарим хууль тогтоогчдын гаргасан шийдвэр нь зах зээлд хөөрлийг өдөөснөөс гадна криптовалютын талаар Америкийн эрх баригчид ямар зохицуулалтын арга хэмжээ авах гэж буй нь тодорхойгүй байгаа учраас ханш өссөн байна.

Энэ онд биткоины ханш хоёр дахин өссөн, ялангуяа 11 дүгээр сарын 5-нд болсон сонгуулиас хойш 30 хувиар нэмэгдэж, 90 мянган ам.доллароос даваад байгаа юм. Мөн Д.Трампыг тууштай дэмжигч Элон Маскийн Dogecoin-ы ханш 140 хувиар, Ethereum-ийн ханш 33 хувиар тус тус өсчээ.

Үүний сацуу криптовалютын биржүүдийн хувьцаа идэвхтэй арилжаалагдаж байгаа нь криптовалютыг шууд эзэмшихээс зайлсхийсээр ирсэн санхүүгийн байгууллагуудын худалдан авалт өссөнтэй холбоотой байж магадгүй юм.